मचा प्रतिभाय् उत्कृष्ट जूपिनिगु नां घोषणा

येँ (नेपालभाषा टाइम्स) – वर्ल्ड नेवाः अर्गनाइजेसन (डब्लुएनओ)या ग्वसालय् ‘ग्लोबल नेवाः चिल्ड्रेन ट्यालेन्ट कम्पिटिशन-२०२०’ नामं जूगु मचा प्रतिभा कासाय् उत्कृष्ट जूपिनिगु नां घोषणा याःगु दु। कासाय् खुदँ क्वय् व खुदँ च्वय्या मुक्कं पीगुम्हेसिनं थःथःगु प्रतिभा न्ह्यब्वःगु खः ।

ग्वसाः खलकं बिउगु जानकारीकथं खुदँ क्वय् खुम्ह व खुदँ च्वय् पीस्वम्ह मस्तय्सं थःथःगु प्रतिभा न्ह्यब्वःगु खः । छम्ह हे कासामिं व्यक्तिगत व पुचःकथं तःगू प्रतिभा न्ह्यब्वयाः ब्वति काये जिउगु मचा प्रतिभा कासाय् उमेर समूहय् स्वम्ह स्वम्ह व सामाजिक संजालय् भ्युज व लाइकया लिधंसाय् प्यम्ह यानाः झिंम्हेसित उत्कृष्ट घोषणा याःगु खः ।

खुदँ तकया उमेर समूहय् संकिपा श्रेष्ठ, आर्जल डंगोल व आरिया महर्जन उत्कृष्ट जुयादीगु खःसा खुदँ च्वय्या उमेर समूहय् सजगता मानन्धर, सिम्रिक श्रेष्ठ व सुबिना, स्वजला, आर्शमा महर्जन व एन्जेला श्रेष्ठया पुचलं सिरपाः त्याकेत सफल जूगु खः । उमेर समूहय् उत्कृष्ट जूपिं सकसिनं म्हतिं न्याद्वः, न्याद्वः सिरपाः त्याकेत सफल जूगु दु ।

अथे हे सामाजिक संजालपाखे पल्पसा प्रधान न्हाप, प्रथम श्रेष्ठ लिउ, नेरिशा महर्जन लियांलिउ व अयुष्का जोशीं हःपाः सिरपाः त्याकेत ताःलाःगु दु। थुगु पुचलय् उत्कृष्ट जूपिंसं छसिकथं न्याद्वः, स्वद्वः, निद्वः व द्वःछि तका सिरपाः त्याकादीगु दु । कासाय् वरिष्ठ सिने पत्रकार विजय असंबरे, म्येँ हालामि सरिष्मा अमात्य व कलाकारलिसें संचारकःमि अजय देसारया निर्णायक पुचलं प्रतिभापाखे व प्रविण शाक्यं सामाजिक संजालपाखे उत्कृष्टया नां घोषणा यानादीगु खः । कासाय् ब्वति  कयादीपिं सकसितं हःपाःकथं म्हतिं द्वःछि तका बीगु कजि दिपेश शाक्यं कनादिल ।

डब्लुएनओया नायः सिजन श्रेष्ठया सभापतित्वय् किपू नगरपालिकाया प्रमुख रमेश महर्जनं मूपाहांकथं ब्वति कयादीगु भर्चुअल ज्याझ्वलय् सांसद राजेन्द्र श्रेष्ठ, नेवाः न्ह्यलुवा मल्ल के. सुन्दर, नेवाः देय् दबूया नायः नरश ताम्राकार, संस्थाया संस्थापक दुजः दया शाक्य, कलाकार नगिना जोशी व ज्यापु महागुथिया नायः राजभाई जकःमिपिंसं पाहांकथं ब्वति कयादीगु खःसा ग्वसाः खलःया कृष्ण चखुं नं सुभाय् देछानादीगु खः ।

सम्बन्धित बुखँ

LEAVE YOUR COMMENTS