कलिउडया विवाद

न्ह्यःखँ
कोरोनाया प्रकोपं संसार हे थप्प जुल । संसारया दक्वः ख्यः थें हे तुं फिल्मख्यः नं थप्प जुल । आः तक जुया च्वंगु हे दनि । दकलय् न्हापां कोरोनाया महामारी ब्वलंगु देश चीन खः । कोरोनाया संक्रमणपाखें सुरक्षित जुइगु कुतः कथं लकडाउन जूबलय् मेमेगु ख्यः थें चीनय् नं फिल्मख्यः थप्प जुल । फिल्मया गतिविधी दित। हलिउडय् नं अथेहे जुल ।

बलिउडय् नं जुल । कलिउड धकाः धयातःगु खस नेपाली फिल्मख्यः नं थप्प हे जुल । आः वया लकडाउनयात छुं भतिचा छ्वासुका हःगु दु। तर कोरोना संक्रमणया जोखिम धाःसा क्वलाःगु मदु, ल्यं हे दनि । लकडाउन छ्वासुकेवं गुलिखे ज्याकु, व्यापार, बजाः, उद्योग चाले धुंकूगु दुसा पर्यटनख्यः, शिक्षाख्यः व फिल्मख्यः धाःसा बन्द हे तिनि । गुलिसिनं फिल्मख्यःया लकडाउन नं छ्वासुके माल धकाः सः थ्वयेका च्वंगु दुसा संक्रमणया जोखिम ल्यंहे दनिगु कारणं सरकारं फिल्मख्यलय् तयातःगु लकडाउनयात छ्वासुकेगु बिचाः मयाःनि ।

भारतया बलिउड धकाः धयातःगु हिन्दी फिल्मख्यलय् लकडाउन छ्वासुका सामाजिक दुरी कायम यानाः सुरक्षाया उपाय नालाः शुटिङ्ग यायेत उजं बिउबलय् अनया महानायक धयातःम्ह अमिताभ बच्चन व वया काय् अभिषेक बच्चनं नं शुटिङ्गय् ब्वति काल । लिच्वः कथं इमिगु परिवारयात हे कोरोनां पुना हल । थन नं सुरक्षित जुयाः शुटिंग याये दयेमा धका सः थ्वयाच्वंगु दु। सुरक्षाया उपाय छ्यलाः सिनेमा हल चायेके दयेमाः धका सः थ्वयाच्वंगु दु। चीन छगू त्वःताः संसारया मेमेगु देशय् नं सिनेमा हल बन्द हे तिनि ।

भुवन के.सी. व साम्राज्ञी दथुया विवाद
सिनेमाया शुटिङ्ग दिनाच्वंसां, सिनेमा हल बन्द जुया च्वंसां कलिउड धाःसा चर्चाया च्वकाय् थ्यनाच्वंगु दु थ्व लकडाउनया इलय् । दकलय् मध्येबय्बय् जूगु चर्चा नेपाःया एभरग्रीन स्टार धकाः धयातःम्ह भुवन के.सी. व साम्राज्ञी राज्य लक्ष्मी शाह नांयाम्ह हिरोइन दथुया विवाद खः । थ्व साम्राज्ञी नांयाम्ह मिसायात नेपाली फिल्मय् हिरोइन दयेका इन्ट्रि याकूम्ह भुवन के.सी. हे खः । भुवन के.सी. थम्हं प्रोड्युस व डाईरेक्शन याःगु “ड्रिम्स” नांयागु फिल्मं कलिउडय् दुहां वःम्ह साम्राज्ञीयात लिपा वनाः कलिउडया छम्ह बांलाःम्ह हिरोइन धकाः चर्चा यानाहःगु खःसा वयात कलिउडया ‘हाइएस्ट पेड’ हिरोइनया रुपय् नं कयाहःगु खः । थनतक ला दक्वः हे ठीकठाक चले जुयाच्वंगु खः । तर लकडाउनया इलय् साम्राज्ञीं थःगु सामाजिक सन्जालय् छगू भिडियो पोस्ट यानाः “ड्रिम्स” या शुटिङ्गया इलय् भुवन के सीं वयागु म्हय् म्हय् थिउ वःगुयात कुनियत धका न्ववात ।

थथे साम्राज्ञीं थःत द्वपं बिसेंलि भुवनं नं लिसः बिल । निम्ह दथुया विवाद चलचित्र कलाकार संघ तक थ्यन । संघं इमिगु विवाद क्वलाकेगु कुतः यात तर क्वलाके मफु। साम्राज्ञीं झन तच्वः जुया आरोप लगे यात। शुटिङ्गय् बांलाक मनकु तकं धालसा भुवनं धाःसा साम्राज्ञी नयेगु त्वनेगुलिइ साम्राज्ञीं थःयात तसकं दुःख बिउगु खँ न्ह्यःने हल । आः न्यने दुकथं भुवन केसीं थःगु मानहानि याःगु द्वपं बिया १० करोड दांया क्षतिपुर्ति सहितया माग यासें अदालतय् मुद्दा तःगु दु।

महानायकया विवाद
कलिउडय् ब्वलंगु मेगु विवाद धइगु महानायकया विवाद खः । नेपाली फिल्म ख्यलय् छुं ई न्ह्यवनिसें राजेश हमालयात महानायक धकाः धायेगुयानाहःगु खः । स्वीदँतक दिपा मदिक्क फिल्म म्हिता च्वंम्ह राजेश हमालयात झिदँ-झिनिदँति न्ह्यः “रजटपट” नांयागु छगू टिभि ज्याझ्वलय् महानायक धकाः धाःगु खःसा लिपा वनाः नेपाल चलचित्र प्राविधिक संघं छगू औपचारिक ज्याझ्वः हे यानाः महानायक धकाः घोषणा याःगु खः । अनंनिसें राजेश हमालयात नेपाली फिल्मया महानायक धायेगु यानाहःगु खःसा आः वयाः लकडाउनया इलय् पिदंगु अन्तरवार्ताय् नांजाःम्ह फिल्म निर्देशक व हास्य कलाकार दीपाश्री निरौलां बिउगु छगू लिसलय् राजेश हमाल आः नं महानायक खःला धका धाःबलय् विवाद ब्वलंगु खः ।

थ्व विवादया पक्षय् व प्रतिपक्षय् आपालं खँ पिहां वल । आपाःसिनं दीपाश्रीयात घमण्डी मिसा धकाः नं धाल । सामाजिक सन्जालया अंगः थ्व विवादया खं जाल । आपासिनं दीपाश्रीयात कुंखिनाहःबलय् वय्कः मय्जुं सार्वजनिक रुपं माफी नं फ्वन तर अय्सां विवाद क्वमलाः । झन चर्के जुल । “तीतो सत्य” थेंज्याःगु अतिकं लोकंह्वाःगु टिभि सिरियलं थ्व ख्यलय् थहां वःपिं दीपकराज गिरी व दीपाश्री निरौलाया थ्व जोडी जानाः लिपा आपालं फिल्म नं दयेकूगु खःसा दक्व फिल्म हिट नं जुल । उलिजक मखसे दीपाश्रीं निर्देशन याःगु “छक्का पञ्जा”या स्वंगूगु सिरिज फिल्म तसकं बनेज्या ताःलाःबलय् दीपाश्रीया घमण्ड अप्वल धकाः धाइपिं यक्व दु ।

थ्वहे घमण्डया कारणं दीपाश्रीं अथे न्ववात धकाः धाःगु खःसा आपाःसिनं सामाजिक सञ्जालय् कुंखिना हःबलय् दीपाश्री डिप्रेशनय् वन धकाः नं खँ पिहां वल । गुलिखे कलिउड स्टारतसें राजेश हमालया पक्षय् हे न्ववातसा दीपकराज गिरी लगायतं दीपाश्रीया पक्षय् वकालत यात। थःगुबारे थुकथं विवाद ब्वलंसा म्हुतुसी मफासे च्वंम्ह राजेश हमाल धइम्ह “क्लीन इमेज” दुम्ह हिरो खः । तर विवाद तच्वया वःबलय् तिनि राजेश हमालं दीपाश्री निरौलाया न्ववाःगु खँयात कयाः न्ववासें थुकी दीपाश्रीयात थःम्हं माफ यानागु व सकसिनं माफ याना बिइत इनाप यात। अनं तिनि विवाद क्वलाना वन ।

पुजा शर्माया सामान्य ज्ञान
कलिउडया मेमेगु विवाद मध्ये छगू विवाद धइगु थौंकन्हय् सामाजिक सन्जालय् तसकं लोकंह्वाःम्ह हिरोइन धका धयातःम्ह पुजा शर्माया सामान्यज्ञानया खँयात कयाः जूगु विवाद खः । वय्कः मय्जुं छगू टिभि अन्तरवार्ताया झ्वलय् नेपालयाबार न्यंगु छगूनिगू न्ह्यसःया लिसः पाय्छी मजुइक बिउगु जुयाच्वन। वयाके नेपाःया छम्ह निम्ह मन्त्रीया नां न्यंबले मिले जुइक बिइमफुगु व नेपालय् ग्वःगु प्रदेश दु धकाः न्यंबलय् नं झिंप्यंगू धकाः लिसः बिउगु जुयाच्वन। थ्वहे खँयात सामाजिक सञ्जालय् आपाःसिनं पुजा शर्माया कुंखिन। वयागु पक्षय् न्ववाःपिं दीपकराज गिरी थेंज्याःपिं कलाकारतसें कलाकारयाके देशया भौगोलिक व राजनैतिक स्थीतियाबार न्ह्यसः न्यने गु पाय्छी मखु धकाः धालसा आपासिनं छम्ह चर्चित सेलिब्रिटीयाके देशया भौगोलिक व राजनैतिक ज्ञां मदुसां सामान्य ज्ञान ला दयेमाः धकाः धाल ।

प्रियंका कार्कीया भारत व इण्डिया
भारतिय मिडियां नेपाल व नेपाःया सम्माननिय प्रधानमन्त्री व चीनया महामहिम राजदूतयात कयाः न्ह्यःनेलाःथे सामाग्री पितबिउबले नेपालय् भारतया दक्वः टिभि च्यानल बन्द यायेगु निर्णय याःबलय् नेपाःया आपालं फिल्मस्टारतसें समर्थन हे याःगु खःसा नेपाःया लोकंह्वाम्ह हिरोइन प्रियंका कार्कीं नं समर्थन हे यात। थःगु थ्व हे समर्थनया सः न्ह्यब्वयेत वय्कः मय्जुं थःगु सामाजिक सन्जाल ट्वीटरय् ट्वीट यानाः “भारतीय न्युज च्यानलमात्र हैन अब इण्डियन न्युज च्यानल पनि बन्द गर्नु पर्छ” धकाः धाःबलय् नं वय्कः मयजु विवादया कारण जूगु खःसा आलोचनाया शिकार जूगु खः ।

थुकथं थ्व लकडाउनया इलय् कलिउड धका खस नेपाली फिल्म ख्यलय् थीथी स्टारत थःगु अस्वाभाविक अभिव्यक्तिया कारणं विवादय् लाःगु खनेदत ।

विजयरत्न असंबरे

च्वमिया मेमेगु

• किपू चिहा संकिपा कासायात दुवालेबलय्
• चलायमान जुइला बलिउड ?
• कोरोनाया इलय् नेवाः फिल्मख्यः
• सुपरस्टारतय् रिलिज मजुगु फिल्म
• मेगु छगू फ्लप