चलायमान जुइला बलिउड ?

विश्वया फिल्म बजार बक्स अफिस शून्यया अवस्थाय् लानाच्वंगु ताः दत । विशेष यानाः बलिउड धका धयातःगु हिन्दी फिल्मख्यःया खँल्हायेगु खःसा अन हलय् फिल्म रिलिज मजूगु च्याला गुला हे दत । कोरोना संक्रमणपाखें मनूतय्त सुरक्षित यायेगु निंतिं अप्वः मनू मुनिगु दक्वः थाय् बन्द यायेगु झ्वलय् सिनेमा हल नं बन्द यात । छुं ई लिपा भारतया दकलय् तःधंगु फिल्म उद्योग धकाः धयातःगु बलिउडया गढ मुम्बई छगू त्वःताः मेमेगु शहरय् सिनेमा हल चायेकेबिल । तर न्हून्हूगु फिल्म रिलिज मजूगु व मनूतय् नुगलय् कोरोना संक्रमणया ग्याचिकु दनिगुलिं यानाः हलय् फिल्म स्वःवःपिं उलि मदु धका धाइ । आः वया थ्व डिसेम्बर महिनाय् छुं छुं बलिउड फिल्म हलय् रिलिज जुइगु खँ पिहां वःबलय् थ्व चिकुसे च्वनाच्वंगु इलय् बलिउडया बजाः क्वाना वइला धइगु चर्चा जुयाच्वंगु दु ।

भारतया फिल्मबजाः चलायमान यायेगु तातुना गुलिखे हिन्दी फिल्मत ओटिटि अर्थात इण्टरनेट माध्यमं रिलिज यात । अथे ओटिटिइ रिलिज जूगु फिल्मय् बलिउडया मेगास्टार धयातःम्ह अमिताभ बच्चन व इमर्जिङ्ग सुपरस्टार कथं चर्चा यानातःम्ह आयुष्मान खुराना दुगु “गुलाबो सिताबो” निसें थौंया सुपरस्टार अक्षय कुमारया तसकं बय्बय् जूगु “लक्ष्मी” तक इण्टरनेट अर्थात ओटिटिइ रिलिज जुल । थुकियात डिजिटल रिलिज धकाः धाइ । ओटिटिइ अर्थात डिजिटल रिलिज जूगु फिल्म स्वयेत दर्शकं ध्येबा पुलेमाः । थ्व ध्यबा नं डिजिटल सिस्टमया लिधंसा कयाः हे पुलेमा । नेपाल व भारत थेंज्याःगु देशय् शिक्षित जनताया ल्याः म्होजक दुगुलिं थथे डिजिटल पेमेन्टयाबारे ज्ञां दुपिं उलि मदुनिगुलिं याना ओटिटिइ फिल्म स्वइपिनिगु ल्याः उलि अप्वये मफुनि । आः तक ओटिटिइ रिलिज जूगु बलिउड फिल्मं उलि बांलाक्क दां कमेयाये मफुगुया कारण छगू थ्व नं खःसा मेखे थ्व ख्यलय् बलिउड फिल्मयात हाथ्या बियाच्वंगु धइगु वेब सिरीज नं खः ।

अक्षय कुमार व कायरा आडवानीया “लक्ष्मी”यात ओटिटिया दकलय् नांजाःगु वेबसाइट डिज्नी व हटस्टार जाना रिलिज याःगु खःसा थ्वहे इलय् एमएक्स प्लेयर नांयागु वेबसाइटय् “आश्रम” नांयागु वेबसिरिजया निगूगु सिजन नं क्यन । थथे “लक्ष्मी” यात हाथ्या बिउवःगु “आश्रम” सिजन टु ” या बजेट स्वीगू करोड भा.रु. खःसा थुकिं निसःगु करोडसिबें अप्वः कमे यानाक्यनसा बीग बजेट“लक्ष्मी”या लाय् च्ययेगू करोड खः । बबी देओलया मेन रोल दुगु “आश्रम” नांयागु वेबसिरीजया निर्देशन भारतया नांजाम्ह फिल्म निर्देशक प्रकाश झा खः । गुम्हेसिनं थ्वसिबें न्हापा “राजनीति”, “आरक्षण”, “गंगाजल” व “अपहरण” लगायत आपालं दुग्यंगु फिल्म दयेके धुंकल । “आश्रम २ ” या हुनिं “लक्ष्मी”यात भचा घाःलाःसां अक्षय कुमारया थ्व फिल्मं मूक्कं १५० करोड दां कमेयाना निर्माताया धुकू धाःसा जायेका बिल । कमाइया ल्याखं थ्व “लक्ष्मी”यात आः तक ओटिटिइ क्यंगु बलिउड फिल्मय् दकले अप्वः कमेयाःगु व अप्वसिनं स्वःगु फिल्ममध्ये छगू कथं कयातःगु दुसाः थ्व “लक्ष्मी” या भ्युज २७ लख सिबें अप्वः थ्यने धुंकलसा थ्वसिबें न्ह्यः सुशान्त सिंहया “दिल बेचारा” या भ्युज २२ लाख थ्यंगु खः धका धयातःगु दु ।

बलिउडया छम्ह इमर्जिङ्ग स्टार कथं बय्बय् जूम्ह सुशान्त सिंहं आकाझाकां आत्महत्या याःगु कारणं “दिल बेचारा” यात कयाः आपालं स्वकुमिया नुगः क्वसाःगु खनेदु। खय्तला ओटिटि ख्यलय् लुडो, खालिपिली, सिरियस माएन,निशब्दम्, गिन्नी वेड्स सन्नी, भुज ः दी प्राइड अफ ईण्डिया, द बीग बस निसें कयाः विद्या वालनया तसकं चर्चित धकाः धयातःगु “शकुन्तलादेवी” नं रिलिज जुल तर चर्चा न्ह्याक्वः जूसां कमाइ धाःसा उलि मजुल । थथे कमाईया ल्याखं लिउने लाःबलय् ओटिटि ख्यलय् फिल्म क्यनिपिनिगु ल्याः म्हो जुयावंगु खः ।

थुगुसी इद व दिवालीइ रिलिज शून्यया अवस्था जुल । तर आः वयाः क्रिसमस व न्यू इयरय् धाःसा शून्य मयाइगु खँ दु। आः चर्चा जुयाच्वं कथं थुगुसी डिसेम्बरय्रि लिज जुइत्यंगु फिल्मय् दकलय्ब य्बय् जुयाच्वंगु फिल्म “कूली नं. वन” खः ।

बलिउडय् आः वयाः थ्व डिसेम्बरय् फिल्म रिलिज यायेगु जुयाच्वंगु दु। विशेष यानाः हिन्दी फिल्मख्यलय् इद, दिवाली, क्रिसमसयात आपाः दर्शक दइगु नखःचखः कथं कयातःगु दु। कोरोना संक्रमणया ग्याःचिकुया कारणं हल बन्द जुयाच्वंगु कारणं थुगुसी छुं नखःया इलय् हिन्दी फिल्म हलय् रिलिज मजुल । विशेष यानाः ईदया इलय् सलमान खान, दिवालीया इलय् शाहरूख खान व क्रिसमसया इलय् आमिर खानया फिल्म रिलिज जुइगु खःसा थुगुसीया क्रिशमसय् आमिर खानया “लालसिंह चड्डा” रिलिज जुइगु खँ दुगु खःसां कोरोनाया कारणं अथे मजुइगु जुल । थुगुसी इद व दिवालीइ रिलिज शून्यया अवस्था जुल । तर आः वयाः क्रिसमस व न्यू इयरय् धाःसा शून्य मयाइगु खँ दु। सन् २०२० या लिपांगु महिना डिसेम्बरय् जूसां छुं छुं हिन्दी फिल्म रिलिज यायेगु तयारी बलिउडय् जुयाच्वंगु दु ।

आः चर्चा जुयाच्वं कथं थुगुसी डिसेम्बरय् रिलिज जुइत्यंगु फिल्मय् दकलय् बय्बय् जुयाच्वंगु फिल्म “कूली नं. वन” खः । बलिउडया नांजाम्ह फिल्म निर्देशक डेभिड धवनया थ्व फिल्मय् वया हे काय् वरुण धवन हिरो जुयाः म्हिताच्वंगु दु। डेभिड धवन छगू इलय् कमेडी फिल्मया बादशाहया रुपय् नांजाःम्ह निर्देशक खःसा स्वर्ग, शोला और शबनम, आँखे , जुडवाँ, हिरो नं वन व कुली नं वन थेंज्याःगु हिट सुपरहिट फिल्म दयेकेधुंकूम्ह खः । “कूली नं वन” न्हापा गोविन्दा हिरो खः । आः थ्व न्हूगु “कूली नं वन” य् थःहे काय् वरुण धवनयात हिरो कथं काःगु दु। वरुण धवन नं बलिउडया लोकंह्वाम्ह हिरो खः । थ्व सिबें न्हापा सलमान खानया डबल रोल दुगु न्हापाया “जुडवाँ” या रिमेक दयेकुबलय् नं वरुण धवनयात हे हिरो काःगु खःसा आः वया “कूली नं वन”या न्हूगु भर्सनय् नं वरुण धवनयात हे हिरो दयेकूगु दु। थुकी सारा अलि खान हिरोइन जुयाः म्हिताच्वंगु दु। थ्व “कूली नं वन”यात थुगुसिया छगू बीग बजेट फिल्म कथं बय्बय् यानातःगु दु। क्रिसमसया इलय् रिलिज जुइगु थ्व फिल्म धाःसा हलय् जक मखसे ओटिटिया डिजिटल ख्यलय् नं रिलिज याइगु जूगु दु। कोरोनाया ग्याचिकुया कारणं हलय् दर्शक वइगु सम्भावना कम जुइफुगुलिं जोखिम म्हो यायेगु लागिं थथे ओटिटिया ग्वाहालि कायेत्यंगु खनेदु। “कूली नं वन”यात भारतलगायत मेमेगु देशया सिनेमा हलया नापनापं अमेनज प्राइमया डिजिटल प्लेटफर्मय् क्यनीगु खँ दु ।

“कूली नं वन” बाहेक डिसेम्बरय् रिलिज जुइगु मेमेगु फिल्म नं सिनेमा हलया नापनापं डिजिटल प्लेटफर्मय् रिलिज याइगु जूगु दु। डिसेम्बरय् पिहां वइगु करिश्मा तन्ना व रिचा चड्डाया “लाहोर कन्फिडेन्सियल” हलया नापनापं जी फाइभय् नं क्यनीसा भुमि पेन्डेकरया “दुर्गामति” नं ओटिटिइ नं क्यनी । हलय् नापं ओटिटिइ क्यनीगु मेमेगु फिल्मय् संजय दत्तया “टोर्बाज” नेटफ्लीक्सय् क्यनीगु ग्वसाः दु। थुकथं ताः ई निसें दिपा कयाच्वंगु बलिउडया बक्स अफिसया झ्याः (बक्स अफिस विन्डो) आः वयाः चालेत्यंगु दु। आः थ्व झ्यालं गुलि जः दुहां वइ अले गज्याःगु जः दुहां वइ धइगु खँ हे बलिउडया निंतिं बक्स अफिसया लँपु क्वछीइ धकाः धायेमा । बलिउडया थ्व पलाः हे नेपाःया निंतिं नं सिनेमा हल चायेकेगु लँपु जुइगु खँय् शंका याये थाय् मदु ।