कोरोनाया इलय् नेवाः फिल्मख्यः

फिल्म बजाःया अमू धइगु बक्स अफिस खः । थ्व बक्स अफिसया सिस्टम नेपालय् धाःसा लागु मजुनि। विश्वया फिल्म बजाःया खँल्हायेगु खःसा बक्स अफिस जिरोया अवस्थाय् लानाच्वंगु दु। गनं बिग बजेटया फिल्म रिलिज जुयाच्वंगु मदु। जनतायात विश्वव्यापि महामारी कोभिड १९ पाखें सुरक्षित याना तयेत देय्न्यंकं जारी याना तःगु लकडाउन खय्त ला यक्वः हे छ्वासुके धुंकूगु दुसा मनूत थःथःगु लजगाय् लिहां वये धुंकुगु दु। तर थनया स्कूल, कलेज लिसेलिसें सिनेमा हल धाःसा चायेकूगु मदुनि । थनजक मखु संसारय् आपालं देय्या स्थिति अथेहे तिनि । उकिं यानाः संसारन्यंकभनं हे न्हून्हूगु फिल्म रिलिज थाति लानाच्वंगु दु। थन नेपालय् नं हल बन्द हे तिनि । थुकिं यानाः खस नेपाली भाषाया फिल्मया नापनापं नेवाः भाय्या फिल्मया क्यनेज्या बांमलाक्क लिच्वः लानाच्वंगु दु ।

रिलिजय् लिच्वः
लकडाउनया औपचारिक आदेश जारी जुइसिबें न्ह्यःनिसें हे सिनेमा हलय् दर्शक वयेगु म्हो जुयावंगु खःसा थ्वहे कारणं सिनेमा हल बन्द याःगु खः । थथे सिनेमा हल बन्द याःबलय् बागबजाःया सिटी म्याक्स हलय् क्यनेगु धकाः क्वःछिनातःगु पूर्णकाजि ज्यापु व अनुज डंगोल जानाः निर्देशन याःगु नेवाः फिल्म ‘हिसिमति’ क्यने मखन । यलया गुण सिनेमाय् क्यने धकाः क्वःछिना तःगु “एकसे एक” नं क्यनेज्या मजुल । बासु शाहीया निर्देशनय् दयेकूगु थ्व फिल्म नांजाःम्ह संगीतकार रत्न बेहोशीयात आर्थिक ग्वाहालि यायेया निंतिं शो जुइत्यंगु खः।

थथे लकडाउन याये सिबें न्ह्यः क्वछिनातःगु नेवाः फिल्मया शो जुइमफुगु खःसा अथेहे तुं प्रदर्शनया तयारीइ थ्यनाच्वंगु निर्दे शक रामकृष्ण खडगीया “कर्म”, अमृतचन्द्र श्रेष्ठया “घोषक”, कलाकारं निर्देशक जूम्ह पल्पसा डंगोलया “ब्याहा यानागु लच्छि मदुनि” व निर्देशक प्रदीप खड्गीया बहुभाषी व बीग बजेट फिल्म “च्वापुफय्” थेंज्याःगु नेवाः फिल्मया ल्यंदनीगु ज्या पूवंकेत ई कयाच्वंगु दु ।

निर्माणय् अन्तिम चरणय् थ्यंका दिनाच्वंगु निर्दे शक राजेन्द्रमान (आर एम) शाक्यया “रश्मी” या सकतां ज्या क्वचाःगु इलय् लाक्क हे लकडाउन शुरु जूबलय् थ्व फिल्मया क्यनेज्याय् लिच्वः लाःगु दु । आशिष्मा नकःमि व राजु महर्जनया कमब्याक फिल्म धकाः धयातःगु “रश्मी” फिल्मय् सुरज व्यञ्जनकारया नं मू भुमिका दु । अथेहेतुं निर्दे शक आर्यम नकःमिया निगू फिल्म “सनाखत” व “लाखेभाजु” नं लकडाउनया कारणं थाति लानाच्वंगु दु ।

निर्माणय् लिच्वः
लकडाउनं यानाः छखे न्ह्यानाच्वंगु ज्या हे दितसा मेखे फिल्मया शुटिंग ज्या नं न्ह्याये मफुत । विशेष यानाः बैशाख महिनायात फिल्म शुटिंगया निंतिं बांलाःगु मौसम कथं काइगु जूगुलिं उकिया लबः कायेगु मति तया च्वंपिं गुलिखे आशांद्याःगु दु । लकडाउनसिबें न्ह्यः हे शुटिंग न्ह्याकूगु “बहिदारबाबु” या शुटिंगयात बांमलाक हे लिच्वः लात । निर्देशक बासु शाहीया छगू महत्वाकांक्षी फिल्मया रुपय् चर्चा यानातःगु थ्व फिल्मय् आपालं नांजाःपिं कलाकारतसें म्हितीगु क्वछिनातःगु खः । बासु शाहीया हे छगू शर्ट फिल्म “लोभं लाभ लाभं विलाप”या ज्या नं छुं ई थातिइ लाःगु खःसा आः वया बल्ल ज्या क्वचायेकूगु दु। अथेहेतुं नेवाः फिल्मख्यःया नांजाम्ह कलाकःमि सुरेन्द्र तुलाधरं ताः ई सुलं च्वने धुंकाः नेवाः फिल्मय् कमब्याक यायेगु तातुनाः दयेकेगु ग्वसाः ग्वःगु “छंगु जिगु माया रतन” या शुटिंग नं लकडाउनया कारणं न्ह्याये मफुतसा आः वया छुं न्हि न्ह्यः तिनि निर्दे शक तुलाधरं “आसकुति” नांयागु छगू फिल्मया शुटिंग शुरु याःगु खःसा थुकिया लिपांगु चरणय् थ्यंजक थ्ंगु इलय् वय्कःया मांया आकाझाकां देहावसान जूबलय् शुटिंगया ज्या दित । निर्देशक सुरेश शाहीं दयेकेगु ग्वसाः ग्वःगु “झीगु कर्म” या ज्या नं न्ह्याये मफुनि ।

शर्ट फिल्म
थौंकन्हय् निर्दे शक सुरेश शाही “वन वे” नांयागु शर्ट फिल्म दयेकेगु ज्याय् लगे जुयाच्वंगु दुसा थ्वहे दुने मोहनीया इलय् लाका सुरेश शाहीं “मोहनी नखः” नांयागु छगू शर्ट फिल्म दयेकाः सार्वजनिक यात । शर्ट फिल्मया हे खँ ल्हायेबलय् धाःसा लकडाउनया ईयात आपासिनं छ्यःगु खनेदत । लकडाउनया ईया सदुपयोग यायेगु झ्वलय् थःथःगु हे छेँय् च्वनाः वा छगू हे थासय् च्वनाः शर्ट फिल्म दयेका क्यंपिंनिगु कुतःयात तारीफ हे यायेमा । थज्याःगु शर्ट फिल्मय् दकलय् न्हापां सागर महर्जनया निर्देशनय् “लकडाउन छेँय् हे बासं” पिदनसा व धुंकाः “समयबजि” या बागःदाईया नामं लोकंह्वाम्ह सुरेन्द्र मानन्धरया निर्दे शनय् निगू शर्ट फिल्म “गुर्जुया मन्त्र” व “मिखा दुपिं कां” अले खस नेपाली भासं “अहिले नभए कहिले” पिदन । अथेहे खसभासं राज महर्जनया “सचेतना” नांयागु शर्ट फिल्म नं पिदन । निर्दे शक यादव भोछीभोयाया “सरस्वति” नं लकडाउनया ईया सदुपयोग कथं तयार जुल ।

लकडाउनया इलय् थीथी सामाजिक सञ्जाल फेसबुक, टिक टक, युट्युबय् आपालं कलाकःमिपिंसं थःथःगु सकृयता क्यन । निर्दे शक जितेन्द्र राजोपाध्यायया निर्देशनय् नेवाः भाय्, खस नेपाली भाय् व तामाङ्ग भाय् नापं यानाः स्वंगू भासं निगू शर्ट फिल्म “किचकन्या” व “आक्रान्त” दयेकाः युट्युबय् सार्वजनिक यात । निर्देशक योबन शाक्यया निर्देशनय् “नयेगु छु” नांयागु छगू शर्ट फिल्म नं थ्वहे लकडाउनया इलय् पिदंगु फिल्म खः ।

मेमेगु खँ
लकडाउनया इलय् थःगु सक्रियता अप्वयेका क्यंम्ह कलाकःमि छम्ह रुपेन्द्र श्रेष्ठ थक्वाः नं खः । रुपेन्द्र श्रेष्ठं थः याकः कलाकार जुयाः छगू हे शर्ट फिल्मय् थीथी बिस्कं भुमिका यानाः क्यन । उलिजक मखसे वय्कःया तिरीमय्जु सरिना बज्राचार्य, म्ह्याय्पिं सिम्रिक श्रेष्ठ व संकिपा श्रेष्ठयात अभिनयया ख्यलय् न्ह्यब्वये हल । थ्वहे लकडाउनया हुनिं किपू नगरपालिकां ग्वसाः ग्वःगु किपू चिहासंकिपा कासा नं लिज्यात ।

लकडाउनया इलय् भर्चुअल रुपं हे जूसां गुलिखे सांगीतिक कासा जुलसा विशेष यानाः लकडाउन छ्वासुके धुंकाः कोरोनाया कहर ल्यना हे च्वंगु इलय् दकलेसकले अप्वः सकृय जूगु कलाकारिताया विधा धइगु म्य्जिक भिडियोया ख्यः खः । थ्व इलय् आपालं आपाः नेवाः म्युजिक भिडियो पिदना च्वंगु दुसा फिल्मख्यलय् ज्या याइपिं आपालं कलाकार, प्राविधिक, निर्देशक, च्वमि, संगीतकःमिपिं म्युजिक भिडियोपाखे सकृय जुयाच्वंगु दु । थुकियात धाःसा सकारात्मक लिच्वः कथं कायेमा ।