सुपरस्टारतय् रिलिज मजुगु फिल्म
फिल्मय् म्हिताः अतिकं लोकंह्वाःपिं स्टारतय्त सुपरस्टार धायेगु चलन दु । विशेष यानाः बलिउड धयातःगु भारतया हिन्दी फिल्मख्यलय् थ्व सुपरस्टार खँग्वः तसकं बय्बय् जू । राजेश खन्नायात बलिउडया न्हापांम्ह सुपरस्टारया रुपय् कयातःगु दुसा लिपांगु इलय् सलमान खान, शाहरूख खान व आमिर खानयात सुपरस्टारया दर्जा बियातःगु दु ।
नीन्यादँ स्वीदँ न्ह्यःनिसें बलिउडय् थःगु न्हाय् धस्वाकेत ताःलाना वयाच्वंपिं सुपरस्टारतय्त कयाः फिल्म दयेकेगु धइगु निर्माता व निर्देशकतय्गु निंतिं तःधंगु खँ खः । थथे सुपरस्टारत दुथ्याःगु फिल्म जुलकी उकी लाय् तइपिं नं यक्व दइ । थथे लाय्तइपिं यक्व दसेंलि इमिगु फिल्मया ज्या नं याउँक हे पूवनेमाःगु खः, अले रिलिज नं जुइमाःगु खः तर गुबलें गुबलें सुपरस्टार म्हितूगु फिल्म नं पूमवने यः । हलय् रिलिज नं मजुइ यः ।
शाहरूख खान
“दिवाना”यात आपाःसिनं शाहरूख खानया न्हापांगु फिल्म धाइ । वयागु रिलिज जूगु न्हापांगु फिल्म ला थ्वहे खत, तर वयात छम्ह हिरो कथं साइन याःगु न्हापांगु फिल्म धाःसा “अहमक” खः । थ्व फिल्म थीथी फिल्म फेस्टिभलय् क्यंगु खः तर हलय् पिलूवये मफुगु फिल्म खः ।
अथेहे तुं कल्पतरु नांयाम्ह निर्देशकं दयेके धाःगु आयशा जुल्का दुगु “किसी से दिल लगाकर देखो”, अले ऐश्वर्या राय व जुही चावला दुगु “रश्क” व “शिखर” नं पूवने मफुगु फिल्म खः । सुभाष घई थेंज्याःम्ह नांजाःम्ह निर्देशकं दयेके धकाः घोषणा याःगु थ्व फिल्मयय् सुभाष घई व शाहरूखया फेवरेट हिरोइन माधुरी दीक्षितयात हिरोइन कथं साइन नं याःगु खः ।
लिपा वनाः थ्वहे नामं मेपिंसं फिल्म दयेकल । शाहरूख खानया रिलिज मजूगु फिल्मय् दकलय् चर्चित फिल्म धइगु “एक्स्ट्रिम सिटी” खः । हलिउडया थ्व प्रोजेक्टय् शाहरूख खानलिसें हलिउड स्टार लियोनार्डो डि क्याप्रियोया नं मेनरोल दइगु धाःगु खःसा थ्व फिल्मयात हलिउडया नांजाःम्ह निर्देशक मार्टिन स्कोर्सिसं दयेके धकाः घोषणा याःगु खः ।
आमिर खान
आमिर खानया “टाइम मेसीन” नांयागु छगू फिल्मया ला शुटिंग तकं न्ह्याःगु खः । हलिउडय्तकं नां कमे यायेत ताःलाःम्ह भारतया फिल्म निर्देशक शेखर कपुरया महत्वाकांक्षी प्रोजेक्ट धकाः बय्बय् याःगु थ्व फिल्मय् रेखा व नसिरुद्धिन शाहया नं मेन रोल दुगु खः । नसिरुद्दिन शाहलिसे फिल्म म्हितेगु तःधंगु इच्छा दु धकाः धयाजूम्ह आमिर खानं थ्व फिल्मया शुटिंग दिउबलय् तसकं नुगः मछिन धाःगु खः ।
लिपा वनाः “सरफरोश” नांयागु फिल्मय् नापं म्हितल । निर्देशक ईन्द्र कुमारं दयेके धकाः ग्वसाः ग्वःगु “रिश्ता” नांयागु छगू फिल्म नं आमिर खानया छगू पूमवंगु फिल्म खः । थ्व फिल्मय् भारतया महानायक धकाः धयातःम्ह अमिताभ बच्चनया नं मेनरोल दइगु खः ।
सलमान खान
सलमान खानया गुलिखे फिल्म थथे रिलिज मजूगु दु । उकी मध्ये छगू फिल्मया नां “बुलन्द” खः । थ्व फिल्मया शुटिंग नेपालय् नं जूगु खः । थ्व फिल्मया हिरोइन सोमी अलि खः । बच्छिं मयाक शुटिंग पूवने धुंकाः नं ध्यबाया अभावं यानाः थ्व फिल्म पूवने मफुत । नेपालय् शुटिंग जूगु इलय् नं शुटिंग युनिट च्वंगु मायालु होटेलया दां पुले मफयाः शुटिंग यायेत हःगु जेनेरटर हे होटेलं कब्जाय् काःगु खः ।
थथे पूमवंगु सलमान खानया मेमेगु फिल्म मध्ये छगू “रणक्षेत्र” नं खः । “मैने प्यार किया” सुपरहिट जुइवं थ्वहे फिल्मया जोडी सलमान व भाग्यश्रीयात कयाः दयेकेगु घोषणा याःगु थ्व फिल्मया शुटिंग हे न्ह्याये मफुत । उगु ईया सुपर डाइरेक्टर धयातःम्ह राजकुमार सन्तोषीं सलमान खानयात कया दयेके धकाः घोषणा याःगु सनी देवल व मीनाक्षी दुगु “दिल हे तुम्हारा” व मनिषा कोइराला दुगु “घेराव” या नं शुटिंग तकं मन्ह्याः ।
हृषिकेश मुखर्जीं बलिउडया न्हापांम्ह सुपरस्टार व वयात त्याकः वःम्ह अमिताभ बच्चन निम्हेसितं हाकनं छक्वः नापं तयाः “सपने अपने अपने” दयेकेगु ग्वसाः ग्वःगु खः तर लिपा वना राजेश खन्ना अमिताभ बच्चनलिसे फिल्म म्हितेत तयार मजूबलय् उगु फिल्मया ज्या न्ह्याये मफुत ।
उगु ईया बीग बजेट फिल्म धकाः बय्बय् याःगु “दस” नांयागु फिल्मया शुटिंग ला न्ह्याःगु खः तर डाइरेक्टर मुकुल एस आनन्द आकाझाकां सीबलय् थ्व फिल्म दित । लिपा थ्वहे नामं मेगु हे फिल्म पिदन । सलमान खानया किजा सोहेल खानं डेब्यु डाइरेक्टरया रुपय् पलाः ल्ह्वंगु फिल्म “राम” या नं शुटिंग मन्ह्याः ।
अथेहे तुं सलमान खानया दिव्या भारती व करिश्मा कपुर दुगु “ऐ मेरे दोस्त”, सुनिल शेट्टी, काजोल व शिल्पा शेट्टी दुगु “चोरी मेरा काम”, रविना टण्डन दुगु “सागर से गहरा प्यार”, संगीता बिजलानि व नगमा दुगु “हायण्डसम”या नं शुटिंग मन्ह्यातसा निर्देशक अनिश बज्मीया हिट फिल्म “नो इण्ट्रि” या सिक्वेलया रुपय् दयेकेत्यंगु “नो इण्ट्रि में इण्ट्रि” या नं शुटिंग न्ह्याये मफुत ।
अनिश बज्मीया हे “आँख मिचौली” अले सलमानलिसे तःगू मछी हिट फिल्म दयेकूम्ह निर्देशक डेविड धवनं सलमानलिसे गोविन्दा व ज्याकी श्राफयात कयाः दयेके धकाः ग्वसाः ग्वःगु “राजु राजा राम” या नं शुटिंग नं मन्ह्यात ।
अमिताभ बच्चन
थौकन्हय् तक नं सुपरस्टार धायेका च्वंपिं खान स्टारसिबें ताः तक फिल्म क्षेत्रय् थःगु न्हाय् धस्वाका वयाच्वंम्ह धयाम्ह अमिताभ बच्चन खः । थ्यंमथ्यं न्यय्दँ तक छम्ह लोकंह्वाःम्ह स्टारया रुपय् न्हाय् धस्वाका वयाच्वंम्ह अमिताभ बच्चन व आमिर खानं दकलय् न्हापांखुसी फिल्मय् म्हितीगु धकाः बय्बय् याःगु थ्व फिल्मया शुटिंग न्ह्याये मफुत ।
अमिताभ बच्चनया शुटिंग न्ह्याये मफुगु फिल्मय् निर्देशक प्रकाश मेहराया “टाइगर”, निर्देशक टिनु आनन्दया “आलिशान” व “शिनाख्त” नं खःसा जे पि दत्ताया “बंधुआ” नं खः । बंधुआ व शिनाखत फिल्मय् अमिताभ बच्चनलिसे माधुरी दीक्षितयात हिरोइन कथं कयातःगु खः ।
निर्देशक सुभाष घइया “देवा” नं अमिताभया शुटिंग न्ह्याये मफुगु फिल्म खःसा निर्देशक राज एन सिप्पीं अमिताभ बच्चन, विनोद खन्ना व शत्रुध्न सिन्हायात कयाः दयेकेगु ग्वसाः ग्वःगु “पत्थर के लोग” या नं शुटिंग जुइ मफुत ।
थथे शुटिंग मजूगु जक मखसे अमिताभ बच्चनया शुटिंगतकं पूवने धुंकूगु “खबरदार”, “जमानत” व “यारी मेरी जिन्दगी” नांयागु फिल्म रिलिज मजू । अले सुपरस्टार राजेश खन्ना व अमिताभ बच्चन नापं म्हितीगु धकाः घोषणा याःगु “सपने अपने अपने” या नं शुटिंग मजुल ।
राजेश खन्ना
बलिउडया न्हापांम्ह सुपरस्टार व वयात त्याकः वःम्ह अमिताभ बच्चन निम्हं नापं म्हितूगु “आनन्द” व “नमक हराम” निगुलिं तसकं लोकंह्वाःगु फिल्म खःसा थ्व निगुलिं फिल्मया निर्देशक हृषिकेश मुखर्जी खः । निगू फिल्म हिट जुइधुंकाः लिपा हृषिकेश मुखर्जीं उपिं निम्हेसित हाकनं छक्वः नापं तयाः “सपने अपने अपने” दयेकेगु ग्वसाः ग्वःगु खः तर लिपा वना राजेश खन्ना अमिताभ बच्चनलिसे फिल्म म्हितेत तयार मजूबलय् उगु फिल्मया ज्या न्ह्याये मफुत ।
राजेश खन्ना व राखीयात कयाः उगु जमानाया नांजाम्ह निर्देशक कमाल आमरोहीं दयेकेगु शुरु याःगु बिग बजेट फिल्म “मजनून” या नं छपु म्ये व भतिचा शुटिंग क्वचाये धुंकाः दित । राजेश खन्नां लिपांगु इलय् थःगु होम प्रोडक्शनय् दयेकूगु “जय शिव शंकर” व “पुलिस के पीछे पुलिस” नांयागु निगुलिं फिल्मया दक्वं शुटिंका क्वचाःसां रिलिज धाःसा जुइमफुगु फिल्म खः ।
लिपांगु इलय् छम्ह क्यारेक्टर स्टारया रुपय् बलिउडय् कमब्याक जुइगु मनंतुनाः निर्देशक राकेश सावन्तलिसे जाना दयेकूगु “हेलो कौन हे ” नं शुटिंग क्वचाःगु फिल्म खः ।
दिलिप कुमार ÷ देव आनन्द
नांजाःम्ह कलाकार दिलिप कुमारं फिल्म निर्देशनय् पलाः न्ह्याकेगु मति तयाः दयेकूगु “कलिंगा” छगू अज्याःगु फिल्म खः गुगु फिल्मया चर्चा उगु इलय् तसकं हे जूगु खः । उगु ईया सुपरस्टार हिरोइन रेखा व दिलिप कुमार नापं म्हितूगु थ्व फिल्मयात बिस्कं हे महत्वं जाःगु फिल्मया रुपय् काःगु खः ।
तर शुटिंग पूवनेधुंकाः नं थ्व फिल्म रिलिज धाःसा मजू । अथेहे तुं उगु जमानाया रोमान्टिक हिरो देव आनन्द व रेखा नापं म्हितीगु धकाः बय्बय् जूगु “अब मेरी बारी” नं मुर्हूत सिबें अप्वः न्ह्यावने मफुत । थ्व फिल्मय् देव आनन्दया फेवरेट टिना मुनिमया निंतिं नंं मेनरोल फ्याना तःगु खः ।
LEAVE YOUR COMMENTS