ने. सं. ११४३ ञलाथ्व चतुर्दशी -

युक्रेनयात बुकाः अस्ट्रिया निगूगु चरणय्, नेदरल्यान्ड नं त्यात

येँ –युक्रेनयात बुकाः अस्ट्रिया युरो कप २०२० या निगूगु चरणय् दुहां वनेत ताःलाःगु दु । सोमवाः बहनी जूगु समूह सीया कासाय् अस्ट्रियां युक्रेनयात १–० गोलं बुकूगु खःसा थ्व हे समूहया मेगु कासाय् नेदरल्यान्डं नर्थ मेसेडोनियायात ३–० गोलं बुकूगु खः ।

समूह सीया अन्तिम कासा लिपा नेदरल्यान्डं स्वंगुलिं कासा त्याकाः ९ अंक सहित शीर्षस्थानय् दुसा अस्ट्रिया निगू कासा त्याःगु व छगू बूगुलिं ६ अंक सहित निगूगु थासय् दु । युक्रेन नेदरल्यान्ड व अस्ट्रियापाखें बूगुलिं स्वंगूगु थासय् लाःगु दु । आः युक्रेन स्वंगूगु थासय् लाःगु उत्कृष्ट प्यंगू टिम दुने लात धाःसा निगूगु चरणय् दुहां वनेत ताःलाइ । युरोय् समूह चरणय् स्वंगूगु थासय् लाःगु उत्कृष्ट प्यंगू टिम नं निगूगु चरणय् वनीगु प्रावधान दु ।

मेखे थ्व समूहय् लाःगु मेसेडोनिया धाःसा फुक्कं कासाय् पराजित जूगु दु । मुक्कं २१ लाख जनसंख्या दुगु मेसेडोनिया थुगुसी न्हापांखुसी युरो कपय् छनोट जूगु खः । मेसेडोनियाया कप्तान गोरान पान्देभं मंगलवाः जूगु थःगु अन्तिम युरो कासा लिपा अन्तर्राष्ट्रिय कासा पाखें संन्यास नं काःगु दु । वयात सकलें कासामिपि व समर्थकपिंसं लापा थानाः बिदा बिउगु खः ।

अस्ट्रियाया विजयया निंतिं कासाया २१ औं मिनेटय् बउमगार्टेनरं छगू जक गोल याःगु खःसा नेदरल्यान्डया निंतिं मेम्फिस डिपाएं छगू व कप्तान विज्नाल्डमं निगू गोल याःगु खः ।