जिदानं रियल म्याड्रिड त्वतल

एजेन्सी- स्पेनिस क्लब रियल म्याड्रिडया प्रशिक्षक जिनेदान जिदानं क्लब त्वःतूगु दु । जिदानं थःगु प्रशिक्षण क्यारियरय् रियल त्वःतूगु थ्व निक्वःगुखुसी खः । थुगुसी जिदानया नेतृत्वय् दुगु रियलं छुं नं उपाधी त्याकेमफुगु खः । ला लिगाया अन्तिम इलय् एथलेटिको म्याड्रिडपाखें लिउने लायेवं रियल उपाधी विमुख जूगु खः । तर ४८ दँया जिदानया न्हापांगु प्रशिक्षणया इलय् धाःसा रियलं लगातार स्वक्वः तक च्याम्पियन्स लिग त्याकूगु खः । थ्व लिपा क्लब त्वःतावंम्ह जिदान झिला लिपा हाकनं रियलय् वःगु खः । रियलय् वयेवं जिदानया नेतृत्वय् ला लिगा त्याकूगु खः ।

सन् २००९–१०या सिजन लिपा रियल थ्व सिजनय् न्हापांखुसी उपाधिविहिन जूगु खः । जिदानया नेतृत्वय् दुगु रियल कोपा डे रे य् थर्ड डिभिजनया क्लब अल्कोयानो पाखें पराजित जुइवं सुरुया चरणं हे पिने लाःगु खःसा च्याम्पियन्स लिगया सेमिफाइनलय् चेल्सीपाखें पराजित जूगु खः ।

छुं न्हि तक जिदानं रियल त्वःतीगु खबरया खण्डन याना वयाच्वंगु खः । तर मेगु दछि तक सम्झौता दनिसां म्हिगः जिदानं आकाझाकां रियल त्वःतेगु घोषणा याःगु खः ।

जिदान झ्वलाक च्याम्पियन्स लिग स्वक्वःतक त्याकूम्ह छम्हंया छम्ह जक प्रशिक्षक खः । जिदानया हे नेतृत्वय् रियलं निगू ला लिगा, निगू क्लब वल्र्ड कप, निगू युइएफए सुपर कप व निगू स्पेनिस सुपर कप त्याकूगु दु ।