बेल्जियम व स्वीडेन विजयी

एजेन्सी- रोमेलु लुकाकुया निगू गोलया ग्वाहालिं पानामायात ३–० गोलं बुकुसें बेल्जियमं थुगु विश्वकपया छगू बांलाःगु टिम जूगु प्रमाणित यानाक्यंगु दु । न्हापांगु हाफ गोलरहित बराबरीइ क्वचाःसां निगूगु हाफ सुरु जूगु छुं ई लिपा हे ड्रिज मेर्टेन्सं १५ यार्ड तापाकं भली थ्वासें न्हापांगु गोल याःगु खः ।

थ्वयां छुं ई लिपा हे विश्व वरियताय् ५५ नम्बरय् लानाच्वंगु व विश्वकपय् थुगुसी तिनि डेब्यु याःगु पानामाया माइकल मुरिलों बराबरी यायेगु कुतः याःगु खः, तर बेल्जियमया गोलकिपर थिबाउट कोर्टोइसं पनाबिल । कासाया ६९ औं मिनेटय् म्यानचेस्टर युनाइटेडया स्ट्राइकर लुकाकुं केभिन डे बु्रएनया पासय् हेड गोल यासें निगू गोलं अग्रता बिल । थ्वयां ६ मिनेट लिपा हे लुकाकु चेल्सीया इडेन हाजार्डया पासय् मेगु छगू गोल यात ।
विश्व वरियताय् स्वंगूगु थासय् लानाच्वंगु बेल्जियमं आः वइगु शनिवाः ट्युनिसिया लिसे न्हापांगु चरणया मेगु कासा म्हिती ।

मेखे थ्वयां न्ह्यव जूगु मेगु कासाय् स्वीडेनं दक्षिण कोरियायात १–० गोलं बुकूगु दु । झिंनिदँ लिपा विश्वकपय् हाकनं लिहां वंगु स्वीडेनया विजयया निंतिं धाःसा भिडियो एसिस्टेन्ट रेफ्री (भार) प्रविधिं ग्वाहालि यात ।

दक्षिण कोरियाया किम मिन उं स्वीडेनया भिक्टर क्लेसनयात डिबक्सय् फल तःगुयात भार प्रविधिं स्वयेधुंकाः स्वीडेनयात पेनाल्टिया ह्वःताः बिउगु दु । कासाया ६५ औं मिनेटय् स्वीडेनया कप्तान आन्द्रिएस ग्रान्क्वेभेस्टं पेनाल्टि पाखें याःगु छगू जक गोलं दक्षिण कोरिया पराजित जूगु खः । समूह एफय् आः स्वीडेन मेक्सिको लिसें ३–३ अंक कयाः शीर्षस्थानय् दु ।