नगरकोटय् जिगु क्वाःनाखं मिंनःगु छेँ

चान्हसिया १ः३० ताः जुइधुंकल । याउँक द्यने मन दयां नं न्ह्यः वःगु मखु । मिखा ध्वाखा थें चाः । उकिसनं तांन्वःगु उलि हे । झ्याः नं चाः, पंखा नं हुनुनुनु सः वः । पत्तिं न्याइ धकाः झुले दुने जि, अय्नं न्ह्यः वःगु हे मखु । खातां कुहां वया, झ्यालं पिने स्वया । चान्हय् खिउँगु बाहेकं छु हे खने दइ धकाः । मिखां न्ह्याये दुथाय् तक खिउँसे ।

वा नं वयाच्वंगु दु । गनं गनं छेँय् क्वथाय् पिलिपिलि मत च्याः । सकलें याउँक सल मियाः द्यनाच्वं थें ! जि धाःसा द्यने हे फुगु मदु । ईलिसेंं जिगु विचाः नं नापनापं चाःहिलाच्वन, गनं मथ्यनीकथं । द्यनेगु कुतः यानाः अझं न्ह्यः वयेके हे फुगु मखु । झन् न्ह्यपुइ पुलांगु खँत स्वचाना वयाच्वन । आखिरय् प्यताः ई जुल ।

यायेमाःगु कर्म याना, ख्वाः सिला । लः छगू गिलास दयेकाः हर्लिक्स दयेकाः त्वना । ७ः३० ताः इलय् ख्वपया सूर्यविनायक थ्यंकेमानि । पासा राजेनयात नापं वनेत त्रिपुरेश्वरय् पियाच्वनेत धयागु । उकिं मोबाइलय् घन्टी न्यायेका छ्वया । तप्यंक सूर्यविनायक थ्यंकः वनेगु आशं थःत माःगु सामान ज्वनाः सोल्टी मोडय् साझा बस पियाच्वना ।

व वःगु दिउगु मखुनि । सोल्टीं पासायात फोन यानागु व ला त्रिपुरेश्वर थ्यने धुंकल ।निन्हुतक दिपाः हे मकासे वःगु वां बागमतिं नं थःगु क्यने फक्व शक्ति क्यनाच्वन । मेपिनिगु निंतिं थ्व राजधानी, तर थनया घाः सुनां सिउ । छेँखाछेँखाय् लः दुहां वयाः बेहाल । देशय् च्वंपिं दक्व थन हे च्वं वयेमाःगु ।

अले खुसिया लँ पनाः छेँ दना हसेंलि वं जक गुलि सह यानाः च्वनी । क्यनाबिल वं नं थःगु शक्ति । निन्हु तक वःगु वा उकिसनं शनिवाः जूगुलिं लँय् मनूजक मखु सवारी साधन नं उस्त जू मदु । साझा बस पियाच्वनाम्ह जि घौछि तक नं मवयेवं मेगु हे बस गयाः तिंख्यः त्वपुनाः दयेकातःगु घारांघुरं बसपार्कय् थ्यंका ।

राजेन, दिब्या ताम्राकार व विमलप्रभा नं नापलात । प्यम्हं छगः बसय् च्वनाः ख्वपपाखे स्वयाः वन । ८ ताः इलय् सूर्यविनायक थ्यन । जिपिं थ्यंगु कृष्णभक्त बोडेयात जानकारी बिया । पलखं माणिक उराय दाजु थ्यंकः वल । बसय् थहां वना, सकलें मथ्यंनि खनी, दुपिं सकलें म्हसिउपिं हे जक ।

सकसितं ज्वज्वलपा यासें थःगु थाय् सुरक्षित याना । बसय् दुपिं सकलें ख्याः याये म्वाःपिं जूसां तिं धाःलकि तां धाइपिं हे ! न्हिलेत त्वहः जक माः । खिचाः न्हिप्यं जक संकूसां न्हिलीपिं धाःथें । उकिसनं न्हिलेत त्वहः दयेक महेशमान दाजुं म्हुतुइ लः तइगुु, ल्ह्वइगु । थ्व क्रम निक्वः प्यक्वः जुल । छगू त्वहः दत, अले छु जिउगु नं धाल, मधायेमाःगु नं धाल ।

सकलें ह्वार्रर न्हिल । सकलें नापं वनेगुया मज्जा हे खः थ्व ।न्हिछियंकं जुइगु छगू साहित्यिक ज्याझ्वलय् ब्वति कायेत नगरकोट वनेत्यनापिं जिपिं । ख्वपया याताजःया ग्वसालय् न्हुछेभक्त कवांया ‘क्वाःनाखं मिं नःगु छेँ’ बाखं सफू पितब्वज्या व चिबाखं बारे गोष्ठि ज्याझ्वः । न्हापा नं उकथं ज्याझ्वः जूसां जिं न्हापांखुसी ब्वति कयाच्वनागु ।

नगरकोट मथ्यंगु नं तःदँ हे दत । निन्हुतक वा वःगुलिं वयेधाःपिं नं मथ्यंगु जुयाच्वन । बसय् मुक्कं २९ म्ह जक । राजेन्द्र रंजित व अमीरमैयां स्कुटरं वइगु जुइवं बस न्ह्यात । न्यादँ खुदँ न्ह्यः नगरकोटया लमुन्तिं जितः घय्पू वल । थौं जि क्यामरा ज्वना मवँसे लकस बांलाःसा मोबाइल जिन्दावाद धकाः वनाम्ह ।

उकिसनं साहित्यिक ज्याझ्वलय् चाःहिलेगु जुइमखु । म्हुतुइ धौ फिना च्वने मफुम्ह जि यात्राज्वःछि राजेननाप उगुंथुगुं खँ ल्हाल्हां वनाच्वना । पौने दश बजे नगरकोट दुवातय् थ्यन । लँ स्यंगुलिं ज्याझ्वः जुइगु थासय्तक न्यासि हे वनेमाःगु जुल । बसं कुहां वया खतं सकलें होटल प्याराडाइजं जिमित पियाच्वन लसकुस यायेत ।

सुथसिया कौला सिधलं नं ज्याझ्वः न्ह्याःगु मखुनि । दँ दापा जुयाः मूपाहां प्रा. नर्मदेश्वर प्रधान लिबाक थ्यन । सवा ११ बजे ज्याझ्वः न्ह्यात । याताजःया औपचारिक म्हसीका बियाः कृष्णभक्त बोडें ज्याझ्वः न्ह्याकादिल । लक्ष्मण राजवंशीं कवांया बाखं सपूm पितब्वज्या यानादि । च्वमिं सपूmया शीर्षकया हे छपु बाखं न्यंकादिल ।

बाखं ख्वप भासं हे च्वयातःगु नेवाः समाजया बारे । बाखं सिधयेकाः राजवंशीं समीक्षा यानादिल । चान्हय् बांलाक द्यने मखंगुलिं ताःहाकः नवानाच्वंगु न्यनेगु धैर्यता मंत । ज्याझ्वः जुयाच्वंगु थासं न्ह्यः छले यायेत पिहां वनाः, तर उकिया लबः कायेकथं छुं छुं सुलाच्वंगु दृश्ययात कैद यायेगु लोभ जुल । बुलुहुं निम्ह प्यम्ह यायां च्याम्ह झिम्ह हे कःसिइ थ्यन ।

कःसिइ थ्यनेवं न्ह्यइपुगु लकस खनेदत । सर्गतय् ब्वयाच्वंगु खसु थः प्रियतम नाप लायेत मछाः पहलं वनाच्वंथें, पलखं हे खसु चिला वनाः खने दयाच्वंगु लिउनेया लु । आः धाःसा जितः बेकारय् क्यामरा ज्वना मवयागु थें जुल । मोबाइलं हे इच्छा पूवंकेत भिडियो कयाः, अले सेल्फी नं ।ज्याझ्वःया न्हापांगु ब्व क्वचाःबलय् १ः३० ताः जुइधुंकल ।

ज्योनां यायेत सकलें पिने टेबुल न्ह्यःने पिपिउँ न्ह्यइपुक खँ ल्हानाच्वन । ज्योनां सिधयेकाः प्यतँय् च्वंगु हलय् वना । निगूगु ब्वया ज्याझ्वः न्ह्यात । प्रा. नर्मदेश्वरजुं ज्यापौ न्ह्यब्वयादिल । अनंलि ज्यापती न्ह्यथनातःकथं चिबाखं वा बाखं धइगु गथे जुइमाः धइगु विषयय् अन्तक्र्रिया जुल । थःथःगु विचाः तयेगु क्रम न्ह्यानाच्वन ।

अन वःगु विचाः न्यनाः मती वल । आतक थथे नियमय् च्वनाः मच्वयानि । च्वयेगु धइगु ला थःगु भाव ब्वयेगु खःनि गथे यानाः नियमय् च्वनाः च्वयेगु ? जिं ला च्वयेमखु । थथे मनय् खँ वायेकाःतुं च्वना । सवा ४ जूबलय् ज्याझ्वः सिधल । कुहां वयाः । समय्बजि व उकियात माःगु पालुगु नं व्यवस्था दुगु जुयाच्वन ।

ज्याझ्वः सिधयेवं सकलें च्वनाः किपा कायेगु मनसुवाः पूमवनेवं होटलया स्वाहानेय् हे च्वनाः थ्वःचा थ्वःचा मुनाः किपा कयाच्वन । सकलें बसपाखे न्ह्याः वन । सवा ५ बजे बस न्ह्यात । याकनं कमलविनायक थ्यनीगु लँपु धकाः गबलें मवनानिगु आर्मी क्याम्प, टावर वनेगु लँपु जिगु निंतिं न्हूगु लकस जुल ।

मिखा फुति यातकि अनया दृश्यं बञ्चित जुइगु लोभं मिखा फुति हे मयासे वया । वँचुगु पहाडया दृश्यं जितः साप हे आर्कषित यात, जिं राजेनयात धया, ‘झीगु छेँया कःसिं स्वयेबलय् नं थथे खने दयेमाःगु खःनि । हला !’ पासा राजेनं लिसः बिल, ‘ झीथाय्या लकस प्रदूषणं जाल, उकिं थज्याःगु लु स्वयेत स्वनिगलं तापाक हे वयेमाः ।’ खःगु हे धाल ।

बस न्ह्याना हे च्वन । लँ सिथय् ल्यहें पुयाच्वंथें खने दुगु बुँइ झ्वःलिक्क वा पिनातये धुंकल । व दृश्य खनाः जितः ख्वना लुमना वल । नगरकोट वनाः पूवंकेमखंगु वा पिनातःगु लुया किपा ख्वनाय् वनाः कायेगु मतीं नुगः लुधंका, थ्व हे संकल्प यानाः वया । ल्हासापाक्व ससुमाजुयाथाय वने धाःगु ला थाय् पुलाः वये धुंकल खनी ।

सकलें आशां द्यात । ‘पालगु भचा कुहां वंगु मगाःगुलिं लँपु सिउम्हं थाय् दापा जुल का’ छम्हेसिनं धयाहल । सकलें ह्वार्रर न्हिलाहल । बहनि हाकनं कालिमाति फ्रेन्डस् क्लबपाखें झ्वःभ्वय्या ग्वसाः ग्वयातःगु लुमन । वयेधकाः मवनकि तं चायेयः । लिबाइ छु याये धकाः फोन छकःनि याना । ‘न्ह्यागु ई जूसां जिउ वा’ धयाहल । ‘हस्’ धकाः फोन दिका ।

सूर्यविनायक थ्यंबलय् ६ः३० जुल । अनं रत्नपार्क वनीगु बसय् च्वनाः कालिमाति थ्यंबलय् ८ बजे जुइधुंकल । तुच्चा जक यानाः लिहां वनेगु जिगु विचाःयात रविदास व विवेकं त्वाःथला बिल । भ्वय् नयाः लिहां वना । शनिवाः चान्हसिया १ः३० बजे शुरु जूगु जिगु बहनि १० बजे छेँय् थ्यंकाः क्वचाल ।न्हिछिया खँ कुत्तुकुला च्वँच्वं गबलय् भ्वसुक न्ह्यःवल वाः हे मचाल ।

सम्बन्धित बुखँ

LEAVE YOUR COMMENTS