संक्रमणं बचे जुइगु उपाय

नखः चखः न्ह्यःने वयाच्वंगु दु। वंगु गथांमुगः चःह्रे निसें नेवाः समाज जात्रामय जुइधुंकूगु दु। त्वाः त्वालय् वन धाःसा धिमे बाजंया प्रशिक्षण जुयाच्वंगु नं सः ताये दयाच्वंगु दु। गथांमुगः चःह्रे, गुंपुन्हि, सापारु, यँयाः जात्रानापं जःखः माने याइगु थीथी नखःचखःया इलय् झी थीथी बाजं थानाः देय्चाः हिलीपिं खः । थ्व इलय् स्वनिगः व स्वनिगलं पिने कोरोना भाइरस (कोभिड-१९) या ग्याःचिकु नं उलि हे अप्वया वनाच्वंगु दु। छन्हुं हे बासःम्ह धइथें मनूतय्त संक्रमित जूगु धइगु स्वनिगः तक नं कोभिड-१९ या जोखिमपाखें मुक्त मजू धइगुया प्रमाण खः । थ्व हे कारणं ख्वप नगरपालिकां थुगुसी सापारु थेंज्याःगु ख्वपय् विशेषकथं हनीगु मौलिक नखः न्हापा न्हापा थें तसकं तामझामपूर्वक महँसे बाध्यतायात तरे यायेगु व परम्परायात कायम याना तयेथें जक ताहासा दयेकाः सुथय् न्हापां हे देय् चाःहिइकाः क्वचायेकेत इनाप याःगु दु। न्हापा न्हापा ख्वप नगरपालिकां घिन्तांघिसियात कयाः सिरपाः बीगु खः । थीथी आधुनिक व सांस्कृतिक बाजं व प्याखंयात कासाकथं दुथ्याकाः मूल्यांकन यानाः थीथी कथंया सिरपाः नं ब्यवस्था यानातःगु खः । तर थुगुसी अथे छुं नं कथंया गतिविधि मयायेत व बाजं प्याखं पिथनाः हुलमुल मयायेत ख्वप नगरपालिकां सकल नगरवासीयात इनाप याःगु दु ।

विश्वब्यापी रुपं प्रभावित यानाच्वंगु नापं विश्वय् न्यागू–खुगू लाखया ल्याखं मनूतय् ज्यान कायेधुंकूगु ग्यानापुगु सरुवा रोग नोबल कोरोना भाइरस (कोभिड-१९) पाखें बचे जुइत सामाजिक दूरी कायम यायेमाःगु, माक्स तयाः जुइगु व फयांफछि आपालं मनूत मुनेगु ज्या मयायेत इनाप यानाच्वंगु थ्व इलय् थुकथं थीथी कथंया नखः हनेगु नं सम्भव मंत । कोरोनाया भयावहया कारणं थुगुसी ख्वपया तःजिगु जात्रा बिस्काः नं ध्याकुनय्लाः वन । गथांमुगः चःह्रे नं खःथें जक हन । अथे जुयाः आः छवाःयंकं हनीगु सापारु नं थुकथं खःथें च्वंक जक हनेत नगर प्रमुखं इनाप यानाच्वंगु खः । थुकिया फाइदा समग्र जनताया जीवनय् लाइगु कारणं नं बाध्यतावश थ्व इनाप यानाच्वंगु खः । मखु धइगु जूसा संस्कृति व भाषाया लागाय् लखौंलख, करोडौं करोड बजेट फ्यानाः सांस्कृतिक नगरया अनुभूति याकेत स्वयाच्वंगु ख्वप नगरं थज्याःगु थःपिनि उद्देश्य अःखः निर्णय याइमखु जुइ । नापं थ्व इलय् त्वाः त्वालय् व बजाः बजारय् वनाः जनतायात उकथं ‘कन्भिन्स’ यायेगु व प्रचार सामग्रीपाखें प्रचार यायेगु ज्यात मयाइगु खइ ।

कोरोना भाइरसं प्रभावित मयागु लागा धइगु थौं छुं हे मदये धुंकल । शिक्षा, स्वास्थ्य, रोजगार, यातायात, व्यापार, व्यवसाय, जात्रापर्व, नखःचखःलिसें विश्वया हरेक क्षेत्रय् कोरोनां प्रभावित याःगु दु। नेवाःतय् सांस्कृतिक क्षेत्र नं थुकिं अलग जुइ फयाच्वंगु मदु। बुंगःद्यःया जात्रा थजु वा बिस्काः जात्रा, कायमचा नखः धयातःगु गथामुगः चःह्रे थजु या सापारु फुक्कं जात्रा पर्व थुकिं प्रभावित जुयाच्वंगु दु। उकिं नं थ्व इलय् छु खँयात महत्व बीगु धइगु तिफ्याये फयेकेमाःगु अवस्था वःगु दु। बन्दाबन्दीया कारणं तसकं असन्तुष्ट जुयाच्वंपिं मनूतय्त हाकनं बन्दाबन्दी (लकडाउन) तयेगु नं पाय्छि मखुथें जुयाच्वंगु दु। आःया संक्रमणया अवस्था व रोग न्यनाच्वंगु स्थितियात स्वयेगु खःसा लकडाउन जक मखु कि थन ला कर्फ्यू कफ्र्यू जारी यानाः फुक्कं चीजयात निषेधित यायेमाःगु अवस्था दु। गुलिं जिल्ला व नगरं अज्याःगु नीति नं लागू यानाच्वंगु दु। तर राजधानी देय्या नुगःचु थेंज्याःगु सवेदनशील थासय् थथे यायेगु धइगु नं उचित पलाः मखु। उकिं नं थौं झी संक्रमणं बचे जुइगु थीथी उपायत नालाः उकियात पूवंक पालना यायेगु हे दकलय् बांलाःगु बुद्धिमानी उपाय जुयाबिउगु दु ।

बन्दाबन्दीया कारणं तसकं असन्तुष्ट जुयाच्वंपिं मनूतय्त हाकनं बन्दाबन्दी (लकडाउन) तयेगु नं पाय्छि मखुथें जुयाच्वंगु दु। आःया संक्रमणया अवस्था व रोग न्यनाच्वंगु स्थितियात स्वयेगु खःसा लकडाउन जक मखु कि थन ला कर्फ्यू जारी यानाः फुक्कं चीजयात निषेधित यायेमाःगु अवस्था दु ।

सरकारं यातायात चले याःसां उकी जायेक मनू तयेगु स्थिति मदु। थिकेक टिकट न्यानाः यात्रा यायेमाःगु अवस्था दु। उद्योग, कलकारखाना चले याःसां गाक्कं चले याये फयाच्वंगु मदुनि । संचार माध्यम खुले जूसां न्हापा दुपिं पत्रकारतय्त उचित रुपं ज्याला मबिउगु जक मखु गुलिं पत्रकारत थःपिनि न्हापाया ज्याय् लिहां वनेफुगु स्थिति मदुनि । थ्व संकट हरेक लागाय् दु। पर्यटन क्षेत्र, सार्वजनिक यातायात, बजाः फुक्कं हे कोरोना भाइरसया कारणं प्रभावित जूगु जुलं तिनि । उकिं थ्व ई संक्रमण म्हो जूगु मखु कि झी थः सचेत जुइ मफुत धाःसा संक्रमण महामारीया रुप न्यनेफुगु ई तिनि धइगु वाः चायेके मालाच्वंगु दु। कोरोना भाइरस न्यनी धइगु ग्याःचिकु सकभनं दुगु कारणं बजाः चले यायेत थाकुयाच्वंगु दु। नापं चायेकल धाःसां न्यायेत वइपिं नं ग्यानाः च्वनेमाःगु ई वयाच्वंगु दु। थ्वहे कारणं झीसं आः नं थःपिनि लजगाः बांलाक याये मफयाच्वंगु खः ।

सरकारं लकडाउन चायेकूगु मिले मजूगु खँ ला थःगु थासय् दु । छुं जुयाः हाकनं लकडाउन यात धाःसां उकियात उल्लंघन याइगु ग्यारेन्टी दु। थज्याःगु अवस्थाय् थःपिं हे सचेत जुयाः पिने वने मालीगु अवस्थाय् अनिवार्य माक्स व पंजाया प्रयोग यायेगु, छुं सामान थिल वा सुंनाप च्वने माःगु इलय् माक्स तयाः स्यानिटाइजर प्रयोग यात धाःसां छुं भचा जूसां सहज जुइफु। तर थ्व बचे जुइगु अचूक उपाय धाःसा मखु ।

बचे जुइगु मू उपाय धइगु ला छेँय्नं पिने मवनेगु हे खः । वने हे माल धाःसां नं विश्व स्वास्थ्य संगठनं पित हयाच्वंगु स्वास्थ्य सुरक्षा मापदण्डया थीथी प्रावधानत पूवंकेमाः । फुसा अलग वसः फिना हे जक वने फयेकेमाः । मफुत धाःसा पिने वना वये धुनेवं छेँय् थ्यंकाः उगु वसः हिलाछ्वयेमाः । थुलि जक याये फत धाःसां नं पिने वना वःपिंसं छेँय् कोरोनाया जीवाणु यंके मफइगु व दुने च्वंपिंत संक्रमण मजुइगु जुइफु ।

ख ला पिने मवनेगु हे कोरोनापाखें बचे जुइगु दकलय् दंगु व दकलय् महत्वपूर्ण उपाय खः । झी थःगु ज्याय् वनेगु इलय् नं सतक, बस व  कुथिइ नं उलि हे सतर्क जुयाः ज्या यायेगु व थःपिंत छुं नं कथंया संक्रमणया लक्षण खने दत धाःसा उकिं बचे जुइत याकनं चिकित्सकया सम्पर्कय् वयेगु यायेमाः । मखुत धाःसा थौं स्वनिगः दुने हे आपालं थासय् अघोषित बन्दाबन्दी याये माःथे कन्हय् शिक्षा, स्वास्थ्य, यातायात, कलकारखाना नापं फुक्कं लागाय् हे कोभिड-१९ या प्रभावया कारणं हाकनं बन्द याये मालीगु अवस्था मवइ धाये फइमखु ।

सम्बन्धित बुखँ

LEAVE YOUR COMMENTS