इजरायलय् संसदीय चुनाव

इजरायलया संसदया निंतिं मंगलवाः मतदान जूगु दु । प्रधानमन्त्री बेन्जामिन नेतान्याहुया सरकार अल्पमतय् लोवं इजरायलय् दछिया दुने हे निक्वःखुसी संसदीय आमनिर्वाचन जूगु खः । इजरायलया इतिहासय् दकलय् ताःई तक नेतान्याहु प्रधानमन्त्री जुयाच्वनादीगु दु । भ्रष्टाचार व प्यालेस्टाइन मामिलाय् विवादय् लानाच्वंम्ह प्रधानमन्त्री नेतान्याहु थुगु चुनावय् नं थः त्याइगु विश्वासय् दु, तर चुनाव न्ह्यव जूगु मत सर्वेक्षणय् धाःसा वय्कःया पार्टी पूर्ण बहुमत हइगु सम्भावना धाःसा म्हो जक दु ।

थुगु चुनावय् प्रधानमन्त्री नेतान्याहुया लिकुड पार्टी व अवकाशप्राप्त सैनिक प्रमुख बेन्नी गान्जया नेतृत्व दुगु ब्लु एण्ड ह्वाइट पार्टी दथुइ कडा प्रतिस्पर्धा जुयाच्वंगु दु । निगुलिं पार्टीं एकल बहुमतया सरकार दयेके मफइगु सम्भावना दुगुलिं चिचिधंगु दलतलिसे गठबन्धन दयेकेगु कुतः जुयाच्वंगु दु । थ्वयां न्ह्यव वंगु अप्रिलय् नं संसदीय चुनाव जूगु खः ।

उगु चुनावय् प्रधानमन्त्री नेतान्याहुया लिकुड पार्टी संसदया तःधंगु दल जुइत ताःलाःगु खःसां पूवंक बहुमत हयेत धाःसा असफल जूगु खः । उबलय् चिधंगु दललिसे जानाः नेतान्याहुं सरकार दयेकूगु खः ।

उबलय् गठबन्धनया अभिगडोर लिबरम्यानया पार्टीं सरकारय् च्वनेत अस्वीकार यायेवं नेतान्याहुं हाकनं चुनावया घोषणा यानादीगु खः । थ्व चुनावया लिच्वः नं न्हापा स्वयां फरक वइगु खनेमदुसा लिबरम्यानया पार्टीया हे न्हूगु सरकार गठनय् मू भूमिका जुइगु खनेदयाच्वंगु दु ।