ट्रम्पं हाकनं चुनाव ल्वाइगु

अमेरिकी राष्ट्रपति डोनाल्ड ट्रम्पं राष्ट्रपतिया निक्वःगु कार्यकालया निंतिं नं चुनाव ल्वायेगु घोषणा यानादीगु दु । ट्रम्पं वइगु चुनावया निंतिं आधिकारिक रुपं हे चुनाव प्रचार अभियानया सुरु नं याःगु दु । सन् २०२० य् जुइगु राष्ट्रपतिय चुनावया निंतिं औपचारिक अभियानया सुरुवात यासें ट्रम्पं फ्लोरिडाय् जूगु छगू ¥यालीं सम्बोधन नं याःगु खः ।

वय्कलं फ्लोरिडा राज्य थःगु ‘निगूगु छेँ’ खः धासें समर्थकतय्त मेगु प्यदँया कार्यकालया निंतिं छप्पँ जुइत इनाप यानादीगु खः । थ्व झ्वलय् ट्रम्पं विपक्षी डेमोक्र्याटिक पार्टीया आलोचना यासें उमिसं देय्यात कुचा कुचा थलेत्यंगु द्वपं बियादीगु खः । प्रारम्भिक मत सर्वेक्षण कथं ट्रम्प निक्वःगु कार्यकालया चुनावया निंतिं धाःसा डेमोक्र्याटस स्वयां लिउने लानाच्वंगु क्यनाच्वंगु दु ।

वय्कलं वइगु चुनावया निंतिं अभियान न्ह्याकेगु झ्वलय् ‘अमेरिका फस्ट’ धयागु नारायात हे हाकनं न्ह्यःने हःगु दु । मेखे ट्रम्पं आप्रवासीतय् बारे कडा छवि धाःसा कायम हे यानातःगु दु । सोमवाः नं छगू ट्विट यासें ट्रम्पं अमेरिकाय् सुचिकृत मदुपिं आप्रवासीत गुलि याकनं अमेरिका वइ, उलि हे याकनं देश निकाला नं याना छ्वयेगुजुइ धकाः ख्याच्वः बिउगु दु ।