कोरोना संक्रमित छगू करोड, नेपालय् १२,७७२ थ्यन

येँ – विश्वन्यंकं कोरोना भाइरस संक्रमण जूपिनि ल्याः १ करोड स्वयां अप्वः थ्यंगु दु । जोन्स हप्किन्स विश्वविद्यालयं पितबीगु लिपांगु विवरण कथं विश्वय् कोरोना संक्रमिततय् ल्याः १ करोडं अप्वःगु दुसा सीपिनि ल्याः न्यागू लाखं थहां वंगु दु । अथे हे ५० लाख संक्रमितत सफल उपचार लिपा अस्पतालं डिस्चार्ज जूगु दु ।

कोरोनां सक्रमणं दकलय् अप्वः अमेरिकाय् लिच्वः लाकूगु दु । थन जक छगू लाख २५ हजारं मल्याक मनूत ज्यान वनेधुंकूगु दुसा २५ लाख १० हजारं मल्याक मनूतय्त संक्रमण जूगु दु । अमेरिका धुंकाः ब्राजिलय् दकलय् अप्वः संक्रमण खनेदुगु दु । थन १३ लाख १४ हजार मनूतय्त कोरोना संक्रमण खनेदयेधुंकूगु दुसा ५७ हजार म्हेसिया ज्यान वनेधुंकूगु दु । अथेहे रुसं ६ लाख २५ हजारं मल्याक व भारतय् ५ लाखं मल्याक मनूतय्त संक्रमण खनेदयेधुंकूगु दु ।

नेपालय् आइतवाः सनिलय् तकया दुने कोरोना संक्रमितत ल्याः १२ हजार ७७२ म्ह थ्यंगु दु । आइतवाः न्हिछिया दुने ४६३ म्हेसित थप संक्रमण खनेदुगु खः । नेपालय् संक्रमित जूपिं मध्य् २८ म्हेसिया ज्यान वनेधुंकूगु दुसा ३०१३ म्ह उपचार लिपा लिहां वनेधुंकूगु दु ।