सामाजिक सञ्जालय् जाली एकाउन्ट दयेकाः चीनया बखान

एजेन्सी- सामाजिक सञ्जालय् ३५० सिबें अप्वः एकाउन्ट दयेकाः चीनया बखान यानाच्वंगु व चिनियाँ सरकारया विरोधीतय्त बदनाम यानाच्वंगु छगू अनुसन्धानं सीदुगु दु ।

सेन्टर फर इन्फरमेशन रिजिलीअन्स (सीआइआर) नांयागु संस्थां पिकाःगु प्रतिवेदनय् सामाजिक सञ्जालय् जाली एकाउन्ट दयेकाः चीनया प्रभाव व छवि बांलाकेगु व पश्चिमी देय्तय्गु विश्वनियता म्हो यायेगु यानाच्वंगु धयातःगु दु । बिबिसीं बिउगु जानकारीकथं प्रतिवेदनय् सामाजिक सञ्जालय् जाली एकाउन्ट दयेकाः चिनियाँ आलोचकतय्त बदनाम याइगु कार्टुनत पोष्ट यानाच्वंगु खँ नं न्ह्यथनातःगु दु । अथे हे थीथी विवादास्पद मनूतय्गु कार्टुन नं पोष्ट यानातःगु दु ।

सामाजिक सञ्जाल ट्विटर, फेसबुक, इस्टाग्राम व युट्यबय् दयेकातःगु जाली एकाउन्टय् आर्टिफिसियल इन्टलिजेन्सं (एआइ) दयेकातःगु किपा तयातःगु दु । ट्विटर, फेसबुक, इस्टाग्राम व युट्युबं जाली एकाउन्ट बन्द नं यानाच्वंगु दु ।