फोहर व्यवस्थापनया निंतिं सर्वोच्चया निर्देशनात्मक आदेश
येँ (नेपालभाषा टाइम्स) – सर्वोच्च अदालतं स्वनिगःया फोहोर व्यवस्थापनयात वैज्ञानिक व प्रभावकारी दयेकेत सरकारया नामय् थीथी निर्देशनात्मक आदेश सहित परमादेश जारी याःगु दु । सर्वोच्च अदालतं फोहोर व्यवस्थापनय् खनेदुगु नीतिगत व व्यावहारिक झन्झट चीकेत प्रधानमन्त्री तथा मन्त्रिपरिषदया ज्याकूया मुख्यसचिवया संयोजकत्वय् छगू समन्वय समिति नीस्वनेत नं आदेश बिउगु दु । उगु समितिइ सम्बन्धित मन्त्रालयया सचिव व स्वनिगःया महानगरया प्रमुख प्रशासकीय अधिकृत तयेमाःगु आदेश नं बिउगु दु ।
न्यायाधीशपिं डा. कुमार चुनाड व महेश शर्मा पौडेलया मंकाः इजलासं स्वनिगःया फोहोर व्यवस्थापनय् खनेदुगु चरम लापरवाहीयात सम्बोधन यासें आदेशया कार्यान्वयनया अवस्था बारे स्वला स्वलाय् प्रगति प्रतिवेदन सर्वोच्च अदालतया फैसला कार्यान्वयन निर्देशनालय् बुझे यायेत नं सरकारया नामय् आदेश बिउगु दु । वरिष्ठ अधिवक्ता पदमबहादुर श्रेष्ठ व दिपकविक्रम मिश्रं दायर याःगु रिटय् सुनवाइ यासें अदालतं नेपाःमि नागरिकया स्वच्छ वातावरणय् म्वाये दइगु मौलिक हकया रक्षा यायेगु राज्यया दायित्व जूगु खँ नं लुमंकाः बिउगु दु ।
सर्वोच्च अदालतं स्वनिगलय् न्हिथं थ्यंमथ्यं १ हजार निसे १ हजार २ सय मेट्रिक टन फोहोर पिहां वइगु व उकिया ८० प्रतिशत हाकनं छ्यले जिउसां नं उचित व्यवस्थापन मजूगुलिं शहर प्रदुषित जूगु ठहर नं याःगु दु । फोहोरयात ‘मोहोर’ य् हिलेगु प्रविधि छ्यलेत व ध्वगिगु फोहोरं कम्पोष्ट सा उत्पादन यानाः किसानतयय्त इनेत नं अदालतं सुझाव बिउगु दु ।
ल्यान्डफिल्ड साइट व उकिया लिसे सम्बन्धित समस्या दीर्घकालीन रुपय् ज्यंकेगु निंतिं संघ, प्रदेश व स्थानीय तहया महत्वपूर्ण भूमिका दइगु धासें सर्वोच्च अदालतं थवंथवय् ग्वाहालि व समन्वय यानाः जक समस्याया सम्बोधन जुइगु खँ धाःगु दु । सर्वोच्च अदालतं स्वनिगःया फुक्कं पालिकाया आवास, व्यवसाय, विद्यालय, संघसंस्था व सार्वजनिक तथा निजी थासं ध्वगिगु व ध्वमगिगु फोहोर स्रोतय् हे अनिवार्य रुपय् बिस्कं बिस्कं तयेगु निंतिं सचेतना अभिवृद्धि ज्याझ्वः न्ह्याकेत व थुकथं वर्गीकरण यानाः संकलनया प्रबन्ध यायेत नं धाःगु दु ।
LEAVE YOUR COMMENTS