श्रीनगरय् अप्पां कयेकेगु घटना भारत सरकारं स्वीकार

भारत सरकारं श्रीनगरया सौरा इलाकाय् वंगु शुक्रवाः सरकारया निर्णयविरुद्ध अप्पां कयेकेगु घटना जूगु खँयात स्वीकार याःगु दु ।

गृह मन्त्रालयया प्रवक्तापाखें जूगु ट्विटय् धयातःगु दु, ‘मिडियां श्रीनगरया सौरा इलाकाय् घटना जूगु खबर वःगु दु । ९ अगस्तय् छुं मनूतय्सं स्थानीय मस्जिदय् नमाज यानाः लिहां वयेधुंकाः अप्पाः कयेकूगु खः । उमि लिसें उपद्रवीत नं शामिल दु । अशांति न्यंकेगु निंतिं छुं मनूतय्सं सुरक्षाकर्मीतय्त अप्पां कयेकूगु दु । तर सुरक्षाकर्मीतय्सं नं संयम कायम यानाः कानुनी व्यवस्था कायम यानातयेत कुतः याःगु दु ।’ ट्विटय् अनुच्छेद ३७० खतम यायेधुंकाः आःतक जम्मु काश्मिरय् छगः नं गोलीं मकयेकूनिगु खँ धाःगु दु ।

थ्वयां न्ह्यव बिबिसीलिसें थीथी अन्तर्राष्ट्रिय संचार माध्यमं शुक्रवाः श्रीनगरया सौरा इलाकाय् तःधंगु विरोध प्रदर्शन जूगु समाचार बिउगु खः । बिबिसीं उबलय् प्रदर्शनकारीतय्त लिनाछ्वयेत सुरक्षाकर्मीतय्सं अश्रु ग्यास कयेकूगु खँ धाःगु खः । उबलय् धाःसा भारत सरकारं थज्याःगु छुं कथंया प्रदर्शन मजूगु दावी याःगु खः । तर बिबिसीं पितबिउगु भिडियोय् धाःसा तःधंगु ल्याखय् मनूत सतकय् कुहां वःगु खनेदुगु खः ।