बेइजिङय् हाकनं कोरोना संक्रमण खनेदत

बेइजिङ (एजेन्सी) – चीनया राजधानी बेइजिङय् हाकनं कोरोना संक्रमण खनेदयेवं अन उच्च सतर्कता कायेगु सुरु याःगु दु । बेइजिङय् ४५म्ह न्हूपिं संक्रमित लूगु दु । न्हूगु संक्रमितत लुइवं बेइजिङय् पर्यटकीय क्षेत्र बन्द याःगु दुसा फङडाइ जिल्लाया झिंछगू आवासिय क्षेत्रय् लकडाउन याःगु दु ।

बेइजिङय् निला थुके शुक्रवाः छम्ह मनूयात संक्रमणया पुष्टि जूगु खः । छवाः न्ह्यः स्थानीय सिनफाडी धाःगु ला बजारय् वंम्ह उम्ह मनूयात संक्रमण जूगु खः । मेगू छुं नं कथंया ट्राभल हिस्ट्र मदुगुलिं उम्ह मनूयात उगु हे बजारय् संक्रमण जूगु आशंका याःगु खः ।

वयां लिपा शनिवाः मेपिं खुम्हेसित नं संक्रमण जूगु खः । उकी मध्ये स्वम्ह उगु हे बजाः दुगु क्षेत्रय् ज्या याइपिं खः । अथेहे मेम्ह छम्ह उगु हे बजाःया पसलय् वम्ह ग्राहक व निम्ह धाःसा चिनियाँ ला अनुसन्धान केन्द्रया कर्मचारीत खः । उपिं कर्मचारीत मध्ये छम्ह छवाः न्ह्यः उगु पसः क्षेत्रय् वःगु खः । उगु क्षेत्रया ५ सय १७म्हेसिगु परीक्षण याःगु इलय् ४५म्हेसित संक्रमण खनेदुगु खः ।

अधिकारीतय्सं आः उगु सिनफाडी बजाः क्षत्रे व मेगू छगू सिफुडया बजाः बन्द याकूगु दु । बेइजिङय् सिनाफाडी छगू तःधंगु थोक बजाः खः । कोरोना भाइरस गनं वल धाइगु पुष्टि मजूनिसां छगू सिफुड पसःया टेबुलय् भाइरस लूगु खँ अधिकारीतय्सं धाःगु दु ।

उगु क्षत्रेय् आः उच्च सतर्कता कायेगु निंतिं चिनियाँ जनसेना परिचालन याःगु दु । अन लिकसं च्वंगु गुंगू ब्वनेकुथी बन्द याःगु दु । आः उगु क्षेत्रय् च्वनीपिं १० हजार मनूतय्त परीक्षण यायेगु तयारी जुयाच्वंगु दु ।