पेगासस सफ्टवयेरया ग्वाहालिं अधिकारकर्मीतय्गु निगरानी

एजेन्सी- इजरायलया साइबर सुरक्षा कम्पनी एनएसओं दयेकूगु पेगासस नांयागु सफ्टवेयरया ग्वाहालिं थीथी देसया सरकारं अधिकारकर्मी, पत्रकार, वकील व नेतातय्त निगरानी तयाच्वंगु खुलासा जूगु दु । थ्व सफ्टवेयरया ग्वाहालिं अधिकारकर्मीनिसें सरकारयात शंका दुपिनिगु फोनपाखें जानकारी कायेगु यानावयाच्वंगु दु । थ्व सफ्टवेयरं फोनय् वइगु म्यासेज, फोटो, मेल गोप्यरुपं रिकर्ड याइ ।

थीथी प्रमुख सञ्चार माध्यमय् पिहां वःगु समाचारकथं कम्पनीयाके ५० द्वः सिबें अप्वः फोन नम्बर दुगु व कम्पनीं थः ग्राहकतय्त उकीया जानकारी मिइगु ज्या यानाच्वंगु धाःगु दु । थ्व सफ्टवेयरया प्रयोग जुयाच्वंगु समाचार आइतवाः ‘द वासिङ्टन पोस्ट’ लिसें विश्वया १४ गू प्रमुख समचार संस्थां पिकाःगु खः । समाचारकथं थ्व सफ्टवेयरं विश्वया प्रमुख समाचार संस्था सीएनएन, अलजजीरा, एएफपी व मेमेगु संस्थाय् ज्या यानाच्वंपिं १८० सिबें अप्वः पत्रकारतय्त निगरानी तयाच्वंगु दु ।

फोन नम्बर कम्पनीं गथे यानाः सिइकल धइगु सीमदुनिसां सफ्टवेयर दयेकूगु कम्पनी एनएसआें गलत ज्या मयानागु धाःगु दु । कम्पनी सफ्टवेयरं सेनायात सुरक्षाया निंतिं, कानुनया पालना यायेत व गुप्तचर निकाययात जक बियागु धाःगु दु ।

भारत व बंगलादेशय् नं थ्व सफ्टवेयरया प्रयोग जुयाच्वंगु खँ पिहां वःगु दु । भारतय् ४०म्ह सिबें अप्वः पत्रकार, निम्ह मन्त्री, स्वम्ह विपक्षी नेता लिसें सुरक्षा एन्जेसी प्रमुखयात तकं निगरानी तयातःगु ‘द वायर’ पत्रिकां छापे याःगु दु ।

सम्बन्धित बुखँ

LEAVE YOUR COMMENTS