अमेरिकाय् नं न्यायेगु मदया वन

येँ- कोरोना संक्रमणं बचे जुइगु लागिं अमेरिकी राष्ट्रपति डोनाल्ड ट्रम्पं संकटकाल घोषणा यायेवं अन च्वंपिं अमेरिकी नागरिकत झन् ग्याःगु दु । संकटकाल घोषणा जुइवं मनूत पिहां वयाः थःत माःगु खाद्यान्न भण्डारण शुरु याःगु खः । मनूतय्सं थःपिंत माःगु खाद्यान्न माक्व स्वयां अप्वः मुंकेगु शुरु याना हःगु दु ।

थ्वहे झ्वलय् अनया ओरेगन राज्यय् २५० म्ह स्वयां अप्वः मनू मुनीगु छुं नं कार्यक्रम याये मते धकाः अनया गभर्नरं घोषणा यायेवं अन आयोजना जुइत्यंगु आपालं सार्वजनिक ज्याझ्वःत प्रभावित जूगु दु । खास यानाः नेपाली समुदायं चैत महिनाया अन्तिम न्हि न्यायेकीगु विक्रम संवत्या न्हूदँ सम्बन्धी फुक्कं ज्याझ्वः प्रभावित जूगु दु । लिसें मार्च २८ तारिख कुन्हु नेवाःतय्सं न्यायेकीगु ‘नेवाः दिवस’ या ज्याझ्वः समेत थुकिं यानाः प्रभावित जूगु खँ अनया नेवाः न्ह्यलुवा भाजु दया शाक्यं ‘नेपालभाषा टाइम्स’ यात कनादिल ।

वय्कलं कनादीकथं ओरेगन राज्यया १ निसें १२ तगिं तकया फुक्क हे स्कुल बन्द याःगु दुसा विश्वविद्यालय तहया कक्षा अनलाइन कायेगु धकाः व्यवस्था याःगु दु । अन नं बजारय् नयेगु सामान न्याये मदया वनाच्वंगु दु । खास यानाः चीनं सामान वयेगु बन्द जुइवं अमेरिकाय् सामानया अभाव जूगु दु । ट्वाइलेट पेपर व स्यानिटाइजर नं न्यायेगु मदयावंगु खँ वय्कलं कनादिल ।

 

सम्बन्धित बुखँ

LEAVE YOUR COMMENTS