यल महानगरया छेँय् छेँय् स्वास्थ्य सेवा

यल (नेपालभाषा टाइम्स) – यल महानगरपालिकां छेँय् छेँय् हे स्वास्थ्यकर्मीपिं वनाः स्वास्थ्य सेवा बीगु जूगु दु । यल महानगरं नगरवासीया स्वास्थ्य सुरक्षाया निंतिं प्रभावकारी व क्रान्तिकारी पलाः न्ह्याकेगु झ्वलय् स्वास्थ्यकःमिपिं छेँय् छेँय् वनाः स्वास्थ्य सेवा बीगु घोषणा याःगु खः ।

यल महानगरं विशेष यानाः मस्त, अशक्त व ज्याथःजिथिपिंत लक्षित यानाः छेँय् छेँय् हे स्वास्थ्य सेवा बीत्यंगु खः । थुकिं यानाः यल महानगरया नागरिक म्हं मफुत धाःसा हथासं अस्पताल ब्वाँय् वनेमालीगु वा एम्बुलेन्स वा मेगु सवारी साधन काये मफयाः वाथावाथा कनेमालीगु बाध्यता अन्त्य जुइगु जूगु दु ।

यल महानगर प्रमुख चिरिबाबु महर्जनयाकथं वइगु साउन १ गतेनिसें महानगर क्षेत्र दुनेया सुं म्हं मफुत धाःसा महानगरया हटलाइन नं. ‘११३१’ य् फोन जक याःसा गाइ । उगु हटलाइन नं. य् फोन याःगु लगत्तै स्वास्थ्यकःमिया पुचः अत्याधुनिक सुविधासहित छिगु छेँय् हे थ्यंकः वइगु प्रमुख महर्जनं कनादीगु दु । हटलाइन नं. य् फोन वयेखतं चिकित्सक, नर्स, स्वास्थ्य सामग्रीसहितया एम्बुलेन्स छिगु लुखाय् थ्यंकः वइ ।

चिकित्सकं ल्वगितया अवस्था व आवश्यकताकथं वयागु छेँय् हे प्रारम्भिक परीक्षण व सम्भव दत्तले छेँय् हे उम्ह ल्वगिया वासः याइ । यदि छेँय् वासः यायेगु सम्भव मदु, ल्वगिया अवस्था गम्भिर दु धइगु खःसा चिकित्सकं तत्काल रिफरल पौ च्वयाः अज्याःपिं ल्वगियात तत्काल वहे एम्बुलेन्सय् तयाः सुरक्षित रुपं अस्पतालय् यंकेगु व्यवस्था याइ ।

महानगरया थुगु पलाखं अस्पतालतक थ्यंकेत जुइगु थीथीकथंया समस्या, झन्झटपाखें मुक्त जुइगु विश्वास याःगु दु ।