सिक्किमय् नेवाः भासं अनलाइन टिभी
येँ – भारतया सिक्किम राज्य सरकारं आः वालय् छक्वः नेवाः भासं अनलाइन टिभी बुलेटिन प्रशारण सुरु याःगु दु ।
सिक्किम सरकार व अनया मुख्यमन्त्री पवन चामलिङ संलग्न जुइगु थीथी विकास गतिविधि बारे जानकारी बीगु ल्याखं सरकारं थीथी भासं बुलेटिन प्रशारण याःगु खःसा उकी नेवाः भाय् छगू नं दुथ्याःगु खः ।
सिक्किम सरकारं नेवाः भाय्यात नं सरकारी मान्यता बियातःगु दु । सिक्किम सरकारं प्रशारण यानाच्वंगु नेवाः भाय्या अनलाइन टिभी बुलेटिन मय्जु मीना प्रधानं सम्पादन एवं वाचन यायेगु ज्या जुयाच्वंगु दु । मय्जु प्रधानं छुं दँ न्ह्यः येँय् वयाः नेवाः भाय्, लिपि, कला, संस्कृति आदि बारे सयेकाः लिहां झाःम्ह खः । मय्जु प्रधानया कथं थौंकन्हय् थ्व अनलाइन टिभी बुलेटिन वालय् छक्वः व यक्व समाचार दुसा वालय् निक्वः नं प्रशारण जुयाच्वंगु दु ।
सिक्किम सरकारं थःपिनि गतिविधि बारे सार्वजनिक जानकारी बीगु लागिं थीथी भासं ‘सिक्किम हेराल्ड’ नांगु वाःपौ नं प्रकाशन याना वयाच्वंगु दु । उकी नेवाः भाय् नं दुथ्याः । नेवाः भासं पिदनीगु ‘सिक्किम हेराल्ड’या सम्पादक नं मय्जु प्रधान हे खः । थ्व वाःपौ धाःसा थौंकन्हय् स्थगित जुयाच्वंगु दुसां आः याकनं हे न्हूगु साजसज्जा सहित पिहां वइगु जानकारी नं वय्कलं बियादीगु दु ।
सिक्किम सरकारं हःपाः व तिबः बिउगु जुयाः थौंकन्हय् सिक्किमया स्कूलय् नेवाः भाय् ब्वनेगु व्यवस्था समेत जुयाच्वंगु दु । नापं नेपाःपाखें इलय् ब्यलय् विज्ञपिं सिक्किमय् वनाः नेवाः भाय्, लिपि, कला, संस्कृति आदिया बारे सहलह ब्याकेगु ज्या नं जुया वयाच्वंगु दु ।
LEAVE YOUR COMMENTS