कवि नातिवज्रया लुमन्तिइ चिनाखँ ब्वनेज्या
येँ (नेपालभाषा टाइम्स) – सफू धुकूया थुवाः, भाषाह्यमिलिसें नेपाल–भाषाया कवि नातिवज्रयात लुमंकूगु दु । हलिं नेवाः दबू नेपाः देय् मू कवः व लिबि च्वसा दबूया मंकाः ग्वसालय् ‘सफू धुकू व नातिवज्रया लुमन्ति’ नामं जूगु साहित्यिक ज्याझ्वलय् चिनाखँ वाचन ज्याझ्वः जूगु खः ।
हलिं नेवाः दबू, नेपाः देय् मू कवःया नायः रमेश मुनिकारया सभापतित्वय् जूगु ज्याझ्वलय् नेपालभाषा एकेदेमिया भाइस चान्सलर डा. पुष्पराज राजकर्णिकार मूपाहांकथं झायादीगु खः ।
मदुम्ह कवि नातिवज्रया चय्च्याक्वःगु जन्मजयन्तीया लसताय् लाकाः जूगु ज्याझ्वलय् कवि कवयित्रीपिंसं चिनाखँ ब्वनाः न्यंकूगु खःसा नांजाःपिं कलाकारपिंसं म्येँ न्यंकादीगु खः । ज्याझ्वलय् वरिष्ठ कवि डा. योगेन्द्र प्रधान, प्रा. नर्मदेश्वर प्रधान, लोककवि राजभाई जकःमि, नारद वज्राचार्य, पूर्णिमा शाक्य, प्रदीपरत्न शाक्य, मिलन शाक्य, कवि नातिवज्रया म्ह्याय् नःलि वज्राचार्य, छय्पिं लिजः व लजना वज्राचार्यं चिनाखँ न्यंकादीगु खः ।
सांगीतिक ज्याझ्वः नं जूगु उगु ज्याझ्वलय् नांजाःम्ह वरिष्ठ म्येँ हालामि जुजुकाजी रंजित, रिता महर्जन, सरिता शाही, राजु महर्जन लगायतं कवि नातिवज्रया म्येँ न्यंकादीगु खःसा अमेरिकाय् च्वनादीम्ह बाखं च्वमि केशरमान ताम्राकारया चिनाखँ नं ब्वनाः न्यंकूगु खः ।
ज्याझ्वलय् मूपाहां एकेदेमिया भाइस चान्सलर डा. राजकर्णिकार, नेपाल संवत् न्हूदँ समारोह समितिया नायः प्रेमहिरा तुलाधर, संस्कृतिविद् प्रा.डा. चुन्दा वज्राचार्य, डा. वज्रराज शाक्य, हलिं नेवाः दबूया केन्द्रीय न्वकु शाक्य सुरेन लगायतं कवि नातिवज्र व सफू धुकूया व्यक्तित्व, योगदान व थीथी पक्षयात कयाः नुगःखँ तयादीगु खः ।
ज्याझ्वलय् हलिं नेवाः दबू नेपाः च्याप्टरया पुलांम्ह नायः सुरेन्द्रभक्त श्रेष्ठ, दबूया केन्द्रीय छ्याञ्जे लुमु श्रेष्ठ, कवि नातिवज्रया जहान प्रमिला वज्राचार्य, लिबि च्वसा दबूया लिउ कजि सुधिर ख्वबि लगायत आपालं भाषा व साहित्यह्यमितय् उपस्थिति दुगु खः ।
LEAVE YOUR COMMENTS