यौन शोषण याःम्हेसित ४० दँया जेल सजाय

एजेन्सी – दक्षिण कोरियाया मस्त व मिस्तय्त यौन गतिविधिया भिडियो कयाः अनलाइन च्याटरुम तःगू छगू पुचःया नाइके ठहर यानातःम्हेसित ४० दँया जेल सजाय न्यंकूगु दु ।

जो जू बिन नांया उम्ह मनूयात मिस्त व मस्तय्त ख्यानाः हे यौन भिडियो छ्वयेत बाध्य यानाः अज्याःगु भिडियो प्राइभेट च्याटरुमय् तयाबिइगु द्वपनय् दोषी ठहर याःगु खः । थ्व च्याटरुमय् झिद्वःम्ह तक ग्राहक दुगु व थज्याःगु भिडियो स्वयेत छम्हेसिनं हे १२ सय अमेरिकी डलर तक खर्च याःगु खँ सीदुगु खः । जो जू बिनया पुचलं झिंखुम्ह मिसामस्त लिसें ७४ म्ह मिस्तयेत यौन शोषण याःगु खँ धाःगु दु । थ्व मुद्दाय् मेपिं न्याम्हेसित नं न्हय्दा लिसें झिंन्यादँ तकया सजाय न्यंकूगु दु ।

थ्व घटना सार्वजनिक जुइवं दक्षिण कोरियाय् थ्व गिरोह विरुद्ध तःधंगु आक्रोस ब्वलंगु खः । ५० लाखं मल्याक मनूतय्सं आरोपिततय् नां गोप्य मतयेत इनाप यासें हस्ताक्षर यायेवं वंगु मार्च महिनाय् २५ दँया जो या नां सार्वजनिक याःगु खः । उबलय् जों सोलय् च्वंगु प्रहरी कार्यालयं मेथाय् सरे याःबलय् थःम्हं दुःख बियापिं सकसिकें माफी फ्वना धासें धाःगु दु, ‘जि धाथें दुष्ट खः, जिगु थ्व दुष्कर्म पनाबिउगुलिं सकसितं सुभाय् ।’ प्रहरीं थ्व घटनाय् १२४ म्ह शंकास्पदतय्त ज्वंगु खः ।