ने. सं. ११४६ तछलागा द्वादशी -

हाकनं छक्वः युरोपेली प्रभुत्व

थुगुसीया विश्वकपय् ४८ टिम दुथ्यायेवं छगू न्हूगु सम्भावना ब्वलंगु खः, यक्वसियां ब्वति कायेगु जक मखु, विश्व फुटबलमा पारम्परिक शक्तियात हाथ्या बीगु । तर थ्व हे विश्वकप क्वाटरफाइनल चरणय् थ्यनेवं हाकनं छक्वः व हे पुलांगु बाखं न्यनेमाःगु दु । अन्तिम च्यागू टिम क्वाटरफाइनल थ्यंगुलिइ खुगू देय् ला युरोपया हे लाःगु दु ।

थुकिं छु खँ सीदत धाःसा विश्व फुटबलय् युरोपया प्रभुत्व कायम दयातुं च्वंगु दु । क्वाटरफाइनल थ्यपिं थुपिं खुगू देय् खः– फ्रान्स, स्पेन, बेल्जियम, इंग्ल्यान्ड, नर्वे व स्विटजरल्यान्ड । सम्भावना ला छु तकं दु धाःसा थुगुसीया विश्वकपय्सेमिफाइनल थ्यनीगु प्यंगुलिं टिम नं युरोपया जुइफु । सन् २०१८ या विश्वकपय् नं थथे हे ला जूगु खः ।

विश्व फुटबलय् युरोप न्ह्याक्व हे बल्लाःसां विश्वकपय् ब्वति काइगु टिमय् उमिगु सहभागिता छगू कथं म्हो जुया वनाच्वंगु दु । सन् १९९० या विश्वकपय् फुक्कं यानाः २४ टिमं ब्वति काःगु खः, उबलय् युरोपया १४ गू टिमं ब्यति काःगु खः । आःया विश्वकपय् ४८ टिम दु, तर युरोपया सहभागिता खः मुक्कं १६ टिमया जक दु । थुकिया अर्थ छु धाःसा मेगु महादेशया टिमं विश्वकप अप्वः म्हितेखंगु दु ।

थुकिया छगू बांलागु उदाहरण ला अफ्रिका हे खः । सन् २०२२ या विश्वकपय् अफ्रिकापाखें मुक्कं न्यागू टिमं म्हितूगु खः । तर थ्व पालय् झिगू अफ्रिकी टिमं म्हिते खन । थ्व हे खँयात कयाः आलोचना याइपिं नं यक्व दु, फिफाया छनोट रणनीतिया कारणं कमजोर टिमं तकं थ्व विश्वकप म्हिते खन । छगू कथं धायेगु खःसा थ्व सत्य हे खः, थुकिया प्रमाण आःया विश्वकप हे जुल ।

कतारय् जूगु विश्ककपय् न्यागू युरोपेली टिम क्वाटरफाइनलय् थ्यंगु खः । थ्व पालय् खुगू थ्यंबलय् युरोपया टिम झन् धकाः बल्लाःगु सावित जुल । सन् २००२ या विश्वकप धाःसा भचा अपवाद सावित जुल, उबलय् प्यंगू युरोपया टिम जक क्वाटरफाइनलय् थ्यंगु खः । थुगुसीया विश्वकपं हाकनं छक्वः प्रमाणित याःगु दु– विश्व फुटबलय् युरोपया ध्वये फइमखु जुयाच्वन ।

अले थुकिया कारणत नं स्पष्ट दु । विश्व फुटबलय् गुलि नं बांलाःगु लिगत दु, सकतां युरोपया हे खः । अले थुपिं लिगत आर्थिक ल्याखं तसकं बल्लाः, अझ धाये तःमि । उकिं हे युरोपया फयांफतले अप्वः कासामित थुपिं लिगय् म्हितीगु स्वभाविक नं जुल । युरोपया पश्चिमेली एकेदेमिं हे बांबांलाःपिं कासामित उत्पादन यानाच्वंगु दु, अले थुकिं हे मेमेगु महादेश भचा बांलाःगु खनेदुगु सत्यता नं दु ।

थुकी छगू पुलांगु उदाहरण ला अर्जेन्टिनाया लियोनल मेसी हे जुल । वयात विश्व फुटबलया सर्वकालीन महान कासामि धाइ । तर वया कासा जीवनय् अर्जेन्टिनाया सिबें युरोपया अप्वः योगदान दु, विशेषत स्पेनया । उकिसनं नं बार्सिलोनाया । बार्सिलोनाया ला मासिया एकेडेमीया हे उत्पादन खः मेसी । थुकिइ न्हूगु उदाहरण धाःसा मोरक्को जुइफु ।

सन् २०२२ या विश्वकपय् मोरक्को सेमिफाइनल थ्यंगु खः, अले थुकिया झ्वलय् विश्वकपया थ्व चरणय् तक थ्यंगु न्हापांगु अफ्रिकी देय् जूगु खः । थ्व पालय् नं मोरक्कोया प्रदर्शन उलि हे बांलाः । थुकी नं युरोपया हे योगदान धाःसां जिउ । मोरक्कोया थ्यमथ्यं मुक्कं टिम हे पश्चिम युरोपपाखे बूपिं खः, अले थुमिसं फुटबल सयेकूगु नं अनया हे एकेडेमिं खः ।

कप्तान असरफ हाकिमी व ब्राहिम डियाज स्पेनय् बूपिं खःसा नासिर माज्राइ नेदरल्यान्ड्स व अयुब बोउडी फ्रान्सय् । थुमिसं फुटबल सयेकूगु नं युरोपय् खः, मोरक्कोय् मखु । थुगुसी मोरक्कों ब्राजिलविरुद्धया कासाय् १–१ या बराबरी लिच्वः हयाः सनसनी हःगु खः । उगु कासाया न्हापांगु ११ म्ह कासामि दक्वं मोरक्कोय् मखसे पिने बूपिं खः । अझ धाये युरोपय् ।

मोरक्कोया प्रशिक्षक मोहमद क्वाहबीलां थुलि तक धाःगु दु कि थःगु टिमया फ्रान्सया हे मेगु छगू टिम धाःसां जिउ । हाकनं अर्जेन्टिनाय् लिहां वनेगु खःसा थ्व टिमय् थ्यमथ्यं सकलें व हे देशय् बुपिं खः, तर सकलें युरोपय् म्हितीपिं हे खः, मेसी ला झन युरोपया हे एकेडेमीया कासामि जुल । ब्राजिलया नं थ्यंमथ्यं थ्व विश्वकपय् म्हितूपिं सकलें कासामित युरोपया लिगयापिं जक खः ।

थ्व पालय् निराशाजनक प्रदर्शन याःगु छगू महादेश झीगु थःगु एसिया खः । मुक्कं जापान व अस्टे«लिया जक नकआउट चरणय् थ्यन, तर उपिं अन्तिम १६ तकं थ्यंकेमफुत । थुकिया छगू मू कारण छु धाःसा एसियाय् युरोपया लिगय् म्हितीपिं कासामि यक्व मदु । अझ धाय् जापान व दक्षिण कोरिया त्वःताः एसियाया कसामितय्सं युरोपय् बांलाक म्हिते हे मखं, उकिं हे खः, विश्वकपय् एसियाया प्रदर्शन नं बांमलाः ।

एसियाली टिमत मध्ये दकलय् बल्लाःगु टिम धकाः जापानयात धायेगु याः, अले थुकिया कारण नं मेगु मखु, जापानया यक्व कासामित युरोपय् म्हितीगु यानाच्वंगुलिं नं खः । उकिं एसियाली फुटबलं छगू नीति हे दयेकेमाः, फयांफतलय् कासामित युरोपय् छ्वयेगु । थथे धाःसां झीसं छु नं स्वीकार यानाच्वना धाःसा विश्व फुटबलय् धाथें बल्लाःगु धयागु युरोप हे खः ।