
उत्तर कोरियां क्षेप्यास्त्र परिक्षणया निंतिं माःगु ध्यबा मुंकेत साइबर आक्रमण यानाः निगू अर्ब डलर खुयाकाःगु द्वपं लाःगु दु । संयुक्त राष्ट्र संघया छगू प्रतिवेदनय् उत्तर कोरियां उच्चस्तरया साइबल आक्रमण यानाः अवैध रुपं ध्यबा मुंकूगु खँ न्ह्यथनातःगु बिबिसी न्ह्यथँगु दु ।
संरासंया छगू विज्ञ पुचलं वित्तीय संस्था व क्रिप्टोकरेन्सी धाइगु डिजिटल मुद्रा सटही याइपिंथाय् म्होतिं नं ३५ गू साइबल आक्रमण बारे अनुसन्धान यानाच्वंगु दु । प्योङयाङं थथे साइबल आक्रमण यानाः खुयाकाःगु ध्यबां परमाणु व क्षेप्यास्त्र कार्यक्रम न्ह्याकाच्वंगु द्वपं संरासंया विज्ञतय् दु ।
उमिसं उत्तर कोरियां राष्ट्र संघया प्रतिबन्ध उल्लंघन यानाः पानीजहाजं पानीजहाजय् याइगु स्थानान्तरण व नरसंहारया हतियार न्यायेगु ज्या यानाच्वंगु दु ।थज्याःगु द्वपं लानाच्वंसां उत्तर कोरियां धाःसा थःपिनि क्षेप्यास्त्र परिक्षण जारी हे यानाच्वंगु दु । उत्तर कोरियाया सरकारी संचार माध्यमं अमेरिका व दक्षिण कोरियायात चेतावनी बीगु ताः तयाः नेता किम जङ अनं थज्याःगु क्षेप्यास्त्र परीक्षण यानाच्वंगु खः ।
नेता किमं मंगलवाः नं रणनैतिक महत्वया क्षेप्यास्त्र परीक्षणया अवलोकन याःगु खः । वंगु निवाः दुने याःगु थ्व प्यक्वःगु परीक्षण खः ।
अमेरिका व दक्षिण कोरियां कोरियाली प्रायद्वीपय् यायेत्यंगु मंकाः सैन्य अभ्यासया विरोध यासें चेतावनी कथं उत्तर कोरियां थ्व क्षेप्यास्त्र परीक्षण यानाच्वंगु खः । प्योङयाङं थ्व मंकाः सैन्य अभ्यासं शान्ति स्थापनाया कुतःयात प्रभावित याइगु खँ धयाच्वंगु दु ।
LEAVE YOUR COMMENTS