जनसन बेलायतया प्रधानमन्त्री जुइगु

बेलायतय् प्रधानमन्त्री टेरिया मेया उत्तराधिकारी कथं बोरिस जनसनयात ल्यःगु दु । कन्जर्भेटिभ पार्टीइ जूगु दलया नेतृत्वया प्रतिस्पर्धाय् जनसन त्यायेवं आः वय्कः हे बेलायती प्रधानमन्त्री जुइगु पक्का जूगु दु । जनसनं वइगु बुधवाः प्रधानमन्त्रीया शपथ ग्रहण यानादी ।
प्रधानमन्त्री टेरिजा में राजीनामा बीधुंकाः कन्जर्भेटिभ पार्टीइ दलया नेतृत्व ल्ययेगु निंतिं मंगलवाः मतदान जूगु खः ।

मतदानय् १ लाख ६० हजार सदस्यतय्सं मतदान याःगु खः । मेखे जनसन प्रधानमन्त्री जुइगु जुइवं अर्थमन्त्री फिलिप ह्यामन्ड व कानुनी डेविड गेउकं धाःसा थःगु पदं राजीनामा बीत्यंगु दु । जनसन त्याइगु सम्भावना दुगुलिं थ्वयां न्ह्यव हे विदेश मन्त्रालयया छम्ह मन्त्री सउर एलन डन्कनं राजीनामा बियादी धुंकूगु दु ।

पार्टीया वरिष्ठ नेतातय्सं लन्दनया पुलांम्ह मेयर वोरिस जनसनया नेतृत्वय् थःपिं सरकारय् मच्वनेगु धयाहःगुलिं मतदान न्ह्यव हे जनसन त्याइगु अनुमान जूगु खः ।बेलायतयात युरोपेली संघं लिकायेगु सम्बन्धी प्रधानमन्त्री में हःगु प्रस्तावत पारित मजुइवं में राजीनामा बियादीगु खः ।

वय्कलं बुधवाः संसदय् सांसदतय् न्ह्यसःया लिसः बीधुंकाः महारानी एलिजावेथ न्ह्यःन राजीनामा न्ह्यब्वयादी । थ्व धुंकाः वय्कःया उत्तराधिकारी जनसनं महारानीयात नापलानाः सपथ ग्रहण यानादी ।