अमेरिकाय् गर्भपतनया माग यानाः प्रदर्शन

एजेन्सी- अमेरिकाया ५० गुलिं राज्यय् गर्भपतनया माग यानाः द्वलंद्वः मनूतय्सं प्रदर्शन याःगु दु । शनिवाः अमेरिकाया ६६० सिबें अप्वः थासय् प्रदर्शन जूगु खः । अमेरिकाया वासिङटन डीसीइ च्वंगु सर्वोच्च अदालत न्ह्यःने नं प्रदर्शन जूगु खः । अमेरिकाया टेक्सस राज्यय् गर्भपतनयात कयाः हःगु न्हूगु नियमयात कयाः अमेरिकाया मिस्तय्सं प्रदर्शन यानाच्वंगु खः । टेक्ससय् गर्भपतनया नियमय् कडाइ यानाः प्वाथय् दुगु खुवाः लिपा गर्भपतन यायेमदइगु नियम हःगु खः ।

अमेरिकाया मेमेगु राज्य नं थ्व नियम हयेत्यंगु इलय् थ्व प्रदर्शन जूगु खः । वासिङटन डीसीइ च्वंगु सर्वोच्च अदालत न्ह्यःने जूगु प्रदर्शनय् मिस्तय्सं ‘जिगु शरीर जिगु अधिकार’, ‘गर्भपतन यायेगु व्यक्तिगत खः , कानूनी बहस मखु’ थेंज्याःगु नारा थ्वयेकूगु खः । प्रदर्शनकारीतय्सं फिनातःगु लनय् सन् १९७३ च्वयातःगु खः । सन् १९७३य् अमेरिकाय् न्हापांखुसी मिस्तय्त गर्भपतनया अधिकार बिउगु खः । न्यूयोर्क राज्यया गभर्नर काथे होकुलं निगू फरक ¥यालीइ सम्बोधन यासें थः गर्भपतनया पक्षय् ल्वाच्वनाःगु व ल्वाल्वां त्यानुइ धुंकूगु धाःगु खः । गभर्नर काथें थःपिंसं न्हूगु छुं माग मयानाःगु व गर्भपतनया अधिकार देसया कानूनय् हे दुगु नं धाःगु खः ।

 

सम्बन्धित बुखँ

LEAVE YOUR COMMENTS