तालिबानपाखें अफगानिस्तानया स्वंगू मू शहर कब्जाय् कायेगु कुतः

एजेन्सी- अफगानिस्तानया दक्षिणी व पश्चिमी क्षेत्रय् च्वंगु मुख्य स्वंगू शहर हेरात, लस्करगाहा व कान्दाहारय् तालिबानतय्सं आक्रमण यानाः शहरयात कब्जाय् कायेत स्वःगु दु । आक्रमण लिपा सरकारी सेना व तालिबानया दथुइ हिंसात्मक ल्वापु जूगु दु ।

अफगानिस्तानं विदेशी सेना लिहां वनेगु शुरु जुसांनिसें तालिबानतय्सं ग्रामिण क्षेत्र थःपिनिगु कब्जाय् कयावयाच्वंगु खःसा शहर धाःसा सरकारी सेनाया हे नियन्त्रण दयाच्वंगु खः । विज्ञतय्सं तालिबानतय्सं मू शहरय् आक्रमण यायेवं आः सरकारी सेनाया परीक्षण जुइगु धाःगु दुसा गम्भीर मानवीय संकट वयेफुगु नं धाःगु दु ।

थ्व हे झ्वलय् अफगानिस्तानया कान्दाहारय् तालिबानतय्सं स्वंगः रकेट कयेकूगु दु । रकेट आक्रमण लिपा दक्व हवाइ उडान रद्द जूगु दु । अफगानिस्तानी अधिकारीतय्सं धाःकथं आक्रमणं याना रनवेलय् क्षति जूसां मानवीय क्षति जूगु मदु ।

तालिबानया प्रवक्ता जाबिउल्लाह मुजाहिदं अफगानिस्तानी सेनाया हवाइ आक्रमण निस्तेज यायेत रकेट आक्रमण यानागु धाःगु दु । अफगानी सेना व तालिबान दथुइया लडाँई जुयाच्वंगु मदिउनि ।