नेयमारया बलात्कार मुद्दा बन्द

लोकंह्वाःम्ह कासामि नेयमारयात लानाच्वंगु बलात्कारया द्वपया अनुसन्धान यानाच्वंपिं ब्राजिलया प्रहरीं उगु मुद्दा बन्द यानाबिउगु दु । साओ पाउलोया महान्यायाधिवक्ताया कार्यालयं प्रमाणया अभावय् उगु मुद्दा निलम्बन यानागु, तर थुकिया अन्तिम निर्णयया निंतिं अभियोजनकर्तायाथाय् छ्वयागु खँ धाःगु दु ।

ब्राजिलया कासामि नेयमारयात ब्राजिलया हे छम्ह मोडल नाजिला त्रिन्दाजीं थःत बलात्कार याःगु द्वपं बिउगु दु । पेरिसया छगू होटलय् थःत बलात्कार याःगु द्वपं बिइवं नेयमारविरुद्ध अनुसन्धान न्ह्याःगु खः । नेयमारं धाःसा उगु द्वपंया खण्डन यासें उम्ह मिसां थःके ध्यबा असूले यायेत थज्याःगु द्वपं बियाच्वंगु खँ धाःगु दु ।

नेयमारया छम्ह प्रवक्तां धासें समाचार संस्था एएफपीलिसे खँ ल्हासें मुद्दा लित काःगु बारे थःपिंसं छुं प्रतिक्रिया बीमफइगु खँ धाःगु दु । प्रहरीं मोडल त्रिन्दाजीविरुद्ध मानहानिया द्वपं नं तःगु दु । त्रिन्दाजीया तःम्ह हे वकिलतय्सं वयापाखें मुद्दा ल्वायेगु नं त्वःता बीधुंकूगु दु । थ्व मुद्दाय् न्यायाधिश अन्त्मि निर्णय न्यंके न्ह्यः उगु मुद्दाया समीक्षा यायेत अभियोजनकर्तातय्त झिंन्यान्हुया ई दइगु खँ धाःगु दु ।

सम्बन्धित बुखँ

LEAVE YOUR COMMENTS