इटालीं कीर्तिमान दयेकल

एजेन्सी- इटालीया राष्ट्रिय फुटबल टिमं झ्वःलाक ३७ गू कासातक अपराजित जूगु न्हूगु कीर्तिमान दयेकूगु दु । विश्वकप छनोट अन्तर्गत बुधवाः चान्हय् जूगु कासाय् लिथुआनियात ५–० गोलं बुकेवं इटाली ३७ गू कासातक अपराजित जूगु न्हापांगु देय् जूगु दु । थ्वयां न्ह्यः ब्राजिलं ३६ गू कासातक अपराजित जुयाः तयातःगु कीर्तिमान इटालीं त्वाःथःगु खः । इटालीं थ्व कीर्तिमान दयेकेगु झ्वलय् २९ गू कासा त्याकूगु खःसा च्यागू कासा बराबरी म्हितूगु खः । सन् २०१८ य् पोर्चुगलं बुके धुंकाः निसें इटली आःतक छगू नं कासाय् इटाली बूगु मदुनि ।
विश्वकप छनोट अन्तर्गत बुधवाः चान्हय् जूगु मेगु कासाय् जर्मनीं आइल्याण्डयात बुकूगु दु । अथे हे बेल्जियमं बेलारुसयात, स्पेनं कोसोभोयात व स्वीडेनं ग्रीसयात बुकल । इंग्ल्याण्ड व पोल्याण्डं धाःसा बराबरी म्हितल ।