कोलम्बियायात जेम्सया चिन्ता
स्वीडेन व स्वीट्जरल्यान्ड दथुइ बराबरीया भिडन्त
विश्वकपया प्रिक्वार्टरफाइनल अन्तर्गत थौं स्वीट्जरल्यान्डं स्वीडेनया सामना यायेत्यंगु दुसा इंग्ल्यान्डं कोलम्बिया लिसे म्हितेत्यंगु दु ।
छनोट जूगु लिपांगु स्वंगू विश्वकपय् प्रिक्वार्टरफाइनल तक थ्यंकेत ताःलाःगु स्वीट्जरल्यान्ड व स्वीडेन थ्व पालय् क्वार्टरफाइनलय् दुहां वनेगु निंतिं प्रतिस्पर्धा यायेत्यंगु दु ।
स्वीट्जरल्यान्ड थ्वयां न्ह्यव म्हितूगु प्यंगू विश्वकप मध्ये सन् १९९४, २००६, २०१४ य् प्रिक्वार्टरफाइनलय् थ्यंगु खःसा स्वीडेन सन् १९९४, २००२ व २००६ या विश्वकपय् प्रिक्वार्टरफाइनलय् थ्यंगु खः । सन् १९९४ निसें प्रिक्वार्टरफाइनलं थहां वनेमफुनिगु थ्व निगू टिम मध्ये थौं सु थहां वनी धाःसा अनुमान यायेत थाकु । निगुलिं टिमं थुगुसी उतिकं हे बांलाक म्हिताच्वंगु दु ।
अले थुपिं निगू टिम दथुया हेड टु हेड कासाय् नं बराबर धयाथें हे खनेदु । निगू टिम दथुइ आःतक २८ गू कासा जुइधुंकूगु दु, गुकी स्वीस टिम झिंछक्वः त्याःगु दुसा स्वीडेन झिक्वः त्याःगु दु, अले न्हय्गू कासा बराबरीइ क्वचाःगु दु । थौं हे लिबाक इंग्ल्यान्ड व कोलम्बियां क्वाटरफाइनलय् थाय् दयेकेगु निंतिं धेंधेंबल्लाः याइ ।
अपाय् चर्चाय् मवयेकं हे इंग्ल्यान्डं थुगुसी बांलाःगु कासा म्हिताच्वंगु दु । पानामा विरुद्ध ६–२ गोलया प्रभावशाली विजय चूलाकावःगु इंग्ल्यान्डय् ह्यारि केन, रहिम स्ट्रलिङ, मार्कस रसफोर्डपिंसं आक्रमण याइगु जुइ । मेखे कोलम्बिया धाःसा थः स्टार कासामि जेम्स रोड्रिग्वेजया फिटनेशयात कयाः चिन्तित जुयाच्वंगु दु ।
प्यदँ न्ह्यः ब्राजिलय् जूगु विश्वकपय् गोल्डेन बुट त्याकूम्ह रोड्रिग्वेजं सेनेगल विरुद्ध जूगु लिग चरणया अन्तिम कासाय् चोटग्रस्त जुयाः मैदानं पिहां वंगु खः । वं म्हितीगु मम्हितीगु धायेमफुनि । कोलम्बियायात थ्व हे चिन्ता जुयाच्वंगु दु । इंग्ल्यान्डयात खतरा जुइफुम्ह रोड्रिग्वेज म्हितेमफुत धाःसा कोलम्बियाया कासा अप्वः धयाथें राडेमल फाल्काओय् निर्भर जूवनेफु ।
प्यदँ न्ह्यव चोटया कारणं विश्वकप म्हितेमखंम्ह कोलम्बियाया स्टार फाल्काओ थ्वपालय् चोटमुक्त जुयाः मैदानय् दु । थुगुसी विश्वकपय् दकलय् अप्वः गोल यायेधुंकूम्ह ह्यारि केनया आक्रमण पनेगु जिम्मेवारी वया हे क्लबया डिफेन्डर डाभिन्सन साञ्चेजयाके दु । इंग्ल्यान्डयात पनेगु निंतिं साञ्चेजया लिसें मिना न्ह्यःने दइ । साञ्चेज केनया क्लब टोटनह्यामपाखें म्हितीम्ह खःसा मिना बार्सिलोनायाम्ह खः ।
LEAVE YOUR COMMENTS