ने. सं. ११४४ कौलाथ्व षष्ठी -

बार्सिलोना व रियलया शानदार जित

एजेन्सी- लियोनल मेसी व लुइस स्वारेजं निगू निगू गोल यायेवं बार्सिलोनां रियल बेटिसयात ५–० गोलं बुकूगु दु । थ्व विजय लिसें बार्सिलोना ला लिगाय् ११ ल्याखं अग्रता कयाः शीर्षस्थानय् दु । बार्सां न्यागुलिं गोलं नाटकिय रुपं निगूगु हाफय् जक याःगु खः ।

दकलय् न्हापां इभान राकिटिकं कासाया ५९ औं मिनेटय् गोल यासें बार्सायात अग्रता बिउगु खःसा थ्वयां न्यागू मिनेट लिपा हे मेस्सीं गोल यात, थ्वयां नं न्यागू मिनेट लिपा स्वारेजं भलीपाखें थप छगू गोल यानाः ३–० गोलं अग्रता बिल । कासाया ८० औं मिनेटय् मेसीं थप छगू व ८९ औं मिनेटय् स्वारेजं थप छगू गोल यात । थ्व गोल लिसें स्वारेजया ला लिगाय् १०० गोल थ्यंगु दु, मुक्कं ११४ गू कासाय् यानाः ।

मेखे बार्साया परम्परागत प्रतिद्वन्द्वी रियल म्याड्रिडं नं म्हिगः जूगु कासाय् न्ह्यथनेबहःगु विजय चूलाकूगु दु । नाचो, गारेथ बेल व क्रिस्टियानो रोनाल्डों निगू निगू गोल याःगु कासाय् रियलं डेपोर्टिभो ला कोरुन विरुद्ध ७–१ गोलं आकर्षक विजय चूलाकूगु खः ।

कासाया २३ औं मिनेटय् एड्रियन लोपाजं डेपोर्टिभोया निंतिं न्हापांगु गोल याःगु खःसां लिपा रियलयात पने तकं मफुत । थ्वयां ९ मिनेट लिपा हे नाचों गोल यासें कासा बराबरीइ यंकाबिउगु खः । थ्वयां लिपा बेलं ४२ व ५८ औं मिनेटय् यानाः झ्वःलाक निगू गोल यातसा लुका मोडरिकं ६८ औं मिनेटय् छगू गोल यात । रोनाल्डों ७८ व ८४ औं मिनेटय् निगू गोल यातसा अन्तय् ८८ औं मिनेटय् नाचों थप छगू गोल याःगु खः ।

९ डिसेम्बर लिपा ला लिगाय् न्हापांगु विजय चूलाकूगु रियल आः ल्याः धखलय् शीर्ष प्यंगूगु थासय् ला थहांवःगु दु, तर नं शीर्षथासय् लानाच्वंगु बार्सिलोना स्वयां १९ अंकं लिउने दु ।