समायोजित कर्मचारीयात हाजिर याकेत निर्देशन

येँ –  संघीय मामिला तथा सामान्य प्रशासन मन्त्रालयं समायोजन जुयावंपिं स्थानीय तहया कर्मचारीतय्त हाजिरी याकेत निर्देशन बिउगु दु । समायोजन जुयाः वंपिं कर्मचारीतय्त स्थानीय तहं हाजिर याके मबिउगुलिं मन्त्रालयं थ्व निर्देशन बिउगु खः । मन्त्रालयया सहसचिव बाबुराम अधिकारीं गुलिखे स्थानीय तहय् समायोजन जुया वंपिं कर्मचारीतय्त हाजिर याके मबिउगुलिं थ्व निर्देशन बीमाःगु खँ धयादीगु दु ।

वय्कःया कथं समायोजन जुयावंपं कर्मचारीतय्त हाजिरी याके मबिल धाःसा संघीय सरकारपाखें स्थानीय तहयात बिया वयाच्वंगु अनुदान रोक्का यायेगु निंसें मेमेगु आवश्यक कारवाही प्रक्रिया न्ह्याकेगु खँ धयादिल ।

कर्मचारी समायोजन ऐन २०७५या दफा १३ या उपदफा ७ कथं सम्बन्धित निकायया प्रशासकीय प्रमुख वा अधिकारीं प्रदेश वा स्थानीय तहय् समायोजन जूपिं कर्मचारीयात हाजिरी याकाः जिम्मेवारी बीमाःगु खँ न्ह्यथनातःगु दु । मन्त्रालयया ऐनया दफा १३ या उपदफा ८ कजे हाजिर मयाकूपिं व जिम्मेवारी मबिउपिं अधिकारीतय्त प्रचलित कानुन कथं कारवाही यायेगु खँ न्ह्यथनातःगु दु ।

ऐन कथं समायोजन जूपिं कर्मचारीतयत हाजिर याकाः ज्याये लगय् यायेगु अधिकारी स्थानीय तहया प्रमुख प्रशासकीय अधिकृतया जूसां गुलिखे स्थानीयतहया प्मुखं हे पत्र च्वयाः कर्मचारी लित छ्वयेगु ज्या यानाच्वंगु व थ्व ज्या कानुन विपरीत जूगुलिं थथे लित मछ्वयेत नं निर्देशन बिउगु दु ।

निर्देशनय् समायोजन जुयाः हाजिर जूवःपिं कर्मचारीतय्त समायोजन जूगु रिक्त पदय् हाजिर याकाः ज्या याकेमाःगु, मन्त्रालयं रिक्त दरबन्दी मदुसा समायोजन जूपिं कर्मचारीया पद थप सिर्जना यानाःसां हाजिर याकाः जिम्मेवारी बीत नं निर्देशन बिउगु खँ सहसचिव अधिकारीं धयादीगु दु । सरकारं थगुने स्थानीय तहय् ५१ हजार ४५७ कर्मचारी समायोजन याःगु खः ।

सम्बन्धित बुखँ

LEAVE YOUR COMMENTS