जलविद्युत आयोजना प्रगति सन्तोषजनक मजू झिंन्यान्हु दुने प्रगति बुझे यायेत निर्देशन

येँ – सरकारी व निजी क्षेत्रं दयेकाच्वंगु जलविद्युत आयोजनाया प्रगति सन्तोषजनक मजू धासें सरोकारवाला संस्था व कम्पनीयात झिंन्यान्हु दुने विवरण बुझे यायेत ऊर्जा, जलस्रोत तथा सिँचाइ मन्त्रालयं निर्देशन बिउगु दु ।ऊर्जा, जलस्रोत तथा सिँचाइ मन्त्री वर्षमान पुनं निर्माणाधीन व निर्माण चरणय् दुगु जलविद्युत आयोजनाया प्रगति विवरण बुझे यायेत निर्देशन बिउगु खः । निर्देशन कथं नेपाल विद्युत प्राधिकरण व वया सहायक कम्पनीतय्सं नं झिंन्यान्हु दुने विवरण बुझे यायेमाः ।

मन्त्रालयया निर्देशन लिपा प्राधिकरणं नं निजी क्षेत्रया आयोजनाया प्रगति विवरण फ्वनेगु सुरु याःगु दु । प्राधिकरणं सोमवाः हे छगू सुचं पिथँसें विवरण बुझे याये हयेत धाःगु दु ।मन्त्री पुनं जलविद्युत आयोजनाया ज्या लिबाःगुलिं यानाः ऊर्जा व जलविद्युत विकास लक्ष्यय् लिच्वः लानाच्वंगु धासें अनुगमन यायेमाःगु खँ धया वयाच्वंगु खः । वय्कलं निजी क्षेत्रं दयेकाच्वंगु जक मखु प्राधिकरण व वया सहायक कम्पनीतय्सं दयेकाच्वंगु आयोजना नं अनुगमन यायेमाःगु खँय् बः बिया वयाच्वंगु खः ।

विद्युत उत्पादनया लक्ष्य चूलाकेत व हे कथं आयोजनाया प्रगति जुइमाःगु मन्त्री पुनः धयादीगु दु । वय्कलं आवंनिसें विद्युत उत्पादनया लिसें अनुगमन व नियमनय् कडाइ जुइगु खँ धयादीगु दु । प्रगति विवरण पेश मयाइपिं प्रवद्र्धक व विकासकर्तायात छुं नं बहानाय् त्वःतेगु जुइमखु धयादीगु दु । प्राधिकरणया कथं विद्युत खरिद सम्झौता (पिपिए) जुइधुंकूगु थीथी प्रवद्र्धकमध्ये छुं छुं कम्पनी जक अद्यावधिक विवरण बुझे याःगुलिं अनुगमन ज्या नं मछिनाच्वंगु दु ।

देशय् ऊर्जा संकट जुयाच्वंगु अवस्थाय् गुलिखे पिपिए जुइधुंकूगु आयोजना दयेकेगु ज्या ताःई न्ह्यवनिसें सुरु हे मजूनिगु खँ प्राधिकरणं धाःगु दु । दयेकाच्वंगु आयोजनाया प्रगति नं सन्तोषजनक मजूगुलिं थुकिं ऊर्जा व्यवथापनय् नं अन्योल जुयाच्वंगु खँ धाःगु दु ।

जलविद्युतया श्वेतपत्र हयेगु तयारी

येँ – ऊर्जा, जलस्रोत तथा सिँचाई मन्त्री वर्षमान पुनं जलविद्युत क्षेत्रय् श्वेतपत्र हयेगु तयारी यानाच्वंगु खँ धाःगु दु । वय्कलं बुधवाः तकया दुने श्वेतपत्र हइगु खँ धाःगु दु । श्वेतपत्रय् ऊर्जा ख्यलय् आःतकया अवस्था व आः ज्वनेगु लँपु बारे सम्बोधन जुइगु खँ धाःगु दु ।उगु श्वेतपत्रय् वइगु न्यादँ दुने १० हजार मेगावाट मत उत्पादन यायेगु निंतिं आधारत न्ह्यथनीगु खँ धाःगु दु । थौंकन्हय् देशय् १ हजार मेगावाट मत उत्पादनया निंतिं ज्या जुयाच्वंगु दु ।

थ्व श्वेतपत्रय् विद्युत आपूर्तिइ सुधार यायेगु, विद्युत चुहावन नियन्त्रण यायेगु, फुक्कं ख्यलय् विद्युतीयकरण यायेगु, राष्ट्रिय गौरवया आयोजना म्हसीका निर्माण यायेगु, तःधंगु पुखू दइगु आयोजना दयेकेगु विषयत नं दुथ्याइगु खँ धाःगु दु ।

सम्बन्धित बुखँ

LEAVE YOUR COMMENTS