पश्चिम सेती जलविद्युत आयोजना थ्री गर्जेजं ल्हाः लिकायेव हाकनं अध्ययन याइगु

येँ – पश्चिम सेती जलविद्युत आयोजना दयेकेज्या न्ह्याके न्ह्यव हाकनं न्हूकथं अध्ययन याइगु जूगु दु । मंगलवाः च्वंगु लगानी बोर्डया बैठकं ७५० मेगावाट क्षमताया पश्चिम सेती दयेकेगु निंतिं चिनियाँ कम्पनी थ्री गर्जेजं अनिच्छा प्वंकूगुलिं आः गुकथं न्ह्याः वनेगु धयागु बारे अध्ययन यायेगु क्वःछिउगु खः ।

थ्री गर्जेजं छुं ई न्ह्यव जक प्राविधिक, पुनर्वास व पुनस्र्थापना लगायतया विषयया कारणं थ्व परियोजना वित्तीय दृष्टिकोणं सम्भव मदुगु खँ लगानी बोर्डयात जानकारी बिउगु खः । थ्री गर्जेजं थ्व आयोजना दयेकेगु धकाः न्हय्दँ न्ह्यव हे सम्झौता यानातःगु खःसा आः वया जक दयेके मफइगु जानकारी बिउगु खः ।

थ्री गर्जेजं थ्व आयोजना दयेकेमफइगु जानकारी बीधुंकाः मंगलवाः च्वंगु लगानी बोर्डया बैठकं थ्री गर्जेज लिसेया सम्झौता त्वाःथलीगु अनुमान यानातःगु खःसां बोर्डया अध्यक्ष प्रधानमन्त्री केपी ओलीं थ्व सम्झौता खारेज याकेमबीवं थप अध्ययन यायेगु क्वःछिउगु खः ।
ऊर्जा, जलस्रोत व सिँचाइमन्त्री वर्षमान पुनं बिबिसीलिसे खँ ल्हासें आः थ्व आयोजना गुकथं न्ह्याकेगु, आयोजना ठीक जू कि मजू धयागु विषयय् हाकनं अध्ययन यानाः जक निष्कर्षय् वयेगु खँ धयादीगु दु ।

थुकिया बारे अध्ययन यायेत दयेकीगु समितिइ ऊर्जा, जलस्रोत तथा सिँचाइ मन्त्री, अर्थमन्त्री व लगानी बोर्डया कार्यकारि अधिकृत दइगु खँ धाःगु दु । थ्यंमथ्यं निगू खर्ब दां तुइगु अनुमान यानातःगु थ्व आयोजनाय् न्हापा थ्री गर्जेजं ७५ प्रतिशत व नेपाल विद्युत प्राधिकरणं २५ प्रतिशत लगानी यायेगु सम्झौता जुयाच्वंगु खः ।

बोर्डया मंगलवाः च्वंगु बैठकं ९ सय मेगावाटया माथिल्लो कर्णाली जलविद्युत आयोजनायात कयाः नं थप अध्ययन यायेगु क्वःछिउगु खः । सरकारया प्रवक्ता संचार तथा सुचना मन्त्री गोकुल बास्कोटां थ्व आयोजनाया क्वय्या तटीय क्षेत्रया प्रभाव बारे थप अध्ययन यायेमाःगु खनेदुगु जानकारी बियादिसें सिँचाइ आयोजना व मेमेगु संरचनाय् लायेफुगु असर व उकिया व्यवस्थापन बारे अध्ययन जुइगु खँ धयादीगु दु ।

माथिल्लो कर्णाली जलविद्युत आयोजना दयेकेगु सम्झौता यानातःगु भारती कम्पनी जिएमआरयात लगानी मुंकेगु निंतिं बियातःगु ई बुधवाः तक जक दु । तर जिएमआरं लगानी मुंकेमफुनिगुलिं थप दछिया ई बीत आवेदन बीधुंकूगु दु ।विदेशी कम्पनीलिसे निर्माण सम्झौता याःगु ततःधंगु जलविद्युत आयोजना मध्ये अरुण स्वंगूगु बोहक मेगु आयोजना दयेकेगु ज्या तकं न्यायेमफुनि ।

पश्चिम सेती, बुढीगण्डकी, माथिल्लो कर्णाली थथे हे ताःई तक ज्या न्ह्यायेमफुगु आयोजनात खः ।थ्वहे दथुइ लगानी बोर्डं ६ स मेगावाटया माथिल्लो मस्र्याङ्दी जलविद्युत आयोजनाया शेयर विक्री अनुमोदन याःगु दु ।