
येँ – आर्थिक दँ २०७५÷७६या निंतिं अर्थमन्त्री युवराज खतिवडां मंगलवाः संघीय नेपाःया बजेट न्ह्यब्वःगु दु । १३ खर्ब १५ अर्ब तकाया थ्व बजटय् संघीय राज्यं प्रदेश व स्थानीय तहया निंतिं छगू खर्ब ३५ अर्ब ५० करोड ७३ लाख तका दां वित्तीय समीकरण कथं अनुदान बीगु जूगु दु ।
थ्व ध्यबा प्रदेश व स्थानीय तहया शिक्षा, स्वास्थ्य, त्वनेगु लः थेंज्याःगु मानव विकास सुचकांक, पूर्वाधार, खर्चया आवश्यक्ता, राजश्व क्षमता व उगु तहय् दुगु आर्थिक सामाजिक व मेमेगु विभेदया आधारय् थ्व अनुदान बीगु व्यवस्था बजेटय् यानातःगु दु । शसर्त अनुदानया थ्व बजेट मध्ये प्रदेशयत ६३ अर्ब १३ करोड ५५ लाख वनीसा स्थानीय तहयात छगू खर्ब ९ अर्ब ८४ करोड ५६ लाख तका वनी ।
अथेहे प्रदेश व स्थानीय तहं पहिचान यानाः न्ह्याकीगु आयोजनाया निंतिं विशेष अनुदान धकाः २० अर्ब तका दां नं फ्याःगु दु ।
प्रधानमन्त्री रोजगार कोषया निंतिं स्वंगू अर्ब झिगू करोड फ्याःगु बजेटय् ल्याय्म्हतय्त व्यवसायय् आकर्षित यायेत ५ प्रतिशत ब्याजं न्हय्गू लाख तक त्यासा बीगु घोषणा नं यानातःगु दु । ल्याय्म्हतय्सं शैक्षिक प्रमाणपत्र बरः तयाः थ्व त्यासा कायेफइगु खँ धाःगु दु ।
अथेहे विदेशं लिहां वःपिं ल्याय्म्हतय्त व्यवसाय न्ह्याकेगु निंतिं परियोजनाय् आधारित झिगू लाख तक त्यासा बीगु खँ नं बजेटय् न्ह्यथनातःगु दु । स्वास्थ्य ख्यलय् ५६ अर्ब ४१ करोड ९७ लाख बजेट फ्याःगु दुसा थ्वहे पाखें आयुर्वेद विद्यालय नीस्वनेत झिगू करोड दां नं फ्याःगु दु । थ्व बजेट पाखें १२०० गू वडाय् स्वास्थ्य संस्था चायेकेत प्यंगू अर्ब तका दां अनुदान नं बीगु दु ।
वइगु निदँ दुने साक्षर नेपाः घोषणा यायेगु लक्ष्य तयाः सकलें मस्तय्त विद्यालय् हये, टिके याये व स्यनेकने धयागु अभियान संचालन यायेगु खँ नं बजेय् न्ह्यथनातःगु दु । अथेहे सामुदायिक विद्यालयय् प्राविधिक क्षा संचालन यायेत ८४ करोड, स्वंगू लाख व विद्यालय अनुदानया निंतिं १४ अर्ब ३६ करोड दां फ्याःगु दु ।
अन्तर्राष्ट्रिय स्तरया शैक्षिक केन्द्र विकास यायेगु ताःतयाः मदन भण्डारी विज्ञान तथा प्रविधि प्रतिष्ठान नीस्वनेगु निंतिं विशेष योजना सहित थ्व क्षेत्रया निंतिं छगू खर्ब ३४ अर्ब ५० करोड ८७ लाख दां नं विनियोजन याःगु दु । सरकारं हरेक प्रदेशय् छगू छगू स्तरीय रंगशाला दयेकेगु घोषणा यासें थीथी धेंधेंबल्लाया निंतिं निगू अर्ब प्यंगू करोड दां नं फ्याःगु दु ।
अथेहे राष्ट्रपति महिला उत्थान कार्यक्रमया विस्ता, प्रत्येक प्रदेशय् ज्येष्ठ नागरिक आयोग्य आश्रम, दलित समुदायया सामाजिक एकीकरण थेंज्याःगु सामाजिक ज्याया निंतिं बजेट महिला, बालबालिका, ज्येष्ठ नागरिकतय् निंतिं खर्च यायेत छगू अर्ब ८८ करोड १२ लाख तका फ्याःगु दु ।प्रधानमन्त्री कृषि आधुनिकीकरण परियोजना संचालनया निंतिं प्यंगू अर्ब ५७ करोड फ्याःगु दु ।
थ्व ध्यबा फुक्क स्थानीय तहय् कृषि ज्ञान केन्द्र, कृषि पशुपंक्षी एवं मत्यस्यपालनया बीमाय् पुलेमाःगु शुल्कया अनुदान, कृषि कर्जाय् व्याज अनुदान, कृषि उपकरण खरिदय् अनुदान, प्रशोधन कारखानाया स्थापनाय् अनुदान बीगु निंतिं खर्च याइगु जुइ ।
अथेहे मुक्त कमैया, हलियाया पुनःस्थापनाया ज्या यायेत स्वंगू अर्ब ८९ करोड, २६ गू जिल्लाय् गरिब परिवारयात राज्य सुरक्षा परिचयपत्र बीत ६३ करोड ७२ लाख तका दां नं विनियोजन याःगु दु ।
वन तथा वातावरणया निंतिं १६ अर्ब ५८ करोड ७५ लाख विनियोजन याःगु दुसा प्रत्येक प्रदेशय् उद्योग पूर्वाधार दयेकेत २८ करोड दां फ्याःगु दु । अथेहे वाणिज्य तथा आपूर्ति क्षेत्रया विकास व प्रवद्र्धनया निंतिं १० अर्ब ४४ करोड ९२ लाख तका फ्याःगु दु । वाणिज्य व आपूर्ति क्षेत्रया विकास व प्रवद्र्धनया निंतिं झिगू अर्ब ४४ करोड ९२ लाख तका फ्याःगु दुसा पर्यटन क्षेत्र विकासया निंतिं न्यागू अर्ब २० करोड ३द्ध लाख फ्याःगु दु ।
अथेहे हवाई पूर्वाधार क्षेत्रय् सरकारं वइगु आर्थिक दँय् १९ अर्ब ३५ करोड खर्च यायेगु प्रतिबद्धता प्वंकूगु दु । त्वःतेगु लःया निंतिं २४ अर्ब न्यागू करोड ७५ लाख विनियोजन यासें सरकारं वइगु स्वदँया दुने सकलें नागरिकतय्थाय् आधारभूत त्वनेगु लः थ्यंकेगु सुनिश्चित यायेत वइगु आर्थिक दँय् ल्यं दुगु योजना पूवंकेगु खँ धाःगु दु ।
सिँचाइ व खुसि नियन्त्रणयात पाथमिकता बियाः निर्माणाधिन आयोजनायात तीव्रता बीगु धासें झिगू अर्ब ९९ करोड ३९ लाख विनियोजन याःगु दुसा न्हूगु प्रविधिइ आधारित सौर्य सिँचाइयात अनुदान बीत ३५ करोड छुटे याःगु दु । वइगु झिदँयात ऊर्जा दशक रुपं मने यायेगु धासें थ्व क्षेत्रय् ८३ अर्ब ८९ करोड ५२ लाख तका विनियोजन याःगु दु ।
भवन व शहरी विकासया निंतिं ३३ अर्ब ३७ करोड ८९ लाख तका विनयोजन याःगु दुसा यातायात पूर्वाधार विकासया लागि छगू खर्ब गुंगू अर्ब ३८ करोड ३७ लाख बजेट फ्याःगु दु । अथेहे पुनर्निर्माणया निंतिं छगू खर्ब ५१ अर्ब, ८ करोड १३ लाख छुटे याःगु दु । स्थानीय पूर्वाधार मध्ये प्रत्येक निर्वाचन क्षेत्रयात प्यंगू करोड, साविकया सीमा क्षेत्र विकास कार्यक्रमया निंतिं निगू अर्ब स्वंगू करोड, खुगू लाख, यातायाता ताँ दयेकेत स्वंगू अर्ब ११ करोड ४० लाख बजेट फ्याःगु दु ।
उद्योगयात आवश्यक बजेट मदु
येँ – अर्थमन्त्री युवराज खतिवडां मंगलवाः संसदय् न्हयब्वःगु आर्थिक दँ २०७५–७६ या बजेटयात कयाः निजी ख्यःया मिश्रित प्रतिक्रिया वःगु दु । नेपाल उद्योग वाणिज्य महासंघया अध्यक्ष भवानी राणां कृषि लगायतया उत्पादन क्षेत्रया प्रवद्र्धनया निंतिं हःगु बजेट सकारात्मक जूगु खँ धयादीगु दु । लिसें वय्कलं धयादीगु दु, ‘उद्योगपाखें रोजगारी बीगु धाःसां आवश्यक बजेट फ्याःगु खनेमदु ।’
नेपाल उद्योग परिसंघया अध्यक्ष हरिभक्त शर्मां स्थिर सरकारया नातां सहसिक व युगान्तकारी बजेट वइ धकाः च्वनागु खःसा अज्याःगु वःगु खनेमदु धयादीगु दु । वय्कलं धयादिल, ‘रोजगार सिर्जना यायेगु खँ भाषणय् वःसां उद्योग क्षेत्रयात छुटे याःगु बजेट स्वयेबलय् थ्व सम्भावना खनेमदु । बजेट पुलांगुया हे निरन्तरता जक खः ।’
नेपाल उद्योग वाणिज्य संघया पुलांम्ह अध्यक्ष चण्डीप्रसाद ढकालं तःधंगु आधारया बजेटं फुक्कयातं सम्बोधन यायेत स्वःसां औद्योगिक प्रवद्र्धन गुकथं यायेगुध यागु प्रस्ट याःगु मदु धयादिल । अथेहे नेपाल चेम्बर्स अफ कमर्सया पूर्वमहासचिव कमलेशकुमार अग्रवालं लगानीकर्तायात प्रोत्साहन याइगु सकारात्मक खँ दुसां आन्तरिक त्यासां बजेट चलवे यायेगु धयागु तसकं हाथ्यां जाःगु ज्या जूगु टिप्पणी यानादीगु दु ।
LEAVE YOUR COMMENTS