नेपाःया बजारय् लुँ व वहःया भावय् न्हूगु रेकर्ड

येँ (नेपालभाषा टाइम्स)- नेपाःया लुँ वहः बजारय् लुँ व वहः निगुलिंनं न्हूगु रेकर्ड तःगु दु । म्हिगः नेपालय् लुँ तोलां १ लाख १३ हजार ६०० तका थ्यनाः न्हूगु रेकर्ड कायम जूगु खः । थ्व स्वयां न्ह्यः लुँया भाः १ लाख १३ हजार ३०० तक थ्यनाः रेकर्ड कायम जुयाच्वंगु खः ।

अन्तर्राष्ट्रिय बजारय् म्हिगः लुँ प्रतिऔश १९९४ डलर थ्यंगु खः । थ्व स्वयां न्ह्यः २०२२ डलर थ्यनाः कुहां वःगु लुँयागु भाः अमेरिका व चीन दथुया स्वापू स्यनेवं लगानीकर्तात लुँया आकर्षित जूगुलिं लुँया भाः हानं थहां वंगु खँ नेपाल सुनचाँदी व्यवसायी महासंघया पुलांम्ह अध्यक्ष तेजरत्न शाक्यं नेपालभाषा टाइम्सयात कनादिल ।

वय्कःया कथं लुँया भाः थहां वनेगुली चीन व अमेरिकाया स्वापू अले रुस–युक्रेन युद्धया प्रमुख ल्हाः दयाच्वंगु खनेदु । अमेरिक व चीन दथुइ ८०० विलियन डलरया कारोबारं ब्वलनाच्वंगु कचवंयात सामान्यीकरण यायेगु निंतिं अमेरिकी विदेश मन्त्री चीन भ्रमण वंगु खःसां अन खँ मिले मजुइवं लगानीकर्तातय्सं लुँइ लगानी यायेवं अन्तर्राष्ट्रिय बजारय् लुँया भाः थहां वंगु खँ विश्लेषक शाक्यं कनादिल ।

वय्कलं धयादिल, ‘अमेरिकी विदेश मन्त्री चीन भ्रमणय् वनेवं लगानीकर्तात मेगु क्षेत्रय् लगानी यायेफइगु खँय् आशावादी जुयाच्वंगु खः । तर निगू देय् दथुइ न्ह्याःगु वार्ता ताःमलायेवं लगानीकर्ता सुरक्षित लगानीया नितिं लुँइ आकर्षित जूगु खनेदु ।’

उकथं हे अन्तर्राष्ट्रिय बजारय् डलरया भाः कुहां वंगुलिं नं लगानीकर्तात लुँइ आकर्षिक जूगु खनेदु । लुँया भावं नेपालय् रेकर्ड ब्रेक याःसां अन्तर्राष्ट्रिय बजारय् धाःसा रेकर्ड ब्रेक मजूगु खँ शाक्यं कनादिल । नेपालय् लँुया भावय् रेकर्ड ब्रेक जूगु कारण सरकारं लुँया आयातय् तःगु कर खः । सरकारं लुँ आयातय् थप कर कायेवं लुँया भावं न्हूगु रेकर्ड तःगु खः ।

उकथं हे वहःया भावय् नं म्हिगः रेकर्ड ब्रेक जूगु दु । थ्व स्वयां न्ह्यः २०७९ चैत २९ गते वहःया भाः १४५० तका थ्यनाः रेकर्ड ब्रेक जूगु खःसा म्हिगः वहःया भाः १४९५ तका कायम जूगु दु । शाक्यया कथं आः लुँया भाः अझ नं थहां वनाः न्हूगु रेकर्ड कायम जुइफु, अन्तर्राष्ट्रिय बजारय् न्हिथं लुँया भाः थहां वनाच्वंगुलिं उकिया लिच्वः नेपालय् नं लाइ ।