लुँया भावं ९० हजार पार यात

येँ (नेपालभाषा टाइम्स) – अन्तर्राष्ट्रिय बजारय् लुँया भाः थहां वनेवं नेपालय् लुँया भावय् न्हूगु रेकर्ड कायम जूगु दु। म्हिगः तेजाबी लुँ छतोलाया ९०६०० तका थ्यंगु दुसा छापावाल लुँ छतोलाया ९०१६० तका थ्यंगु दु। अथेहे वह तोलाया ९४० तका कायम जूगु दु ।

वंगु शुक्रवा तक ८९९०० तकां काराेबार जूगु लुँ म्हिगः हाकनं भाः थहां वनाः ९० हजार पार याःगु खः । लुँया भाः थहां वंगु बारे नेपाल सुनचाँदी व्यवसायी महासंघया पुलांम्ह अध्यक्ष लिसें बजार विश्लेषक तेजरत्न शाक्य अन्तर्राष्ट्रिय बजारय् लुँया भाः थहां वंगुलिं उकिया प्रभाव नेपालय् नं लाःगु खँ कनादीगु दु ।

वय्कःया कथं कोराेना भाइरसया कारणं यानाः अन्तर्राष्ट्रिय रूपं लगानी यायेगु थाय्या अभाव जुइवं आपालं लगानीकर्तात लुँइ लगानी यायेत आकर्षित जूगुलिं बजाः भाः थहां वंगु खः । वंगु शुक्रवाः तक अन्तर्राष्ट्रिय बजारय् प्रतिऔंश लुँया भाः १७२६ डलर कायम जूगु खःसा म्हिगः १८ डलर प्रतिऔंश थहां वनाः १७४४ डलर कायम जूगु खः ।

अन्तर्राष्ट्रिय बजारय् सन् २०२० या अन्त तकया दुने प्रतिऔंश लुँया भाः १८०० डलर थ्यनीगु अनुमान यानातःगु दुसां कोराेना भाइरसया संक्रमणया कारणं लगानी यायेगु थाय् मदयाः छुं न्हिं दुने हे १८०० डलर थ्यनीगु अनुमान नं वय्कलं यानादीगु दु। लुँया भाः थहां वनेगुया लिसें नेपाःया ध्यबा नं अवमूल्यन जूगु दु। म्हिगः प्रति १ डलर बराबर नेपाःया ध्यबा १२२ तका कायम जूगु दु ।

महासंघया कथं वहःया भाः नं थहां वंगु दु। वंगु शुक्रवाः तक ९३० प्रतितोला कायम जुयाच्वंगु खःसा म्हिगः प्रतितोला १० तका थहां वनाः ९४० तका कायम जूगु खः ।