ब्वयाच्वंगु जहाजलिसे साक्षात्कार

झीसं हवाइजहाज ब्वयाच्वंगु ला यक्व हे खना । गुलिखे मनूत ला हवाइजहाजय् च्वनाः यात्रा नं यायेधुकूपिं दु । थथे हवाइजहाज ब्वइगु इलय् सतिकं स्वयेगु अवसर धाःसा उलि दइमखु, गुलि ग्रीसया छगू द्वीपय् वनाः उकिया साक्षात्कार याये खनी । ग्रीसय् स्किथोस नांया छगू द्वीप दु । गुगु विश्वय् हे मानव जीवनय् अतिकं दुर्लभ प्रकारया व बिस्कंकथंया अनुभूतिया निंतिं नां जाः ।

झीसं हवाइजहाज ब्वयाच्वंगु यक्व हे खना, विमानस्थलय् हे वंसां नं उलि सतिकं जहाज ब्वःगु स्वये खनीमखु, गुलि ग्रीसया थ्व स्किथोस द्वीपय् वनाः स्वये खनी । थ्व द्वीपय् मनूत जमिनय् दना च्वँच्वं हे ब्वयाच्वंगु जहाजलिसे तसकं हे सतिकं साक्षात्कार याये खनी । माने यानादिसँ कि थ्व द्वीपय् दनाः छिं ब्वया च्वंगु जहाजयात ल्हातं हे न्ह्याये दइ ।

उकिं हे थ्व स्किथोस द्वीप पर्यटकया निंतिं बिस्कंया छगू आकर्षणया केन्द्र जुया बिउगु दु । ग्रीसया स्किथोस अन्तर्राष्ट्रिय विमानस्थलया रनवे नं स्किथोस द्वीप स्वयां छुं भचा जक तापाक दु अले समुद्र व विमानस्थलया रनवेया दथुइ छगू सतक दु । थ्व हे सतक सिथय् दनाः पर्यटकतय्सं विमानस्थलय् जहाज अवतरण जूगु अलौकिक दृश्यया अवलोकन याये फइ ।

विमानस्थलया रनवेय् अवतरण यायेत्यंगु जहाजयात स्वयेबलय् गनं व हे सतकय् जकं अवतरण यायेत्यंगु खःला धइथेंज्याःगु अनुभूति जुइ । थ्व द्वीपया जमिनय् दनाच्वंपिं मनू व रनवेय् अवतरण यायेत्यंगु जहजाया दूरी गुलि सतिकं साक्षात्कार याये फइ उलि विश्वया गुगुं नं थासय् सम्भव जुइमखु ।

विमानस्थलया रनवे तसकं हे चीहाकः जूगुलिं नं उगु विमानस्थलय् जहाज अवतरण यायेगु झ्वलय् विमानं रनवेया शुरुवाती विन्दुइ हे जमिनय् कुहां वयेमाःगु बाध्यताया कारणं थथे जूगु खः । तर थ्व हे नं पर्यटकतय् निंतिं दुर्लभ आकर्षणया केन्द्र जुयाच्वंगु दु ।