चर्चा नेवाः शर्ट फिल्मया

शर्ट फिल्म धइगु छु खः धइगुबारे इलय्ब्यलय् चर्चा जुयाच्वं । नेवाः फिल्म सोसाइटीया ग्वसालय् थ्वहे वालय् तिनि शर्ट फिल्मयात कयाः छगू प्रशिक्षण ज्याझ्वः जुल । उगु ज्याझ्वलय् थीथी विषयया विज्ञपिंसं शर्ट फिल्मया थीथी पक्षयात कयाः प्रशिक्षण बिल । विश्व विख्यात फिल्मविज्ञ रशेल सिम्पसनया धापु कथं पीगू मिनेटसिबें चिहाकःगु दक्वं फिल्म शर्ट फिल्मया दर्जाय् लाइगु खनेदु ।

एकेडेमी अफ मोशन पिक्चर्स आर्ट्स एण्ड साइन्सेज(ओस्कार एकेडेमी)या धापु नं थ्वहे ज्वःलाः । थ्व ल्याखं स्वयेबलय् नेपालभाषाया न्हापांगु शर्ट फिल्म “मुद्दा” खः धइगु खनेदु । थ्यंमथ्यं नीगू मिनेटया थ्व फिल्मया निर्देशक रत्नकाजी लुनिभाः खः ।

नेपालभाषाया न्हापांगु शर्ट फिल्म
थःगु मांभाय् बाहेक मेगु अदालती भाय् मसयाः थःगु पैतृक सम्पत्तीया मुद्दाय् अदालतं बुकाहःम्ह छम्ह नेवाः मिसाया बाखं कःघानातःगु थ्व छगू च्वछायेबहगु फिल्म खः ।थ्व सिबें न्हापा “पःखाः”यात नेपालभाषाया न्हापांगु शर्ट फिल्मया रुपय् कयातःगु ख ।

नांजाःम्ह ख्यालिम्वः, कलाकार व फिल्म निर्देशक रामशेखर नकःमिया ग्वाहालिं तयार जूगु “पःखाः”या निर्देशक रोशन नवीन ताम्राकार खःसा थ्व फिल्म नांजाःम्ह साहित्यकार पूर्ण पथिकया निपु बाखं “अन्धकार” व “पःखाः” या लिधंसा कयाः दयेकातःगु खः । थ्व फिल्म मूक्कं ४८ मिनेट व ३० सेकेण्ड दुगुलिं यानाः थुकियात शर्ट फिल्म धायेमछिं ।

शर्ट फिल्मया यात्रा
विशेष यानाः शर्ट फिल्म धालकी राष्ट्रिय वा अन्तर्राष्ट्रिय फिल्म फेस्टिभलय् ब्वति कायेगु ताःतयाः दयेकीगु खःसा आः वयाः युट्युब वेबसिरिज नं शर्ट फिल्मया निंतिं स्वकुमि नापलायेगु थाय्या रुपय् विकास जुया वयाच्वंगु दु । राष्ट्रिय वा अन्तर्राष्ट्रिय फिल्म फेस्टिभलया खँ ल्हायेगु खःसा नेवाः शर्ट फिल्मया पलाः उखेपाखे उलि न्ह्याःगु खनेमदुनि ।

तर नेपालय् दुने जुइगु छुं छुं अन्तर्राष्ट्रिय फिल्म फेस्टिभलय् धाःसा नेवाः फिल्मं ब्वति कया वयाच्वंगु दु । अज्याःगु शर्ट फिल्मय् निर्देशक मय्जु सुनिता राजभण्डारीं दयेकूगु “१२ दिन” छगू नं खःसा मेम्ह निर्देशक मय्जु लुनिभा तुलाधरं दयेकूगु “ब्वयेगु मन्तुना” छगू नं खः । “१२ दिन” विशेष यानाःनेवाः तजिलजि कथंया मिसामचायात बाह्राः तयेगु संस्कार व परम्परायात कयाः दयेकातःगु खःसा थुकियात शर्ट फिल्म सिबें डकुमेण्ट्री कथं कायेमाः ।

नेवाः तजिलजियात कःघानाः दयेकातःगु “समिलु” छगू कथंया डकुमेण्ट्री ल्वाकज्याःगु ड्रामा खः यानिकी डकुड्रामा खः । थुकिया निर्देशक नं लुनिभाः तुलाधर हे खः । थन न्ह्यथनागु स्वंगुलिं शर्ट फिल्म छगू इलय् आइफा नांयागु संस्थां ग्वसाः ग्वइगु नेपाल इण्टरनेशनल इन्डिजिनस फिल्म फेस्टिभलय् ब्वति काःगु शर्ट फिल्म खः ।

थथे नेपालय् जूगु अन्तर्राष्ट्रिय फिल्म फेस्टिभलय् ब्वति काःगु फिल्मय् त्वःफिके मजिउगु नां धइगु निर्देशक राकेशमहर्जनया “कल्ली” खः । थ्व फिल्म धरानय् जूगु छगूअज्याःगु हे फिल्म फेस्टिभलय् ब्वति काःगु जक मखसे सिरपाः तकं त्याकेत ताःलाःगु खः । थ्व “कल्ली” फिल्मं नेपालं पिने फिल्म फेस्टिभलय् ब्वति कयाः सिरपा त्याकूगु खँ लुमंकेमा ।

नेपालय् दुने किम्फ धकाः काठमाण्डौं इन्टरनेशनल माउण्टेनियरींग फिल्म फेस्टिभल, निफ धकाःनेपाल इन्टरनेशनल फिल्म फेस्टिभल लगायतया आपालं अन्तर्राष्ट्रिय फिल्म फेस्टिभलय् नं नेवाः शर्ट फिल्म दुथ्यानाच्वंगु दु । निक्वःगु निफय् निगू नेवाः फिल्म दुथ्यात । उकी मध्ये छगू निर्देशक रामकृष्ण खड्गीया “अस्तित्व” खःसा मेगु निर्देशक दर्शनवीर शाक्यया “द मिथ जिरो” नं खः ।

न्हापांगु शर्ट फिल्म कासाया देन
नेपालभाषाया शर्ट फिल्मया विकासया निंतिं मच्छिन्द्र क्लबं याःगु शर्ट फिल्म कासाया तःधंगु ल्हाः दु धायेमाः । थ्व कासाय् थीथी विषय कःघाना दयेकातःगु १७ गू नेवाः शर्ट फिल्मं ब्वति काःगु खः ।उकी मध्ये निर्देशक मनोजरत्न शाहीया “सः” फिल्म बालश्रम विरुद्धया सःया रुपय् दयेकातःगु दु ।

राष्ट्रिय वा अन्तर्राष्ट्रिय फिल्म फेस्टिभलया खँ ल्हायेगु खःसा नेवाः शर्ट फिल्मया पलाः उखेपाखे उलि न्ह्याःगु खनेमदुनि । तर नेपालय् दुने जुइगु छुं छुं अन्तर्राष्ट्रिय फिल्म फेस्टिभलय् धाःसा नेवाः फिल्मं ब्वति कया वयाच्वंगु दु ।

उगु कासाय् नेवाः फिल्मख्यःया नांजाःम्ह निर्देशक आर्यम नकःमिया “तिकिझ्यालं” फिल्मय् थौंकन्हय् आधुनिक जुयावःगु समाजय् मनूतय्गु पानावंगु माया मतिनाया बाखं दु । छम्ह छुं नं लजगाः ज्वने मफुम्ह मिजनं परिवारया निंतिं याइगु त्यागया बाखं दुगु “मू” फिल्मया निर्देशक रविन्द्र शाही खः ।

राकेश महर्जनं दयेकूगु “याकःसू” फिल्मय् थौंया आधुनिक समाजय् मस्त गथे याकःचा जुया वन धइगु बाखं न्ह्यब्वयातःगु दु । ई हिलावंलिसे मनूतय्गु रुपजक मखु प्रवृति नं हिलावनेफु धइगु बाखं दुगु “स्वापु”या निर्देशक सचिन शाक्य खः । निर्देशक अमृतचन्द्र श्रेष्ठया “खःगु ज्या मखुगु ज्या” फिल्मय् खःगु ज्या व मखुगु ज्या दथुया भिन्नता न्ह्यब्वयेगु कुतः यानातःगु दु ।

मनुखं झंगः लायेफु तर मनूया आत्मां झंगः लाइमखु धइगु सन्देश ज्वनातःगु “अंगू” नांयागु फिल्म हरर शैलीया फिल्म खः । थ्व फिल्मया निर्देशक सुदीप तुलाधर खः । निर्देशक कीर्ति श्यामसुन्दर जोशीया “लिधंसा” य् थःगु भविष्यया लिधंसा धकाः धयातःम्ह कायम्हेसिनं मां अबुया निंतिं छु यात धयागु क्यनातःगु दुसा निर्देशक रुपिन डंगोलया “थ्व समस्या सुयागु भुल”य् वर्तमान समाजय् मस्तसें भोगेयानाच्वंगु समस्यायात क्यनातःगु दु ।

सतक विस्तारया नामय् थुनाच्वंगु छेँय्या विरुद्धय् थ्वयेमाःगु सःयात कया दयेकातःगु “द मिथ”या निर्देशक दर्शनवीर शाक्य खः । नारी अधिकारवादी धकाः धया जुइम्ह छम्ह मिसाया छेँय् मेम्ह मिसाया अवस्था क्यनातःगु “मिखाः दुपिं कां”या निर्देशक सुरेन्द्र मानन्धर खः । कलाःभाःत दथुया कचवंया लिच्वः छु तक जुइयः धका क्यनातःगु “वाःचाः”या निर्देशक रवि साय्मि खः ।

छम्ह सतक मचाया म्हगसयात कयाः दयेकातःगु “आज्जु”या निर्देशक रविन जोशी खः। कलाकारं निर्देशक जूम्ह भीमसेन रिसालं दयेकूगु “छिपिं नं मां अबु जुइतिनि” फिल्मय् थौंया समाजय् मां अबु व मस्त दथुइ ब्वलना च्वंगु तापासुयात क्यनातःगु दु । नेपालभाषाया संकिपा ख्यलय् बिस्कं हे म्हसिका दुम्ह सुरेन्द्र तुलाधरया निर्देशनय् दयेकूगु “ध्याचलय् ह्वयाच्वंगु स्वां” फिल्मय् छम्ह सतक मचाया जीवनया संघर्ष क्यनातःगु दु ।

उगु शर्ट फिल्म कासाय् दुथ्याःगु फिल्मत मध्ये छम्ह हे जक मिसा निर्देशक कथं प्रमिला मानन्धरया “पियाच्वना” फिल्मय् सु नं कलाकार तयातःगु मदु । पात्रया सः व ल्हाःयापाखें जातिय पहिचान म्वाकेया निंतिं यायेमाःगु संघर्षया विचार अभिव्यक्त याकातःगु दु । अथेहेतुं निर्देशक चन्द्रमान डंगोलया “झीगु नेवाः” फिल्मय् नं छुं विशेष पात्र छ्यलातःगु मदु । थ्व फिल्मय् नेवाः तजिलजिया माध्यमं नेपाःया चित्रण यानातःगु दु ।

अनंलिपा
अनंलिपा नेवाः शर्ट फिल्मया ख्यलय् थगुने छगू नं मेगु चीहा संकिपा कासा जुल । जनकवि दुर्गालाल फाउण्डेशनया पासापिं मध्ये अमेरिकाय् च्वंम्हप्रवीण ताम्रकार व नेपाः दुनेयापिं सुमन श्रेष्ठ,पवित्र कसाः व सुरेशकिरण मानन्धर जानाः ग्वसाःग्वःगु न्हापांगु नेपालभाषा चिसंकिपा कासाया नामं जूगु थ्व कासा धाःसा मेमेगु फिल्म कासा व फिल्म महोत्सव सिबें भचा पाःगु खनेदत ।

भाषा म्वासाः जाति म्वाइ , झीगु भाषा मन्त धाःसा लगायत थीथी मूचु ज्वनाः फिल्म दयेकेबिउगु उगु कासाय् मुक्कं झिगू नेवाः शर्ट फिल्मं ब्वति काल । उगु कासाय् मय्जु सुनिता राजभण्डारीं दयेकूगु “हाःसःमदुगु सः” शर्ट फिल्मं न्हाप सिरपा त्याकलसा दर्शनवीरया “द मिथ जिरो” यात लिउ सिरपाः वःगु खः ।

अथेहेतुं निर्देशक रामकृष्ण खडगीया “अस्तित्व” व पोखराया यादव भोछिभोयया “भकुंग्वारा ख्याः” शर्ट फिल्मं हःपाः सिरपा त्याकल । थुकथं नेवाः शर्ट फिल्मया पलाः न्ह्याकेत थ्व कासा नं तःधंगु ग्वाहाली सिद्ध जूगु दुसा थ्व कासाया ग्वसाःमिपिंसं आः निक्वखुसीया चिसंकिपा कासाया निंतिं नेवाः साहित्ययात मू विषय यायेमाः धकाः क्वछिउगु दु ।

युट्युब
शर्ट फिल्म व म्युजिक भिडियोया निंतिं युट्युब छगूतःधंगु प्लेटफर्मया रुपय् विकास जुया वयाच्वंगु दु । मेमेगु भाषा व देशया शर्ट फिल्मत थौंकन्हय् युट्युबय् आपालं स्वये दयाच्वंगु दुसा नेपालय् खँय् भाय्या शर्ट फिल्मत युट्युबय् आपालं पिहां वयाच्वंगु दु । नेवाः शर्ट फिल्मया ख्यलय् धाःसा थज्याःगु पलाः न्यालाखुला न्ह्यःतिनि न्ह्याःगु दु ।

थ्व च्यानलया निंतिं शर्ट फिल्म दयेकेगु भाला युवा फिल्ममेकर योवन शाक्य व उमेश स्थापित जानाःन्ह्याकाच्वंगु दु । थ्व च्यानलय् आः तक पिदंगु शर्ट फिल्मय् “नेवाः म्युजियम”यात आपासिनं ययेकूगु दुसा साइलेन्ट मुभिया रुपय् दयेकूगु “स्वन्हु”या नं तारीफ हे जूगु दु ।

अथेहेतुं “स्वापु” व “हाकुगु पौ”यात ययेकुपिं आपालं हे दु । थ्व च्यानलय् थुगुसी अन्तर्राष्ट्रिय मातृभाषा दिवसया लसताय् अपलोड याःगु “बचं” नांयागु शर्ट फिल्मयात आपाःसिनं ययेकूगु दु ।

बचंया खँ
थ्व “बचं”या सर्जक आर्यम नकःमि खः । आर्यम नेवाः फिल्म ख्यःया छगः धिसिलाःगुथां खः । लोकंह्वाम्ह फिल्ममेकरं दयेकूगु थ्व शर्ट फिल्मय् नेवाः फिल्मया तसकं हे लोकंह्वाःम्ह हिरोइन आशिष्मा नकःमि व नेवाः फिल्मया नांजाःम्ह हिरो राजु महर्जनपिंसं मेन रोल म्हितातःगु दु ।

उलिजक मखसे थ्व फिल्मय् अभिभावक थःम्हेसिनं हे मस्तय्त थःगु मांभाय्पाखें तापाका यंकाच्वंगु खः धइगु खँयात स्याचुक्क न्ह्यब्वयातःगु दु । शर्ट फिल्म धइगु हे छुं नं स्याचुक्क अले नुगलय् थिइक न्ह्यब्वयेगु माध्यम खः धइगु खँ नं थ्व “बचं”फिल्म याउँक हे क्यना बिउगु दु ।

सम्बन्धित बुखँ

LEAVE YOUR COMMENTS