खान हिरोतय् हाथ्या अक्षय कुमार

बलिउडय् खान हिरोत धालकि सुपरस्टारया दर्जाय् लानाच्वंपिं हिरोत खः । शाहरूख खान, आमिर खान व सलमान खान धयापिं थज्याःपिं स्वम्ह खान हिरोत खः, गुम्हेसिया फिल्मं बलिउडया बक्स अफिसय् शासन हे याना वयाच्वंगु खः । खान हिरोतय्गु न्हूगु फिल्म वइगु जुलकि बलिउडय् छगू कथंया हलचल हे जुइ ।

तर आः वयाः खान हिरोतय्गु फिल्मं स्वकुमिया नुगः त्याकेत थाकुयावःगु दु । थ्वहे निदँप्यदँ दुने शाहरूख खानया “दिलवाले”, “रईस”, “फाय्न” लगायतया आपालं फिल्मया बनेज्या ताःलायेमफुत । अथेहे तुं सलमान खानया “ट्युबलाईट”, “रेस थ्री” थेंज्याःगु फिल्मयात नं स्वकुमितसें मययेकल ।

उलि जक मखसे बलिउडया मिस्टर पर्फेक्टनिस्ट यानि कि छुं नं फिल्म म्हितीबलय् एकदम हे बांलाकेगु कुतः याइम्ह धकाः नांजाःम्ह आमिर खानया “ठग्स अफ हिन्दुस्तान” नांयागु फिल्मं तकं स्वकुमिया नुगः त्याके मफुबलय् थ्व फिल्म फ्लप जूगुया जिम्मेवारी तकं थःम्हसिनं हे काल । अले छुं ईया निंतिं फिल्म म्हितेगु ज्यापाखें हे दिपाः तकं काल ।

थुकथं खान हिरोतय्गु फिल्मं स्वकुमिया नुगः साले मफयाच्वंगु इलय् छम्ह अज्याःम्ह हिरोया फिल्मं फिल्मया लाय् सालेत जक ताःलानाच्वंगु मखसे स्वकुमिया नुगः नं याउँक हे त्याका क्यनाच्वंगु दु । थथे स्वकुमिया नुगः त्याकाच्वंम्ह हिरो मेम्ह सुं मखसे अक्षय कुमार खः ।

लाबला न्ह्यःतिनि पिदंगु वयागु न्हूगु फिल्म “मिशन मंगल” ला थुगुसीया हे आः तकया दकलय् अप्वः बनेज्या याःगु हिन्दी फिल्मया रुपय् न्ह्यःने लाःगु दुसा थ्व फिल्मयात भारतया थीथी प्यंगू भासं रिलिज याःगु फिल्म “साहो” या हिन्दी भर्सनं तकं त्याके फइगु खनेमदु ।

खान स्टारतय्गु फिल्म धमाधम फ्लप जुयाच्वंगु थ्व निदँप्यदँ दुने अक्षय कुमारया “ट्वाईलेट ः एक लभस्टोरी”, “बेबी”, “पाय्डमाय्न” लगायतया आपालं फिल्मं स्वकुमिया नुगः त्याकूगु जक मखसे बनेज्याया झ्वलय् नं यक्व हे न्ह्यःने लायेत ताःलाःगु खः । उलि जक मखसे साउथया मेगास्टार कथं नांजाःम्ह हिरो रजनीकान्तया मेनरोल दुगु “२.०” य् अक्षय कुमारं म्हितूगु नेगेटिभ रोलं तकं स्वकुमिया नुगः त्याकेत ताःलाःगु धइगु अक्षय कुमार गुलि लोकंह्वाः धइगु खँया दसु खः ।

खान हिरोतय्गु फिल्मं स्वकुमिया नुगः साले मफयाच्वंगु इलय् छम्ह अज्याःम्ह हिरोया फिल्मं फिल्मया लाय् सालेत जक ताःलानाच्वंगु मखसे स्वकुमिया नुगः नं याउँक हे त्याका क्यनाच्वंगु दु । थथे स्वकुमिया नुगः त्याकाच्वंम्ह हिरो मेम्ह सुं मखसे अक्षय कुमार खः ।

खान हिरोतय्त हाथ्या बीत ताःलाःम्ह अक्षय कुमारं खान हिरोत मध्ये छम्ह सलमान खानलिसे “मुझसे शादी करोगे” व “जानेमन” नांयागु निगू फिल्मय् नापं म्हितूगु दु । उकी मध्ये “मुझसे शादी करोगे” फिल्मय् अक्षय कुमारं भतिचा नेगेटिभ छाप दुगु रोल म्हितूगु खःसा थ्व रोलय् वयात आपाःसिनं ययेकूगु खः ।

अक्षय कुमारं यक्व न्हापा शाहरूख खानलिसे “दिल तो पागल है” फिल्मय् नापं म्हितूगु दु । शाहरूख खानया मेन रोल दुगु थ्व फिल्मय् अक्षय कुमारया रोल धाःसा बःचाहाकःगु जक खः, अय्सां वं उगु फिल्मय् थःगु उपस्थितियात बांलाक हे क्यनाः आपाःसिया नुगः सालाकाःगु खः । आःतक अक्षय कुमारं आमिर खानलिसे फिल्म म्हितूगु मदुनि ।

खान हिरोतय् निंतिं हाथ्या जुया वयाच्वंम्ह अक्षय कुमारं आः वयाः खान हिरोतय्सं थःगु फिल्म रिलिज यायेत फ्याना वयाच्वंगु रिलिज डेटय् हे थःगु फिल्म रिलिज यायेगु तयारी यानाच्वंगु दु । बलिउडय् दिवाली यानिकि स्वन्तिया ईयात खान हिरो शाहरूख खानं थःगु निंतिं तसकं त्वःगु डेटया रुपय् कया वयाच्वंगु खःसा आः वयाः थुगुसीया दिवाली रिलिज कथं “हाउसफुल ४” रिलिज जुइगु जूगु दु ।

आकिवं दिवाली रिलिज कथं अक्षय कुमारया “पृथ्वीराज” रिलिज जुइगु खँ दु । विशेष यानाः शाहरूख खानया फिल्म रिलिज जुइगु दिवालीबलय् थुगुसी व आकिवं अक्षय कुमारया फिल्म रिलिज जुइत्यंगु खँयात बलिउडय् तःधंगु हिउपाःया रुपय् कयाहःगु दु । सन् १९९३ या दिवालीया इलय् शाहरूख खानया “बाजिगर” रिलिज जूगु खःसा थ्व फिल्म सुपरडुपर हिट जूगु खः ।

व धुंकाः १९९५ या दिवालीया इलय् वयागु “दिलवाले दुल्हनिया लेजाएँगे” रिलिज जुलसा १९९९ या दिवालीबलय् “बादशाह”, सन् २००० या दिवालीइ “मोहब्बतें” रिलिज जुल । वयां लिपा डन, कुछ कुछ होता है, ओम शान्ति ओम, ह्याप्पी न्यू एयर नं दिवालीया ई स्वयाः रिलिज जूगु फिल्म खःसा दक्वं फिल्म हिट नं जुल ।

तर लिपा वनाः शाहरूख व काजोलया हिट जोडी दुगु “दिलवाले” धाःसा दिवालीया ई ताके यानाः रिलिज याःगु खःसां थ्व फिल्म धाःसा हिट मजुल । बलिउड फिल्मपाखे नुगः क्वसाःपिंसं सिउगु हे खँ जुइमाः कि आमिर खानया फिल्म क्रिश्चियन धर्मावलम्बीतय्गु पवित्र पर्व क्रिसमसया इलय् जुइगु याना वयाच्वंगु दु ।

आमिर खानया सुपरडुपर हिट जूगु गुलिखे फिल्म क्रिसमसबलय् हे रिलिज जूगु खः । वयागु पिके, धुम थ्री, थ्री ईडियट्स, तारे जमिनपर, गजिनि थेंज्याःगु फिल्म क्रिसमसया इलय् हे रिलिज जूगु खः । थथे आमिर खानया फिल्म रिलिज जुइगु ई कथं फ्यानातःगु ई नं आः वयाः अक्षय कुमारया फिल्मं काइगु जूगु दु ।

थुगुसीया क्रिसमसय् अक्षय कुमारया “गुड न्यूज” नांयागु फिल्म वइगु खँ दु । थ्व फिल्मय् वलिसे करीना कपुर व कियरा आडवानी निम्ह हिरोइनया रुपय् खनेदयेकः वयेत्यंगु दुसा आकिवंया क्रिसमसया इलय् अक्षय कुमारया मेगु फिल्म “बच्चन पाण्डे” रिलिज जुइगु खँ दु । साउथ इण्डियन फिल्म “वीरम” या रिमेकया रुपय् दयेकाच्वंगु थ्व फिल्मयात बलिउडया छगू तसकं आस यायेबहगु फिल्मया रुपय् कयातःगु दु ।

आमिर खानया फिल्म रिलिज जुइगु ई लाकाः रिलिज जुइगु धका क्वछिनातःगु अक्षयया “बच्चन पाण्डे” यात धाःसा आमिर खानया हे न्हूगु फिल्म “लाल सिंह चड्डा” नं रिलिज जुइगु खँ दु । आमिर खान व अक्षय कुमारया फिल्मया थ्व धेंधेंबल्लाःयात आपाःसिनं आसकुति मिखां स्वयाच्वंगु दु ।

शाहरूखया दिवाली अले आमिरया क्रिसमस धइथें सलमान खानया फिल्म विशेष यानाः मुस्मां धर्मावलम्बीतय्गु तसकं हे तःधंगु पर्व इदया इलय् रिलिज जुइगु याना वयाच्वंगु दु । वयागु “वान्टेड” नांयागु फिल्म सन् २००१ या इदबलय् रिलिज जूगु फिल्म खःसा थ्व तसकं हे लोकंह्वाःगु फिल्म खः ।

अनंलिपा सन् २०१० या इदय् “दबंग”, २०११ या इदय् “बडीगार्ड”, २०१२ य् एक था टाईगर, २०१४ य् “किक”, २०१५ य् “बजरंगी भाइजान”, २०१६ य् “सुल्तान” तकया दक्वं फिल्म तसकं लोकंह्वाःगु खः । थुकथं इदया इलय् रिलिज जूगु सलमान खानया फिल्मत हिट सुपरहिट जूगु खनेदतसा थुगुसीया इदबलय् रिलिज जूगु वयागु “भारत” नांयागु फिल्म नं हिट हे जूगु खः ।

तर इदबलय् रिलिज जूगु सलमान खानया दक्वं फिल्म हिट हे जूगु धाःसा मखु । सन् २०१७ या इदय् रिलिज जूगु “ट्युबलाईट” फ्लप जूगु खःसा सन् २०१८ या इदय् रिलिज जूगु “रेस थ्री” नं हिट जुइ मफुगु फिल्म खः । इदय् थःगु फिल्म रिलिज याना वयाच्वंम्ह सलमान खानं थुगुसी इदबलय् रिलिज जूगु “भारत” हिट जुइधुंकाः आकिवं सन् २०२० या इदय् रिलिज यायेकथं “इन्शाअल्लाह” नांयागु न्हूगु फिल्म घोषणा याःगु खः ।

संजय लीला भन्सालीया कम्पनीं दयेकेत्यंगु “इन्शाअल्लाह” फिल्मयात कयाः आकिवं रिलिज जुइगु तसकं हे उल्लेखनीय फिल्मया रुपय् नं चर्चा जूगु खः । तर आः वयाः थ्व फिल्मय् सलमान खान मम्हितीगु जूगु दु । सलमानया थासय् मेम्ह खान शाहरूख खानं थ्व फिल्म म्हितीगु जूगु दुसा आकिवं इदबलय् आः सलमान खान व अक्षय कुमारया मखसे अक्षय कुमार व शाहरूख खान दथुइ टक्कर जुइगु जूगु दु ।

छाय्धाःसां आकिवंया इदबलय् अक्षय कुमार छम्ह विद्रोही मिसा जुयाः म्हिताच्वंगु “लक्ष्मी बम्ब” नं रिलिज जुइगु दु । थुकथं खान हिरोतय्त हाथ्या बिया वयाच्वंम्ह अक्षय कुमारया मेगु छगू महत्वपूर्ण फिल्म “सूर्यवंशम” नं आकिवं मार्च २७ कुन्हु रिलिज जुइत्यंगु दु ।

थुकथं थ्व दँबदँया दुने अक्षय कुमारया आपालं बांलाःगु फिल्म पिहां वयेत्यंगु दुसा वयात थज्याःगु फिल्मं न्यय्निदँया वैंशय् नं छम्ह धिसिलाःम्ह व लोकंह्वाःम्ह हिरोया रुपय् धस्वाका तइगु खँय् शंका यायेथाय् मदु धायेमाः ।

सम्बन्धित बुखँ

LEAVE YOUR COMMENTS