दुर्लभ विजयलिपा इंग्ल्यान्डयात विश्वकप क्रिकेट उपाधी

इंग्ल्यान्डं दुर्लभ विजय चूलाकुसें न्हापांखुसी विश्वकप क्रिकेटया उपाधी ल्हातय् लाकूगु दु । न्यूजिल्यान्ड लिसे जूगु फाइनल कासाय् नियमित ओभरय् व सुपर ओभरय् बराबरीइ जुइवं बाउन्ड्री प्रहारया ल्याखं इंग्ल्यान्डं दुर्लभ विजय चूलाकूगु खः । न्यूजिल्यान्डं न्हापां ब्याटिङ्ग यासें २४१ रन दयेकूगु खः ।

लिसलय् ब्याटिङ्ग याःवःगु इंग्ल्यान्ड नं २४१ रनय् अलआउट जुल । नियमित ५० ओभरय् बराबरी जुइवं सुपर ओभरय् वंगु खः । सुपर ओभरय् इंग्ल्यान्डं न्हापां ब्याटिङ्ग यासें १५ रन दयेकल । लिसलय् ब्याटिङ्ग याःवःगु न्यूजिल्यान्डं नं १५ रन हे जक दयेकेफत । सुपरय् ओभरय् नं बराबरीइ जुइवं कासाया निर्णय बाउन्ड्री प्रहारया ल्याखं जूगु खः ।

पूवंक कासाय् इंग्ल्यान्डं २४ प्यंगू बाउन्ड्री थ्वातसा न्यूजिल्यान्डं १६ गू जक थ्वाःगु खः । थ्व ल्याखं इंग्ल्यान्डं खुगू बाउन्ड्री अप्वः थ्वानाः दुर्लभ विजय चूलाकूगु खः । मेखे ब्राउन्ड्रीया आधारय् कासा क्वःछिइगु नियमयात कयाः धाःसा लोकंह्वाःपिं कासामिपिंसं हे आलोचना याःगु दु ।

भारतया पुलांम्ह क्रिकेटर गौतम गंभीरं छगू ट्विट यासें धाःगु दु, ‘कासाया विजेताया घोषणा दकलय् अप्वः ब्राउन्ड्री थ्वाःगु आधारय् जुल । आइसीसीया थ्व बेतुकया नियम खः । थ्व कासा टाइ जुइमाः खः । जिं निगुलिं टिमयात बधाइ बी, गुपिंसं उत्कृष्ट फाइनल कासा म्हित । निगुलिं टिम विजेता खः ।’ अथेहे मेम्ह भारतीय क्रिकेट युवराज सिंह नं ट्विट यासें वाउन्ड्री नियमय् असहमति प्वंकूगु दु ।

युवराजं ट्विट याःगु दु, ‘जि थ्व नियमय् सहमत मदु । तर नियम ला नियम हे खः । इंग्ल्यान्डं आखिरय् वल्र्डकप त्याकल, बधाइ दु । जिगु सहानुभुति किवितय्त दु, गुपिंसं अन्तिम तक संघर्ष यात, बांलाक म्हितल ।’विश्वकप क्रिकेटया अफिसियल ट्विटर क्रिकेट वल्र्ड कपं हे ट्विट यासें च्वःगु दु, ‘छगू विजेता, तर निगू च्याम्पियन टिम ।’

सम्बन्धित बुखँ

LEAVE YOUR COMMENTS