इंग्ल्यान्ड न्हापांखुसी युरो कपया फाइनलय्

येँ– इंग्ल्यान्ड युरो कपय् न्हापांखुसी फाइनलय् थ्यंगु दु । बुधवाः चान्हय् जूगु कासाय् ह्यारि केनं एक्स्ट्रा इलय् याःगु गोलया ग्वाहालिं इंग्ल्यान्ड फाइनलय् थ्यनेत ताःलाःगु खः । इंग्ल्यान्डय् युरो कप धेंधेंबल्लाखय् फाइनलय् थ्यंगु थ्व हे न्हापांखुसी खः । थ्वयां न्ह्यः इंग्ल्यान्ड आःतक छक्वः नं फाइनलय् म्हितूगु मदुनि ।

कासाया १०४औं मिनेटय् रहिम स्ट्रलिङ्गयात बक्सय् क्वःदयेकेवं इंग्ल्यान्डयात पेनाल्टिया ह्वःताः वःगु खः । ह्यारि केनं थ्वाःगु पेनाल्टि डेनमार्कया गोलकिपार क्यास्पर सुमाइकलं पंगु खःसां केनं रिबाउन्डय् वःगु बलयात हाकनं पोस्टय् दुछ्वयाबिउगु खः । केनया थुगुसीया युरोय् थ्व प्यंगूगु गोल खः ।

कासाया नियमित इलय् निगुलिं टिमं छगू छगू गोल यायेवं कासा एक्स्ट्रा इलय् वंगु खः । डेनमार्कया निंतिं मिकाइल डेम्स्गार्ड कासाया ३० औं मिनेटय् गोल याःगु खः । तसकं बांलाःगु फ्रिकिक प्रहार यासें डेम्सगार्डं थ्व गोल याःगु खः । थुगुसीया युरोकपय् इंग्ल्यान्डं नःगु थ्व न्हापांगु गोल खः । थ्वयां न्ह्यः इंग्ल्यान्डया गोलकिपर जोर्डन पिकफोर्ड दकलय् ताःई तक गोल मनःम्ह इंग्लिस गोलकिपर नं जूगु खः । पिकफोडं इंग्ल्यान्डया महान् गोलकिपर गोर्डन ब्यांकया सन् १९६६ इ ७२० मिनेट तक गोल मनःगु कीर्तिमान त्वाःथःगु खः ।

कासाया ३९ औं मिनेटय् डेनमार्कया कप्तान सिमोन केयरया आत्मघाती गोलं इंग्ल्यान्डय् बराबरीइ वयेत ताःलात । ह्यारि केनया पासय् बुकायो साकां याःगु क्रसयात पनेगु झ्वलय् केयरया तुतिइ लानाः बल पोष्टय् दुहां वनेवं कासा बराबरीइ वःगु खः ।

आः इंग्ल्यान्डं वइगु आइतवाः चान्हय् इटलीलिसे वेम्ब्ले मैदानय् फाइनलय् कासा म्हिती । यदि इटलीयात बुकेफत धाःसा इंग्ल्यान्डया थ्व न्हापांगु युरोकप उपाधी जुइ ।