युरोपा लिगय् लियोन त्यात, लेस्टर सिटी व नापोली बुत
एजेन्सी÷ युरोपा लिग अन्तर्गत बिहिवाः बहनी जूगु कासाय् फ्रेन्च क्लब लियोनं डेनिस क्लब ब्रोन्डवीयात बुकूगु दु । लिगय् जूगु मेगु कासाय् लेस्टर सिटी व नापोली बूगु दु । इंग्लिस क्लब लेस्टर सिटीयात पोलिस क्लब लेगिया वार्सजावा व इटालीया क्लब नापोलीयात रसियन क्लब स्पार्टाक मस्काें बुकूगु खः ।
युरोपा लिगया समूह ‘ए’ य् च्वंगु लियोनं ब्रोन्डवीयात ३–० गोलं बुकूगु खः । लियोनया निंतिं टोको इकम्वीं निगू व होउसिम एओरं छगू गोल याःगु खः । थ्व हे पुचलय् दुगु चेक क्लब स्पार्टा प्राहां स्कटिस क्लब रेन्जर्सयात १–० गोलं बुकल । लिगया समूह ‘सी’इ च्वंगु लेस्टर सिटीयात लेगिया वार्सजावां १–० गोलं बुकूगु खः ।
वार्सजावाया निंतिं माहिर इम्रलीं गोल याःगु खः । थ्व हे पुचलय् च्वंगु इटालियन क्लब नापोलीयात स्पार्टाक मस्काें ३–२ गोलं बुकल । मस्कोया निंतिं स्वीन्सी प्रोम्सं निगू व मिखाइनल इगनाटोभं छगू गोल याःगु खः । नापोलीया निंतिं एलजिफि एलमास व भिक्टो ओसिमहेनं गोल याःगु खः । थ्व कासाय् नापोलीया मारियो रुइ व मस्कोया काउफ्रिजं ह्याउँगु कार्ड नःगु खः ।
LEAVE YOUR COMMENTS