बेलायती ट्यांकर पनेगु इरानया कुतः

इरानी पानीजहाजतय्सं खाडीइ बेलायती चिकं ट्यांकरयात पनेगु कुतः याःगु, तर उमित ख्याना छ्वयागु खँ बेलायती सरकारया प्रवक्तां धाःगु दु । स्वंगः इरानी पानीजहाज व बेलायती ट्यांकरया दथुइ बेलायती नौसेनाया पानीजहाज एचएमएस मन्ट्रोल दुहां वयाः इरानी जहाजयात मौखिक ख्याच्वः बियाः ख्यानाछ्वःगु खँ प्रवक्तां धाःगु दु ।

बेलायती सरकारया प्रवक्तां इरानी पानीजहाजया ज्या अन्तर्राष्ट्रिय कानुनी विपरीत जूगु खँ नं धाःगु दु । इरानं वंगु वालय् जिब्राल्टरपाखे वयागु ट्यांकर कब्जाय् काःगु ज्याया बदला कायेगु ख्याच्वः बिया वयाच्वंगु खः ।

अमेरिकी सञ्चार माध्यमतय्सं इरानया रिभोल्युसनरी गार्ड कोरया स्वामित्य् दुगु जहाजतय्सं बेलायतया हेरिटेज नांया ट्यांकरयात खाडीया स्ट्रेट अफ हार्मुजपाखे वनाच्वंगु इलय् पंगः थनेगु कुतः याःगु खँ धाःगु दु । उगु जहाजया सुरक्षाय् नापनापं वनाच्वंगु बेलायती नौसेनिक जहाज एचएमएस मन्ट्रोजं इरानी जहाजपाखे बन्दूक ताके यानाःलिहां वनेत चेनावनी बिइवं उपिं बिसिउँ वंगु खँ नं अमेरिकी संचारमाध्यमं च्वःगु दु ।

वंगु वालय् बेलायतया रोयल मरिनं जिब्राल्टरय् छगः इरानी चिकं ट्यांकरयात कब्जाय् कायेगु निंतिं ग्वाहालि याःगु खः । उगु इराकी ट्यांकर युरोपेली संघं तयातःगु प्रतिबन्ध उल्लंघन यानाः सिरिया वनेत्यंगु आशंकाय् ज्वंगु खः ।

थ्व घटना लिपा छम्ह इरानी अधिकारीं थःपिनिगु ट्यांकर लित मबिल धाःसा उकिया बदला कथं छगः बेलायती ट्यांकर कब्जा यायेमाःगु खँ धाःगु खः । उबलय् इरानं बेलायती राजदूत सःताः समुद्री डकैती शैलीया विरोध याःगु खः ।