विश्वया २५ गू सिबें अप्वः देसय् ओमिक्रोन, भारतय् नं थ्यन
- नेपालभाषा टाइम्स
- ११४२ कछलागा त्रयोदशी
- किपा-अमेरिकाया सान फ्रान्सिस्काेय् ओमिक्राेन पुष्टि जूगु जानकारी बिसे अनया स्वास्थ्य निर्देशक
एजेन्सी- कोरोना भाइरसया न्हूगु भेरियन्ट ओमिक्रोन न्हियान्हिथं विश्वया थीथी देसय् खनेदयाच्वंगु दु । अन्तर्राष्ट्रिय सञ्चार माध्यमं बिउगु जानकारीकथं विश्वया २५ गू सिबें अप्वः देसय् ओमिक्रोन खनेदयेधुंकूगु दु । दकलय् न्हापां दक्षिण अफ्रिकाय् थ्व भेरियन्टया कोरोना भाइरस खनेदुगु खःसा आःतकया दुने थ्व भाइरस बोत्सवाना, अस्टे्लिया, अस्ट्रिया, अमेरिका, ब्राजिल, फ्रान्स, क्यानाडा, डेनमार्क, इजरायल, नाइजेरिया, बेलायत, दक्षिण कोरिया, जापान आदि देसय् पुष्टि जुइधुंकूगु दु ।
अथेहे भारतय् न निम्हेसिके ओमिक्राेन भाइरस खनेदुगु पुष्टि जूगु दु । बिहीवाः कर्नाटकय् निम्हेसिके ओमिक्राेन खनेदुगु जानकारी बिउगु खः ।
ओमिक्रोन भेरियन्ट खनेदयेधुंकाः अमेरिका, युरोप व थीथी देशं दक्षिण अफ्रिकाया थीथी देय्यात यात्रा प्रतिबन्ध तयेधुंकूगु दु । थीथी अफ्रिकन देशं नं दक्षिण अफ्रिकायात यात्रा प्रतिबन्ध तःगु दु । अथे हे इजरायल व जापानं विदेशी यात्रुतय्त हे प्रतिबन्ध तःगु दु । भारतं थ्व हे डिसेम्बर १५ निसें शुरु यायेत्यंगु अन्तर्राष्ट्रिय उडान स्थगित याःगु दु ।
थ्व भेरियन्ट खनेदयेवं विश्वन्यकं हे खोप बीगु ज्यायात तीव्रता बीगु दु । निगुलिं डोज कायेधुंकूपिंत बुस्टर डोज कायेत नं राष्ट्र प्रमुखतय्सं इनाप यानाच्वंगु दु । थ्व हे झ्वलय् चीनया वैज्ञानिकतय्स कोरोनाया दक्व भेरियन्टयात सखाप याइगु एन्टिबडीया विकास यानाःगु दाबी याःगु दु । रुसं नं ओमिक्रोन विरुद्धया खोप दयेकेगु शुरु यायेधुंनागु धाःगु खः ।
LEAVE YOUR COMMENTS