ने. सं. ११४४ कौलाथ्व चौथी -

पां सँ चाकीगु सैलुन

कापः, वसः भ्वं आदि छुं नं चायेमाल धाःसा कैंचीया प्रयोग जुइ । अथे हे तरकारि वा नसाज्वलं तायेत कुँइ व चक्कु प्रयोग जुइ । तर सिँ पालेगु पां नं सँ चाये जिउ धायेबलय् सुं नं पत्याः जुइमखु । खय्तला थ्व संसारय् गुलि नं अजू अजू चायापुगु ज्या जुयाच्वनी । उकियात पत्याः यायेगु वा मयायेगु छिगु थःगु हे विचाः ।

मसाज सेन्टरय् सर्पपाखें मसाज याकेगु, ख्येँचं समाः (मेकअप) यायेगु, चियापत्ति, तुल्सी हः, कागति, दालचिनि आदिं स्वास्थ्ययात बांलाकेगु धइगु खँया झीसं यक्वं न्यने धुन, ब्वने धुन । तर पां सँ चाःगु वा चाकेगु धइगु आतक न्यने लंगु मदु । आः धाःसा कैंची मखु, पां सँ चाःगु अजू चायापुगु क्रियाकलाप नं समाचार जुयाः पिहां वःगु दु ।

रुसया हेयर ड्रेसर ड्यानियल इस्टोमिनं थःगु पार्लरय् वइपिं गाहाकिया सँ कैंचीं मखु पां चाना बीगु यानाच्वंगु दु । वया सैलुनय् पां सँ चाकेत वइपिं गाहाकित नं थुलि दु कि, वयात सँ चाकुचाकुं हे लिमलाः । सैलुनया थुवाः इस्टोमिनया धापूकथं कैंचीं स्वयां पां हे सँ चायेत तसकं अपू । अले थःगु सैलुनय् वइपिं न्ह्याम्हं गाहाकि छफुति हे मग्यासें पां हे सँ चाकेत वइगु वयागु धापू दु ।

इस्टोमिनया पां सँ चाकेगु ज्यायात गुलिसिंन तसकं च्वछायेबहगु ज्या धकाः धायेगु यानाच्वंगु दुसा गुलिसिनं सँ चायेगु व चाकेगु थेंज्याःगु तसकं सामान्य ज्याया निंतिं नं खतरा नालाकाःगु धासें आलोचना नं यायेगु यानाच्वंगु दु ।