ने. सं. ११४६ गुँलाथ्व पारू - गुँलापर्व न्ह्यइगु

मुनासः ख्यालः कासाया निंतिं च्वमि-स्यनामि मुँजया

यल (नेपालभाषा टाइम्स) – मुनासःया ग्वसालय् जुइगु ‘स्वनिगःव्यापी मुनासः ख्यालः कासा’या निंतिं ख्यालः च्वमि व स्यनामिया छगू मुँज्या जुल । ख्यालः कासाया निंतिं छनोट जूगु च्यापु ख्यालःया च्वमि व स्यनामिया मुँज्या जूगु खः ।

थ्व हे वइगु भदौ २७ व २८ गते निन्हुयंकं जुइगु मुनासः ख्यालः कासाय् येँय्पाखें निपु, किपुलिं निपु, यलं छपु, ख्वपं छपु व थेच्वं निपु यानाः मुक्कं च्यापु ख्यालः स्वीकृत जूगु खः । कास ाया निंतिं झिंछपु ख्यालः दुहां वःगु खःसां च्यापु ख्यालः छनोट जूगु खः ।

उगु इलय् मुनासःया नायः सुरेन्द्र तुलाधरं छनोट जूगु ख्यालःया रिहर्सल शुरु यायेत इनाप यासें ख्यालः कासा जुइ बाःछि न्ह्यः कासाय् दुथ्याःगु दक्वं पुचःपाखें अनिवार्य रुपं दबुलिइ न्ह्यब्वइगु ख्यालःया परिमार्जित स्क्रिप्ट लःल्हायेत इनाप यानादिल ।

छुं कथंया विवाद मवयेमा धकाः च्वंगु मुँज्या कासाय् न्हाप, लिउ, लियांलिउ व हःपाःयात छसिकथं न्यय्द्वः, स्वीद्वः, नीद्वः व झिद्वः तका दांलिसे ट्रफी, मेडल व दसिपौ लःल्हायेगु नं जानकारी बिउगु खः । अथे हे दकलय् बांलाःम्ह मिजं ख्यालःम्वः, मिसा ख्यालःम्वः, बांलाःम्ह स्यनामि व बांलाःम्ह च्वमियात म्हति न्याद्वः तका दां ट्रफी व दसिपौ लःल्हाइ । अथे हे ब्वति काःगु दक्वं पुचः व ख्यालःम्वःतय्त नं दसिपौ लःल्हायेकथं व्यवस्थापनया ज्या जुयाच्वंगु नं जानकारी बिउगु दु ।

ख्यालः कासाया निंतिं छनोट जूगु दक्वं पुचःयात रिहर्सल खर्च वापत झिद्वः तका बीगु घोषणा यानातःगु दु ।