विश्वकपय् फिलिपिन्सया ऐतिहासिक विजय

एजेन्सी- मिस्तय् विश्वकप फुटबलय् फिलिपिन्सं ऐतिहासिक विजय चूलाकूगु दु । थुगुसी जक विश्वकपय् डेब्यू याःगु फिलिपिन्सं मंगलवाः न्यूजिल्यान्डयात १–० गोलं बुकूगु खः । विश्वकपय् फिलिपिन्सया थ्व न्हापांगु विजय खः । थुगुसीया विश्वकपय् च्यागू न्हूगु टिम डेब्यू याःगुलिइ छगू फिलिपिन्स नं खः ।

मेखे फिलिपिन्सपाखें पराजित जुइवं न्यूजिल्यान्डया नकआउट चरणय् वनेगु लँपु धाःसा थाकुकाबिउगु दु । थुगुसी विश्वकपया सहआयोजक न्यूजिल्यान्डं उलेज्या कासाय् नर्वेयात बुकाः नकआउट चरणया निंतिं लँ चायेकूगु खः । न्यूजिल्यान्डया थ्व विजय नं विश्वकपय् वयागु न्हापांगु विजय खः ।

न्यूजिल्यान्डयात बुकेगु निंतिं फिलिपिन्सया सरिता बोल्डेनं छगू जक गोल याःगु खः । कासाया २४ औं मिनेटय् सारा एग्गेसिभया पासय् बोल्डेनं हेडपाखें गोल याःगु खः । विश्वकप धेंधेंबल्लाखय् फिलिपिन्सपाखें याःगु थ्व न्हापांगु गोल नं खः ।

घरेलु दर्शकतय् पूवंक समर्थन दुगु न्यूजिल्याण्डया निंतिं ज्याक्वी ह्याण्डं गोल यासें कासा बराबरीइ हयेत ला स्वःगु खः तर वयागु गोलयात भिएआर पाखें अस्वीकृत जुइवं घरेलु दर्शक निराश जुइमाःगु खः ।