उत्तम मंगल धर्म विषयय् मन्थन
यल (नेपालभाषा टाइम्स) – लोटस रिसर्च सेन्टरया ग्वसालय् ‘उत्तम मंगल धर्म’ विषययात कयाः छगू मन्थन ज्याझ्वः जुल । यल महानगरपालिका २० वडास्थित ख्वायबहिलिइ वंगु आइतवाः उगु ज्याझ्वः जूगु खः ।
ज्याझ्वलय् शिशिल चित्रकारं उत्तम मंगल धर्म विषयय् केन्द्रीत जुयाः थःगु प्रस्तुति बियादीगु खः । थःगु प्रस्तुतिया झ्वलय् वय्कलं भगवान बुद्धया पालि साहित्य-५२६०२ पृष्ठ व ७४४८२४८ शब्दय्) (साभारः गोयन्का सत्यनारायण, धारण करे तो धर्म, विपश्यना विशोधन विन्यास, १९९९, पृ.१३)य् बुद्ध व बुद्ध धर्मया खँ न्ह्यथनातःगु मदु धासें थौं वयाः स्वंगू यानय् विभाजन जुयाः झन् संकुचित यायेगु जुयाच्वन धयादिल ।
बुद्ध शिक्षाया वचन, उपदेश ब्वनाः नाला मकासे खालि बुद्ध धर्म व बौद्धमार्ग धकाः जुयां छुं फाइदा मजुइगु जक मखु, बुद्ध शिक्षाया हे उपहास जुइगु, समाज, व्यक्तिया भिं मजुइगु खँ न्ह्यथनादिल । लिसें वय्कलं महायानी ग्रन्थनिसें नेपाःया नवग्रन्थया थीथी दसुत न्ह्यब्वयेगु झ्वलय् प्यंगू स्मृति प्रस्थान भावना, विपश्यना बाहेकं व्यक्ति, समाज व देय्या भिं जुइगु निंतिं मेगु लँपु हे मदुगु खँय् बः बियादिल ।
वय्कःया प्रस्तुतियात कयाः टिप्पणी यानादिसें बौद्ध विद्वान मदनरत्न मानन्धरं प्रस्तुत विचारय् मत एक्यता वा मतभेद दइगु अस्वाभाविक मखु धासें व्यक्ति, व्यक्तिया विचार व सोचय् निर्भर जुइ धयादिल । बौद्धमार्गीत अथें हे म्हो जुयाच्वंगु अवस्थाय् स्वंगू यानय् तक्यना च्वनेगु थुकिं हानी हे जुइगु खँ न्ह्यथनादिल ।
वय्कलं दक्वं प्राणाीया कल्याण जुइगु बुद्ध शिक्षाय् मेमेगु विषयय् नं दुथ्याकेमाःगु खँय् बः बियादिसें विषयया प्रस्तुतिइ खँग्वः, भााषिक त्रुटियात कयाः नं कुलादीगु खः ।
ज्याझ्वःया विशिष्ट पाहां प्रा. डा. वज्रराज शाक्यं उत्तम मंगलया चर्यानिसें थःगु विपश्यना ध्यानया अनुभव, प्रज्ञापारमिता व शुन्यतानिसें वज्रोपम समाधिया बारे चर्चा यानादीगु खः ।
दकलय् लिपा सभापतिया थासं डा. सुरेन्द्र वज्राचार्यं सहभागितय् जिज्ञासा, न्ह्यसःयात स्पष्ट यानादिसें थीथी देसय् समाजय्, धर्मया नामं जुयाच्वंगु विभिन्नता, धर्म धाये मल्वःगु, धाथेंया धर्म खःसा व्यक्ति व समाजया भिं जुइमाःगु खँ कनादिसें उत्तम मंगल धर्मपाखे न्ह्यचिलेमाःगु खँ कनादिल ।
LEAVE YOUR COMMENTS